Sanga Jusup ipenjara, ernipi Paro, raja Mesir, janah sada pe la ngasup ngertikenca. Ikataken sada suruh-suruhen me man Paro maka Jusup banci ngertiken nipina e. Emaka ilebuh Paro me Jusup.

Isungkun Paro ia, ‘Banci nge ijelasken erti nipiku e?’ Nina Jusup ngaloi, ‘Pitu tahun dekahna riba-iba pangan i belang-belang Mesir, kenca bage pitu tahun dekahna kelihen. Gundari, pilihndulah sekalak si erpemeteh ras pentar guna ngurus negeri enda.’ Nina Paro, ‘Kupilih kam! Kam me kalak nomor dua si erkuasana kenca aku!’ Uga maka banci ieteh Jusup erti nipi e? Jahwe si nampati Jusup.

Lebih pitu tahun dekahna, ipepulung Jusup pangan. Terjadi me kelihen i sebelang doni bagi si ikataken Jusup. Nterem jelma si reh nukur pangan man Jusup. Ibegi bapak Jusup maka lit pangan i Mesir, emaka isuruhna sepuluh anakna nukur pangan ku je.

Sanga anak-anak Jakup ndahi Jusup, mis itandai Jusup kalak e. Tapi abang-abangna e lanai itandaina Jusup. Mungkuk kalak e man Jusup, bali bagi nipina sanga ia nguda denga. Guna meteh lit denga ntah lang ate segat bas ukur kalak e, nina Jusup man kalak e, ‘Kena pasti mata-mata. Ndarami kelemahen negeri kami enda nge ate kena ku jenda.’ Nina kalak e, ‘Lang tuan! Kami 12 kalak ersenina arah Kanaan nari. Sada nggo mate, anak si nguda ras bapak kami i kuta. Nina Jusup njawapsa, ‘Baba kena dage senina kena si nguda ndai man bangku, emaka tek aku man kena.’ Emaka mulih me kalak e ku kutana.

Kenca nggo keri pangan kalak e, isuruh Jakup ka anakna ku Mesir. Tapi sekali enda i babana Benyamin, adekna si nguda. Guna nguji abang-abangna, ibuniken Jusup cangkir pirakna i bas goni ingan gandum Benyamin, kenca e ituduhna senina-seninana e nangkosa. Sanga idat suruh-suruhen Jusup cangkir e bas goni Benyamin, sengget kel abang-abangna. Mindo kel kalak e man Jusup gelah kalak e saja si iukum, ula Benyamin.

Gundari, nggo ieteh Jusup me maka abang-abangna e nggo robah. Emaka lanai tertahan Jusup ukurna, dungna tangis ia janah nina, ‘Aku kap si Jusup adekndu. Nggeluh denga nge bapakku?’ Sengget kel abang-abangna. Tapi nina Jusup, ‘Ula isalahkenndu bandu erkiteken idayakenndu aku ku jenda. Dibata nge si erban aku ku jenda guna nelamatken kalak si nterem. Gundari mulihlah kena, baba bapakku ku jenda.’

Mulih me kalak e janah katakenna man bapakna berita si meriah, nce baba kalak e ia ku Mesir. Kenca ertahun-tahun la jumpa, dungna jumpa mulihi Jusup ras bapakna.