Timotius, eme sekalak anak perana si lit i runggun Listera. Bapakna kalak Junani ras nandena kalak Jahudi. Nandena, Enike, ras ninina, Lois. Kalak e me si ngajarken kerna Jahwe man Timotius mulai kitik-kitikna nari.

Sanga reh Paulus ku Listera bas perdalanenna si peduaken, iperdiateken Paulus me Timotius. Idahna maka keleng kel ate Timotius man turang seninana, janah nggit ia nampati kalak e. Iajak Paulus si Timotius ikut bas perdalanenna. Manjar-manjar, iajari Paulus me Timotius gelah banci ia erberita ras ngajarken berita si meriah alu mehuli.

Ku ja pe Paulus ras Timotius lawes, lalap kalak e dat petunjuk arah kesah si badia. Bas sada berngi, lit idah Paulus, tempa-tempa bagi sekalak dilaki si ngelebuh ia ku Makedonia guna nampati kalak si lit i je. Emaka, lawes me Paulus, Silas, ras Lukas ku je erberita ras erban perpulungen.

Bas Makedonia, kota si lit i Tesalonika, melala dilaki ras diberu si jadi kalak Kristen. Tapi, piga-piga kalak Jahudi cian man Paulus ras teman-temanna. Ipepulungna me nterem jelma guna nangkap kalak e ras mabasa ku penguasa kota, janah serko-serko, nina, ‘Kalak enda me musuh pemerentahen Roma!’ Perban melala bahaya si ngancam Paulus ras Timotius, lawes me kalak e bas berngina ku Berea.

Kalak i Berea semangat kel mpelajari berita si meriah. I je, melala kalak Junani ras Jahudi si jadi Kristen. Tapi, sanga kalak Jahudi arah Tesalonika reh ka erban masalah, lawes me Paulus ku Aten. Timotius ras Silas tetap tading i Berea guna mpegegehi turang senina. Bas pudi wari, isuruh Paulus si Timotius lawes ku Tesalonika nampati turang senina bas ngadapi tentangen si mberat. Dung e, isuruh Paulus ka Timotius ku runggun-runggun si deban guna mpegegehi kalak e.

Nina Paulus man Timotius, ‘Kerina kalak si ngelayani Jahwe pasti ndatken tentangen.’ Timotius pe ndatken tentangen ras ipenjaraken perban ia ngelayani Jahwe. Meriah kel ukurna perban nggo ibuktikenna ia setia man Jahwe.

Nina Paulus ka man kalak Kristen i Pilipi, ‘Ku suruh Timotius ndahi kena. Ia me si ngajari kena uga ndalanken perentah Dibata ras ngajari kena carana erberita.’ Ieteh Paulus maka Timotius e setia bas tugasna. Lalap kalak e kompak bas pelayanen.