Bas sada wari, itadingken kalak Israel ka Jahwe, janah isembahna dibata palsu. Sedekah pitu tahun, itangkoi kalak Midian asuh-asuhen kalak e janah icedaina sinuan-sinuanna. Kalak Israel mbiar man kalak Midian, emaka cebuni kalak e i gua-gua ras gunung-gunung. Ertoto kalak e gelah iselamatken Jahwe. Emaka, isuruh Jahwe malekatNa njumpai dilaki si gelarna Gideon. Nina malekat e bana, ‘Ipilih Jahwe me kam jadi tenteraNa si megegeh.’ Nina Gideon ngaloi, ‘Uga aku banci nelamatken Israel? Ise kin aku enda?

Ja nari ieteh Gideon maka ia si ipilih Jahwe? Itamana mbulu biri-biri i taneh, nce nina man Jahwe, ‘Pagi erpagi-pagi, adi mbulu biri-biri e bernak iban embun tapi tanehna tetap kerah, eme buktina maka ipakeNdu aku guna nelamatken kalak Israel.’ Emaka paginna, bernak mbulu biri-biri e tapi tanehna tetap kerah! Ipindo Gideon ka gelah paginna erpagi-pagi, mbulu biri-biri e kerah janah tanehna bernak. Sanga e terjadi, tek me Gideon maka ia me si ipilih Jahwe. Emaka ipepulungna tenterana guna nerang kalak Midian.

 Ikataken Jahwe man Gideon, ‘Menang kari Kuban kalak Israel. Tapi nteremsa tenterandu e, kari akapndu kam menang perban gegehndu. Kataken man kalak e, ise si mbiar mulih saja ku rumah.’ Lit 22.000 kalak si mulih, emaka tading me 10.000 kalak. Nina Jahwe ka, ‘E pe melalasa denga. Baba kalak e ku lau janah suruh kalak e minem bas lau nari. Pilihlah kalak si minem tapi tetap erjaga-jaga.’ Emaka 300 kalak ngenca si erjaga-jaga. Amin gia sitik ngenca kalak e, erjanji Jahwe maka pasti italukenna 135.000 tentera Midian.

Bas berngi e, nina Jahwe man Gideon, ‘Gundari me waktuna nerang kalak Midian!’ Ibere Gideon man tenterana terompet, kudin taneh si galang ingan obor. Nina man kalak e, ‘Perdiateken aku ya, kai kari si kulakoken, ikuti.’ Iembus Gideon terompetna, janah pecahkenna kudin taneh e, nce iputar-putarna oborna, janah ersurak, ‘Pedang guna Jahwe ras guna Gideon!’ Nce ilakoken si 300 kalak e bagi si ilakoken Gideon. Kiamen me kalak Midian e perban biarna. Erkiteken si e, mate kalak e sibunuhen. Sekali nari, isampati Jahwe kalak Israel naluken musuhna.