Jusup me anak Jakup singuda. Idah abang-abang Jusup maka ndauh kelengen ate bapakna man Jusup. Uga nge akapndu perasan kalak e? Cian janah segat kel ate kalak e man Jusup. Bas sada wari, iceritaken Jusup nipina man abang-abangna. Nce, iakap abang-abangna e bas sada wari pagi mungkuk kalak e nembah man Jusup bagi bas nipi e. Emaka reh segatna ate kalak e ngenen Jusup!

Bas sada wari abang-abang Jusup sangana ermakan i deher kuta Sikem. Nce, isuruh Jakup si Jusup ku ingan kalak e ermakan. Sanga idah abang-abangna Jusup nggo reh, nina kalak enda ngerana, ‘Ah nggo reh si pernipi-nipi. Eta sibunuh ia!’ Tangkap kalak e Jusup ras tamakenna ku sumur si mbages. Tapi nina Juda, ‘Kai gunana sibunuh ia? Sidayaken sajalah ia jadi budak.’ Emaka idayakan kalak e Jusup man kalak Midian si lawes ku Mesir, ergana 20 duit pirak.

Ibuat abang-abangna uis si ipake Jusup janah tamakenna dareh biri-biri ku uis e, nce iberekenna man bapakna, janah sungkunna, ‘Uis anakndu nge e?’ Emaka, iakap Jakup nggo ibunuh binatang buas si Jusup. Ceda kel ukur Jakup. La lit si banci ngapuli ia.

I bas Mesir Jusup jadi budak pejabat, si gelarna Potipar. Tapi Jusup tetap isampati Jahwe. Ngena kel ate Potipar ngidah pendahin si ilakoken Jusup ras banci ia ipenalem. Kenca si e, Jusup ipenalem guna ngurus kerina erta Potipar.

Iperdiateken diberu Potipar maka Jusup e merupa ras megegeh. Tiap wari igodana Jusup gelah medem ras ia. Kai nge si ilakoken Jusup? Itulak Jusup ia janah nina, ‘Lang! Enda salah. Kerina ibere tuan man bangku, kecuali kam, perban kam diberuna. Adi medem aku ras kam, nggo erdosa aku man Dibata!’

Bas sada wari, ipaksa diberu Potipar me Jusup medem ras ia. Itarikna uis Jusup, tapi kiam Jusup. Ikataken diberu Potipar man dilakina maka iperkosa Jusup atena ia. Situhuna e labo tuhu. Merawa kel Potipar emaka ipenjarakenna Jusup. Tapi la ilupaken Jahwe si Jusup.