Sanga Musa i Gunung Sinai, isuruh Jahwe ia mbangun sada kemah, ingan bangsa e nembah man Jahwe. Kemah e igelari tabernakel. Kemah e banci ibaba-baba ku ja pe kalak e lawes.

Nce nina Jahwe, ‘Sumbangkenlah kai pe si banci ibere bangsa e guna mbagun tabernakel.’ Emaka isumbangken bangsa e me emas, pirak, tembaga, batu si meherga, ras perhiasen. Uis wool, lenen halus, si iban i bas kulit binatang nari, ras si debanna. Melala kel ibere kalak e seh ngasa ipengadi Musa ia. Nina Musa, ‘Enggo cukup! Ulanai babandu.’

Melala diberu bage pe dilaki si ahli mbangun tabernakel e. Janah iban Jahwe kalak e beluh erban kai pe. Lit si nggulung benang, erban uis, erban bordir. Si debanna beluh masang batu, mbentuk emas, ras ngukir kayu.

Ibangunna tabernakel e pas bagi si iperentahken Jahwe. Nce ibanna ka horden guna misahken dua ruangen, eme Ruang si Badia ras Ruang si Badiana kel. I bas Ruangen si Badiana kel itama sada peti si iban arah kayu akasia ras emas, gelarna peti perpadanen. I bas Ruang si Badia lit tiang lampu arah emas bage pe lit meja ras ingan nutung si merim-merim. I halamenna, lit baskom arah tembaga ras lit ka ingan nutung binatang persembahen. Peti perpadanen e ngingetken kalak Israel maka nggo erjanji kalak e man Jahwe. Tehndu kin kai ertina perpadanen? Eme janji si penting.

Ipilih Jahwe me Harun ras anak-anakna jadi imam i tabernakel. Arus irawatna tabernakel e janah kalak e si mpersembahken binatang. Tapi imam si mbelin Harun ngenca banci masuk ku Ruang si Badiana kel. E pe setahun sekali nge ngenca guna maba persembahen gelah iampuni dosana, dosa keluargana, bage pe dosa kalak Israel.

Tabernakel e dung setahun kenca kalak Israel nadingken Mesir. Gundari nggo lit ingan kalak e nembah Jahwe. Iban Jahwe gelah ieteh kalak Israel maka Jahwe lit i je. Iban Jahwe ka embun i datas tabernakel e. Adi kem je embun e kalak Israel pe tetap tading i je. Tapi adi naik embun e, ertina kalak Israel arus ersikap guna berangkat. Susunna kemah e nce berangkat ngikuti ku ja pe awan e lawes.