Latih kel akap kalak Israel perban jadi budak denga kalak e. Isuruh Jahwe me Musa ras Harun guna mpeseh pesan enda man Paro, ‘Bere bangsaKu lawes, gelah banci isembahna Aku i padang gurun.’ Alu sombong, nina Paro, ‘La kutandai Jahwe e, janah labo kubere kalak Israel lawes.’ Reh buena ka iban Paro dahin kalak e. Emaka, ibere Jahwe persinget man Paro. Tehndu uga carana? IbanNa sepuluh tulah i Mesir. Nina Jahwe man Musa, ‘Perban la ibegiken Paro Aku. Jumpailah ia sanga erpagi-pagi sanga ia lawes ku Lau Nil. Kataken man bana, perban la iberendu umatKu lawes, Kuban me Lau Nil e jadi dareh.’ Ipatuhi Musa me Jahwe janah lawes ia ndahi Paro. Idah Paro me sanga ipekpek Musa Lau Nil e alu tongkatna janah lau e jadi dareh. Dungna lau e mbau, nurung-nurungna pe mate janah la lit lau bersih arah Lau Nil si banci man inemen. Tapi, tetap la ibere Paro kalak Israel lawes.

 Pitu wari kenca si e, isuruh Jahwe ka Musa mpeseh pesan enda man Paro, ‘Adi la iberendu umatKu lawes, Kudemi negerindu alu katak.’ Iangkat Harun me tongkatna janah dem me negeri e alu katak. Katak-katak e lit i rumah, i ingan medem, bage pe i kudin kalak e. I japa pe lit katak! Isuruh Paro si Musa gelah ipengadi Jahwe tulah e. Erjanji Paro maka iberena bangsa e lawes. Emaka ipengadi Jahwe me tulah ndai, janah nggo dem taneh Mesir alu bangke katak si ertimbun-timbun. Nggo mbau kel negeri e. Tapi, lalap nge la ibere Paro bangsa e lawes.

Nce, ikataken Jahwe man Musa, ‘Suruh Harun mekpekken tongkatna ku taneh, gelah abu i taneh e jadi rengit.’ Emaka, rempet i japa pe lit rengit. Nina piga-piga suruhen Paro man bana, ‘Dibata kap si erbanca enda.’ Tapi, tetap la ibere Paro kalak Israel lawes.