Erjanji Musa man Paro lanai ndigan pe ia reh. Tapi sope lenga ia lawes ikatakenna man Paro, ‘Tengah berngi enda, anak si dilaki sintua arah Paro ras pe anak dilaki arah budak-budakna mate kerina.’

Iperentahken Jahwe man kalak Israel guna erbahan acara man-man. Nina Jahwe, ‘Potong sada anak biri-biri ntah pe anak kambing jantan si rumur sada tahun, tamaken darehna ku kusen pintu. Kenca si e, panlah daging si nggo ipanggang e ras roti si la tama ragi. Nce, ersikap kena, pake baju kena, selop kena, gelah banci kena lawes. I bas berngi enda Kubebasken kena kerina.’ Menurutndu uga nge perasan kalak Israel, pasti meriah akapna me?

Tengah berngina, reh me malekat Jahwe ku kerina rumah kalak Mesir. Adi la lit darehna i pintu rumah e, ibunuh malekat e me anak dilaki sintua bas rumah e, tapi adi lit dareh i pintu rumah e, lewat saja malekat e. Kerina anak dilaki sintua bas rumah kalak Mesir mate, la soal kalak si bayak ras si mesera. Tapi anak kalak Israel la lit si mate.

Anak Paro pe mate. Ban ceda kel ukur Paro, mis ikatakenna man Musa ras Harun, ‘Nggo me yah! Lawes kena, sembah Dibata kena, baba kerina asuh-asuhen kena e!’

 Iteruh bulan si terang, erbaris kalak Israel ndarat Mesir nari, keluarga tep-tep keluarga, suku tep-tep suku. Dilaki saja lit 600.000, lenga ka diberu ras anak-anak. Selain si e, lit ka si la kalak Israel si ikut ras kalak e, perban kalak e pe nggit nembah Jahwe. Dungna, kalak Israel bebas!

Guna mperingeti wari kalak e iselamatken Jahwe, tep-tep tahun iban kalak e acara man-man. Acara e igelari wari Paskah.