Enggo menam 40 tahun kalak Israel tading i gurun. Nggo melala kuta-kuta si megegeh sitaluken kalak e. Gundari kalak e tading i taneh Moap arah timur Lau Jordan. Kentisik nari seh me kalak e ku taneh perjanjin. Balak, eme raja Moap, mbiar ia ibuat kalak e tanehna, emaka idilona Bilham gelah reh ku Moap. Isuruhna Bilham numpahi kalak Israel.

Nina Jahwe man Bilham, ‘Ula sumpahindu kalak Israel.’ Emaka la surung Bilham lawes. Ilebuh raja Balak ia sekali nari. Sekali enda erjanji Balak mereken hadiah kai pe si ipindo Bilham. Tapi Bilham lalap la nggit. Dung e, nina Jahwe man Bilham, ‘Banci kam lawes, tapi si Kukataken ngenca banci ipesehndu.’

Inangkihi Bilham me keledena, janah berangkat ia ku ingan kalak Israel. Atena tetap numpahi kalak Israel, amin gia nggo ula nina Jahwe. Emaka lit telu kali iambati malekat Jahwe ia bas dalan. Bilham la banci idahna malekat e, tapi keledena banci. Si tangtangna iambati malekat, kiam kelede e ku juma-juma. Si peduaken, ergeser ia ku tembok, emaka kicat nahe Bilham. Si peteluken, ngadi ia tengah dalan. Tiap iambati malekat e ia, ipekpeki Bilham lalap keledena.

Kenca si petelukaliken, iban Jahwe kelede e ngerana. Nina kelede e, ‘Ngkai maka pekpekindu aku?’ Nina Bilham ngaloi, ‘Banmu aku bagi kalak motu. Adi lit pedangku nggo kubunuh ko.’ Nce nina kelede e, ‘Nggo ertahun-tahun aku ras kam, me lo pernah bage kuban?’

Kenca si e, iban Jahwe me si Bilham ngidah malekat e. Nce, nina malekat e man bana, ‘Ma nggo ilarang Jahwe kam numpahi kalak Israel.’ Nina Bilham, ‘Ue, nggo salah aku, mulih aku gundari.’ Tapi nina malekat e, ‘Banci kam lawes ku Moap, tapi si ikataken Jahwe ngenca banci ipesehndu.’

Ikutken Bilham nge petunjuk e? Kepeken lang. Lalap iusahaken Bilham numpahi kalak Israel. Tapi tiap isumpahina atena, iban Jahwe ia masu-masu kalak Israel. Dungna iserang kalak Israel me kalak Moap, janah Bilham pe mate. Arusna ibegiken Bilham min ndai Jahwe me?