Nina Jahwe man Musa, ‘Nangkihlah kam ku datas gunung, gelah Kubereken undang-undangKu si Kutulis i datas batu.’ Emaka nangkih Musa ku datas gunung janah erberngi ia i je seh 40 wari. Sanga Musa i datas gunung, itulis Jahwe Sepuluh PerentahNa i dua batu, nce iberekenNa man Musa.

Perban ndekah Musa, iakap kalak Israel nggo itadingken Musa bangsa e. Emaka nina bangsa e man Harun, ‘Arus lit peminpin kami. Banlah sada patung man sembahen kami!’ Nina Harun, ‘Nta dage emas kena.’ Icairken Harun emas e, ras ibanna sada patung anak lembu. Nce, nina kalak e, ‘Enda me Dibatanta si maba kita ndarat Mesir nari!’ Isembah kalak e patung anak lembu ndai, janah erpesta ia i je. Mejile nge akapndu perbahanen kalak e? Nggo erjanji kalak e nembah Jahwe, tapi la itepatina.

Sanga idah Jahwe si e, nina man Musa, ‘Nusurlah kam. Nggo erdosa kalak enda man bangKu, nggo isembahna dibata si deban.’ Nusur Musa ras ibabana dua batu si e.

Sanga Musa nggo ndeher ku perkemahen, ibegina sora rende. Idahna ka kalak e sangana landek-landek janah nembah patung anak lembu e. Merawa kel Musa. Kenca e, benterkenna batu si risiken perentah Jahwe janah pecah me batu e. Isungkun Musa man Harun, ‘Engkai maka kam nggit isuruh kalak e ngelakoken si lang-lang e. Nina Harun, ‘Ula kam merawa. Me nggom itehndu uga kalak e? Ban dibata nina, emaka kutama emas kalak e ku api nce jadi me patung anak lembu e!’ Arusna la banci bage iban Harun. Emaka nangkih me Musa ku datas mindo gelah iampuni Jahwe bangsa e.

Kalak si patuh man bana ngenca si iampuni Jahwe. Kai pelajaren si banci sidat arah bangsa Israel? Arusna ipatuhi kalak e Musa.