Sepuluh wari kenca Jesus mulih ku surga, ialoken murid-muridna me kesah si badia. Sanga si e, i bas tahun 33 M, lit perayan Pentakosta. Rehen me kalak arah erbage ingan nari ku Jerusalem guna ngerayakenca. Sanga si e, lit 120 murid Jesus pulung i datas loteng. Rempet lit kejadin si luar biasa. I datas takal kalak e lit teridah bagi api, nce banci kalak e ngerana bas bahasa-bahasa si deban. Lit ka sora angin si meter i bas ruangen e.

Kalak si sangana reh ku Jerusalem arah erbage negeri nari megi sora e. Kiam me kalak e ndahi rumah e, guna meteh kai si terjadi. Mamang ate kalak e megi murid-murid banci ngerana bas erbage bahasa. Nina ngerana, ‘Kalak enda me kalak Galilea? Uga maka banci ngerana bas bahasata?’

Cinder me Petrus ras rasul-rasul si deban i lebe-lebe kalak e. Iceritakenna uga Jesus ibunuh ras uga ia ipekeke Jahwe. Nce, nina petrus, ‘Gundari Jesus nggo i surga i sebelah kanan Dibata janah nggo berekenNa kesah si badia si nggo ijanjikenNa. E me sebapna enda terjadi.’

Kata-kata Petrus e kena ku pusuh kalak e, emaka isungkunna Petrus, ‘Kai si arus ilakoken kami?’ Nina Petrus, ‘Kena arus ertobat janah ibaptis i bas gelar Jesus. Kena pe ngaloken kesah si badia nge kari.’ Bas wari e, lit 3.000 kalak si ibaptis. Kenca wari e, murid-murid i Jerusalem reh buena alu meter. Alu penampat kesah si badia, iban rasul-rasul me perpulungen-perpulungen gelah banci iajarkenna kerina si nggo iperentahken Jesus.