I negeri Us, lit dilaki si nembah Jahwe, gelarna Jop. Bayak kel ia, anakna pe nterem. Mehuli kel jelmana, nggit ia nampati kalak si mesera, kalak si mbalu-mbalu, ras anak si melumang. Amin pe mehuli perbahanenna lit kang masalahna.

La ieteh Jop maka iperdiateken Setan kepeken ia. Nina Jahwe man Setan, ‘Iperdiatekenndu nge suruh-suruhenKu Jop? La lit sekalak pe i doni enda si bagi ia patuhna janah ilakokenna si mehuli.’ Nina Setan njawapsa, ‘Patutlah isembahna Kam. IlindungiNdu janah ipasu-pasuNdu ia. IberekenNdu bana mbue lembu ras taneh. Tapi, adi ibuatNdu kerina si lit bas ia, lanai bo Kam isembahna.’ Nina Jahwe, ‘Ujindulah Jop. Tapi ula bunuhndu ia.’ Engkai maka ipeturut Jahwe iuji Setan si Jop? Tek Jahwe maka Jop pasti berhasil.

Iuji Setan me Jop alu piga-piga kejadin. Kejadin si pemena, reh kalak Seba nangko lembu ras kelede Jop. Kenca si e, kerina biri-birina mate tertutung. Reh ka kalak Kaldea nangko unta-untana. Si njaga asuh-asuhenna pe ibunuh. Kenca si e, terjadi me percuban si mbelinna. Kerina anak Jop mate itindihi rumahna si runtuh. Ceda kel ukur Jop, tapi tetap ilayanina Jahwe.

Itambahi Setan percuban man Jop alu erban kerina dagingna ugahen. Mesui kel iakap Jop. La ietehna engkai maka kerina si e terjadi man bana. Tapi tetap isembah Jop Dibata Jahwe. Kerina e iperdiateken Jahwe, janah meriah ukurNa ngidah Jop.

Ikirim Setan ka telu dilaki guna nguji Jop. Nina kalak e man Jop, ‘Pasti nggo ibanndu dosa janah ibunikenndu dosandu e. Emaka iukum Dibata kam.’ Nina Jop ngaloisa, ‘La lit kai pe kuban si salah.’ Kenca si e, iakap Jop maka Jahwe nge si erban ujin e, ikatakenna maka Dibata la adil man bana.

Lit anak muda si gelarna Elihu mbegiken kalak e ercakap-cakap. Kenca si e, ngerana ia nina, ‘Kerina si ikatakenndu e la tuhu. Labo siangka uga belinna perbahanen Jahwe. Labo pernah ilakokenNa si jahat. IetehNa nge kerina si terjadi ras isampatiNa kalak si ngenanami kesusahen.’

Nce, ngerana Jahwe man Jop. Nina, ‘Ije kin kam nai tupung Kuban langit ras doni enda? Pang kam ngatakenca maka Aku la bujur? Ngeranai kam tapi la ietehndu ngkai si enda terjadi.’ Iakui Jop kesalahenna emaka nina, ‘Salah aku. Mbarenda, ku begi saja ngenca kerna kam, tapi gundari nggo tuhu-tuhu kutandai Kam. Ngasup Kam ngelakoken kai pe. Ampunilah aku bas kai si nggo kukataken.’

Kenca nggo dung kerina kiniseran si iadapi Jop, ipepalem Jahwe ia janah ibereNa man Jop kebayaken dua kali lipat buena asa si mbarenda. Gedang umurna ras meriah kel akapna. Ipasu-pasu Jahwe Jop erkiteken patuh ia man Jahwe amin gia mesera. Nggit nge kam ngusih Jop ras terus ngelayani Jahwe amin pe mesera?