PELAJAREN 3
Adam ras Hawa La Patuh man Dibata
Bas sada wari Hawa sangana sisada, nce, reh nipe ngerana man ia. Nina nipe e, ‘La ibere Dibata panndu buah batang kayu e?’ Nina Hawa, ‘Banci nge kupan kerina, kecuali buah batang kayu e. Adi pan kami buah batang kayu e, banci kami mate.’ Nce nina nipe, ‘Labo kam mate. Adi panndu, banci kam seri ras Dibata.’ Payo nge katana e? Lang, situhuna erbual nge ia. Tapi tek Hawa man ia. Itatap Hawa lalap buah e. Reh dekahna reh merhatna ia manca. Dungna, ipanna me buah e, nce iberena man Adam. Ieteh Adam nge adi la kalak e patuh pasti ia mate. Tapi ikut ka nge Adam manca.
Kenca si e, ngerana Jahwe man Adam ras Hawa. IsungkunNa engkai maka kalak e la patuh. Reh nina Adam, enda perban isuruh Hawa, nce reh ka nina Hawa enda perban nipe si erbual man bana. Perban Adam ras Hawa la patuh, ipelawes Jahwe kalak enda arah taman Eden nari. Isuruh Jahwe malekat-malekat ras pedang api guna njaga taman e, gelah kalak e lanai banci masuk ku taman e.
Si mbuali Hawa e pe pasti iukum, bage nina Jahwe. Labo nipe e si erbual man Hawa. Perban nipe labo banci ngerana iban Jahwe. Malekat si jahat nge si erban nipe e banci ngerana. Sengaja ia erbual man Hawa. Malekat e gelarna Setan si Iblis. Imasapken Jahwe pagi Setan e, gelah lanai banci ipengaruhina kalak guna erban si jahat.
“Si Iblis . . . pemunuh kap. La pernah ikapitina si benar, sabap la lit si benar i bas ia.”—Johanes 8:44
