Lit sekalak dilaki arah Israel nari, gelarna Elkana. Dua diberuna, Hanna ras Penina, tapi ngenan atena man Hanna. Rusur kel itokohi Penina si Hanna perban la lit anakna tapi Penina melala anakna. Tiap tahun, ibaba Elkana keluargana nembah man Jahwe ku tabernakel i Silo. Bas sada wari sanga kalak e i je, iperdiateken Elkana maka ceda kel ukur Hanna, diberu si ikelengina e. Emaka nina, ‘Ula kam ngandung Hanna. I jenda nge aku. Keleng ateku kam.’

Kenca si e, lawes Hanna ertoto sisada. La ia erngadi-ngadi ngandung sanga ipindona penampat Jahwe. Erjanji ia man Jahwe, ‘O Jahwe, adi bereNdu aku anak dilaki, erjanji aku maka kubere pagi ia ngelayani Kam seh asa ia metua.’ Imam si Mbelin, eme Eli, idahna Hanna ngandung terkesi-kesi, janah akapna Hanna mabuk. Tapi nina Hanna man bana, ‘Labo aku mabuk, Pa. Mberat kel masalahku, emaka kutotoken man Jahwe.’ Sadar me Eli maka enggo salah sangka kepe ia, janah nina, ‘Mbera ijawap Dibata totondu, ya.’ Salang me ukur Hanna sanga lawes ia jenari. Setahun kenca si e, lahir me anakna, ibanna gelarna Samuel. Pasti meriah ukur Hanna, me?

 La ilupaken Hanna janjina man Jahwe. Kenca Samuel nggo ngadi minem susu, mis ibaba Hanna ia gelah ngelayani i tabernakel. Nina man Eli, ‘Enda me anak si kupindo man Jahwe. Kubereken ia ngelayani Jahwe seh asa metua.’ Tiap tahun, Elkana ras Hanna reh ndahi Samuel janah ibaba kalak e baju baru man bana. Selain si e, ibere Jahwe ka telu anak dilaki ras dua anak diberu man Hanna.