Lit 40 tahun dekahna Musa tading i Midian. Nggo erjabu ia janah nggo lit anakna. Bas sada wari, sanga ia mpermakani biri-birina deher Gunung Sinai, idahna kejadin si aneh. Lit sada peren duri si gara, tapi la meseng! Sanga ideheri Musa, rempet ibegina sora arah peren duri e, ‘Musa! Ola deheri ku jenda. Tangtangi selopndu, sabap kam sangana tedis i bas taneh si badia.’ Jahwe me si ngerana e erkelangken sada malekat.

Mbiar kel Musa, emaka itutupina ayona. Nina sora e, ‘Enggo Kuidah uga serana akap bangsaKu i Mesir. Emaka Kupulahi me kalak e i bas bangsa Mesir nari, janah Kutaruhken ku taneh si mehuli ras mehumur. Kam si mabai bangsaKu ndarat i bas negeri e nari.’ Pasti sengget kel Musa megisa.

Dung e isungkun Musa, nina, ‘Kai dage ningku adi sungkun bangsa e ise si ngutus aku?’ Nina Dibata, ‘Kataken, Aku Jahwe, Dibata Abraham, Dibata Isak, ras Dibata Jakup si enggo nuruh kam.’ Nce nina Musa, ‘Tapi uga adi la ibegiken kalak e aku?’ Emaka ibereken Jahwe bukti man Musa si ncidahken maka isampati Jahwe nge ia. Isuruh Jahwe gelah ibenterken Musa tongkatna ku taneh. Rempet berubah tongkat e jadi nipe! Tapi sanga itangkap Musa ikurna, mulihi ka jadi tongkat. Nina Jahwe, ‘Adi ibanndu bage i lebe-lebe bangsa Israel, enda me buktina maka Aku si ngutus kam.’

Nina Musa, ‘Aku la beluh ngerana.’ Erjanji Jahwe man bana, nina, ‘Aku pagi ngajarisa kai si man katakenndu, Harun pagi temanndu.’ Perban ieteh Musa maka Jahwe ras ia, ibabana me diberuna ras anak-anakna mulih ku Mesir.