Masuk me Nuah, keluargana, bage pe binatang-binatang ku kapal e. Nce, itutup Jahwe me pintuna. Dungna, nusur me udan. Meder kel udan e, dungna, bombang me kapal e. Kenca si e, doni nggo dem alu lau. Mate me kerina kalak jahat si la masuk ku kapal e. Tapi Nuah ras keluargana aman bas kapal. Pasti meriah kel ukur kalak e perban patuh man Jahwe.

Udan e nusur sedekah 40 wari ras 40 berngi, janah rempet ngadi. Sitik-sitik urak me lau e. Dungna ngadi me kapal e i das gunung. Tapi dem denga lau bas doni, emaka lenga banci kalak e ndarat arah kapal nari.

Lau e pe reh urakna. Nggo lebih sada tahun Nuah ras keluargana i bas kapal e. Kenca e, ikataken Jahwe man kalak e maka ia nggo banci ndarat arah kapal. Tempa-tempa kalak e gundari nggeluh bas doni si mbaru. Bujur kel ikataken kalak e man Jahwe erkiteken nggo iselamatkenNa kalak e, emaka ibanna persembahen man Jahwe.

Meriah kel ukur Jahwe ngidah persembahen e. Erjanji me Jahwe maka lanai bo pagi iukumna doni alu banjir. Guna nginget janjina e, ibanNa me pelangi i langit. Eme pelangi si pertama. Pernah ntah lang idahndu pelangi?

Nce, isuruh Jahwe gelah anak-anak Nuah ras keluargana me si ngiani doni enda seh asa dem.