PELAJAREN 11
Kinitekenna Iuji
Kitik-kitik nari, Isak nggo iajari Abraham gelah keleng atena Jahwe ras tek nandangi kerina janji Jahwe. Tapi sanga umur Isak 25 tahun, isuruh Jahwe Abraham ngelakoken pendahin si mberat akapna ngelakokenca. Kai nge pendahin e?
Nina Dibata man Abraham, ‘Tolong baba anakndu ku Gunung Moria, seh i je kari, persembahken ia man bangKu.’ Mamang kel ate Abraham, engkai maka bage pemindon Jahwe. Tapi tetap ia patuh man Jahwe.
Paginna, lawes me Abraham ku taneh Moria radu ras Isak bage pe dua juak-juakna. Kenca telu wari erdalan, nggo teridah gunung e. Isuruh Abraham juak-juakna nimai i teruh gunung e, ia ras Isak nangkih ku datas. Isuruh Abraham Isak maba ranting, nce Abraham maba piso. Isungkun Isak bapakna, “I ja kin biri-biri si man persembahenken e, Pak?” Nina Abraham, ‘Jahwe kari nikapkenca, Nakku.’
Dungna, seh me kalak enda i datas gunung, nce ibanna ingan persembahen. Kenca si e, iket Abraham tan ras nahe Isak, nce tamana ku datas ingan persembahen e.
Ibuat Abraham pisona. Tapi ope lenga igeleh Abraham si Isak, ngerana malekat Jahwe surga nari, ‘Abraham! Ola bunuh anak e! Nggo Kueteh maka tek kel kam man Dibata, emaka anakndu si tonggal pe nggit kam mpersembahkenca.’ Kenca si e, idah Abraham sada bajar biri-biri si sangkut tandukna i bas batang kayu. Emaka, mis ilepasken Abraham nali si ngiket Isak ras ipersembahkenna biri-biri e jadi gantina.
Mulai je nari, iban Jahwe me Abraham jadi temanNa. Ietehndu kin ngkai? Perban nggit Abraham ndalanken kai pe si ipindo Jahwe, amin gia la ietehna ngkai maka isuruh Jahwe ia ngelakokenca.
Ikataken Jahwe mulihi janjiNa man Abraham, ‘Kubereken man bandu keturunen si seh kel teremna.’ Enda ertina maka kerina manusia ndatken pasu-pasu me pagi arah keturunen Abraham.
“Sabab bage pengkelengi Dibata doni enda, e maka iberekenNa AnakNa sitonggal, gelah ola bene ise pe si tek man bana, tapi gelah dat kegeluhen si tuhu-tuhu si la erkeri-kerin.”—Johanes 3:16
Mungkin Menarik Ka Kapndu
USIHLAH KINITEKEN KALAK ENDA
Abram—”Bapa nandangi Kerina Kalak si Tek”
Uga nge Abram ncidahken kiniteken? Alu cara kai saja atendu ngusih kiniteken Abram?
