Dungna, nggo melala jelma bas doni enda. Buen si jahat perbahanenna. Bas surga pe melala malekat si jadi jahat. Itadingkenna rumahna i surga janah nusur ia ku doni. Tehndu ngkai maka bage kalak e? Perban merhat kalak e erjabu ras diberu-diberu si lit i doni, emaka iubahna dirina jadi jelma.

Lahir me anakna arah diberu-diberu e. Anak-anak si lahir e reh galangna, reh gegehna, janah gutul-gutul kerina. Igangguina kalak si deban. Jahwe lanai tahan ngidah si e kerina. Emaka, imasapken Jahwe atena kalak enda alu banjir si mbelin.

Tapi lit sekalak jelma si beda kel ras kalak e. Keleng kel atena Jahwe. Gelarna Nuah. Diberuna sada, anakna telu, ras permenna telu. Gelar anak-anakna eme Sem, Ham, ras Japet. Isuruh Jahwe Nuah erban kapal si galang gelah banci kalak e selamat arah Banjir si Mbelin nari. Kapal e bentukna bagi kotak si galang janah banci bombang i datas lau. Isuruh Jahwe ka imasukken Nuah binatang-binatang ku kapal e gelah selamat.

Mis iban Nuah kapal e. Nuah ras keluargana erban kapal e sedekah 50 tahun. Ibanna kapal e seri kel bagi si isuruh Jahwe. Sanga erban kapal, ikataken Nuah ka man kalak maka lanai ndekah reh me banjir e. Tapi la lit si megiken ia.

Dungna, seh me waktuna kalak enda masuk ku kapal. Mari sinen kai si terjadi kenca e.