La ndekah kenca ibegi Paro kalak Israel nggo lawes arah Mesir nari, rempet ka berubah ukurna. Isuruhna tenterana, ‘Sikapken kerina gereta perangku gelah siayaki kalak Israel ndai! Arusna la sipediat kalak e lawes.’ Iayaki Paro ras tenterana me kalak Israel.

Sanga si e, itegu Jahwe umatNa sanga ciger wari alu embun ras sanga nggo berngi alu api. Itegu-teguNa kalak e ku Lawit Merah janah isuruhNa kalak e erkemah.

Ndauh-ndauh nari idah kalak Israel Raja Paro ras tenterana si ngayaki kalak e. Seh kel biarna kalak Israel perban i lebe-lebe kalak e lawit, ipudina Paro ras tentera-tenterana, ku ja pe kalak e lanai banci kiam. Merawa-rawa kalak Israel man Musa, ‘Mate me kami i jenda, arusna itadingkenndu saja kami i Mesir.’ Tapi nina Musa, ‘Tenang kena kerina. Sinen uga kari Jahwe nelamatken kita.’ Tuhu-tuhu tek kel Musa man Jahwe, me?

Isuruh Jahwe ka kalak Israel pindah. Berngi si e, ipindahken Jahwe me embun e ku kelang-kelang kalak Israel ras Mesir. Embun e erban ingan kalak Mesir gelap. Tapi, bas ingan kalak Israel terang.

Isuruh Jahwe me Musa ngangkat tanna ku datas lawit. Nce, iban Jahwe lit angin segedang berngi e. Lawit e terbelah jadi dua, dungna lit me dalan i tengah-tengahna. Erjuta kalak Israel erbaris sanga mentas i tengah lawit e. Sanga kalak e mentas, lit lau i sebelah kanan ras i sebelah kiri kalak e.

Ikutken Paro kalak Israel masuk ku tengah-tengah lawit, nce ibahan Jahwe tentera e bingung, roda-roda geretana dungna lepas. Mbiar kel tentera e janah nina, ‘Kiam kita i jenda nari! Jahwe kap si erperang guna kalak e.’

Nina Jahwe man Musa, ‘Pepinter tanndu ku arah lawit.’ Kenca e, ersada mulihi lawit ndai. Paro ras tentera-tenterana gedap kerina.

I duru lawit e, rende kalak e kerina guna muji Jahwe, nina, “Rendelah man Jahwe, sabap enggo idatNa kemenangen si mulia. Enggo ibenterkenNa kuda ras kerina si ngersaksa ku bas lawit.” Si diberu ikut landek janah main alat musik. Meriah kel akap kalak e kerina, perban nggo bebas.