Lit sekalak dilaki si la banci erdalan, tiap wari ia kundul i gerbang rumah pertoton janah mindo-mindo. Bas sada wari, idahna me Petrus ras Johanes masuk ku rumah pertoton. Nina man kalak e, ‘Mekuah min atendu aku, Pak.’ Nina Petrus, ‘Lit terergan asangken sen si ateku kubere man banndu. I bas gelar Jesus, cinderken ras erdalanlah!’ Sanga isampati Petrus ia cinder, banci ia erdalan! Meriah kel ukur kalak si ngidah mukjizat e janah melala si jadi tek.

Tapi imam-imam ras kalak Saduki merawa ngidah si e. Itangkapna rasul-rasul ras babana ku pengadilen. Isungkunina kalak e, ‘Arah ise datndu kuasa mpepalem ia?’ Nina Petrus, ‘Arah Jesus Kristus si nggo ibunuhndu.’ Isergang imam-imam e ia, ‘Ulanai ku begi kam ngerana soal Jesus!’ Tapi nina rasul-rasul, ‘Kami arus terus ngerana kerna Jesus. La nggit kami ngadi.’

Kenca Petrus ras Johanes bebas, iceritakenna kejadin e man murid-murid si deban. Ras-ras kalak e ertoto, mindo man Jahwe, ‘Sampati min kami tetap pang bas ndalanken dahin si ibereNdu.’ Emaka ibere Jahwe kalak e kesah si badia janah terus kalak e erberita ras mpepalem si sakit. Reh buena si tek ras enda erban cian ate kalak Saduki. Itangkapna rasul-rasul ras itamana ku penjara. Tapi bas berngi e, isuruh Jahwe malekatNa nalangi pintu penjara. Nce, nina malekat e man kalak e, ‘Laweslah kam ku rumah pertoton, ras ajari kalak i je.’

Kenca terang, guru-guru agama i pengadilen Sanhedrin mbegi berita, ‘Pintu penjara kunci denga, tapi kalak si itangkap kena lanai i je! Nggo ngajar ia bas rumah pertoton!’ Dung e, rasul-rasul itangkap ka, ibaba ku Sanhedrin. I je, ikataken imam si mbelin, ‘Ilarang kami kena ncakapken kerna Jesus!’ Tapi, nina Petrus, ‘Si arus ipatuhi kami Dibata, labo manusia.’

Merawa kel guru-guru agama, ibunuhna atena rasul-rasul e. Tapi lit sekalak Parisi si mbela kalak e, gelarna Gamaliel. Nina, ‘Hati-hati kena! Banci jadi Dibata si ngelindungi kalak e. Pang kena ngelawan Dibata?’ Nggit teman-temanna mbegiken kata Gamaliel. Kenca rasul-rasul ipekpeki alu kayu, iperentahken guru-guru e sekali nari gelah ulanai erberita kerna Jesus. Dung e, rasul-rasul pe ipulahi. Tapi, pang denga lalap kalak e erberita i rumah pertoton bage pe arah rumah ku rumah.