Ngerana Jahwe man Samuel, nina, ‘Laweslah ku rumah Isai. Nggo Kupilih anakna jadi raja Israel.’ Emaka lawes me Samuel ku rumah Isai. Sanga idahna anak Isai sintua, nina bas ukurna, ‘Pasti enda si ipilih Jahwe.’ Tapi labo ia si ipilih Jahwe. Nina man Samuel, ‘Si Kunen pusuhna, labo si teridah arah darat.’

Ibaba Isai enem nari anakna njumpai Samuel. Tapi nina Samuel, ‘La lit sada pe si ipilih Jahwe. Lit denga anakndu si deban?’ Nina Isai ngaloisa, ‘Lit sada nari, Daud gelarna, ia singudana. Tapi sangana ia ermakan.’ Kenca reh Daud, nina Jahwe man Samuel, ‘Enda me kalakna!’ Emaka icucurken Samuel minak ku takal Daud, ras ipilih me ia jadi raja Israel pagi.

Kenca si e, erperang me kalak Israel ras kalak Pilisti. Kalak Pilisti lit tenterana bagi raksasa, gelarna Goliat. Tiap wari itokohi Goliat e kalak Israel. Nina, ‘Ise si pang ngelawan aku. Adi menang kam, jadi budakndu kami. Tapi adi menang aku, kena jadi budak kami.’

Abang-abang Daud ikut bas perang e, janah reh me Daud naruhken pangan kalak e. Ibegi Daud kai si ikataken Goliat emaka nina, ‘Aku si ngelawanca!’ Tapi nina Raja Saul, ‘Ngudasa denga kam.’ Nina Daud ka, ‘Isampati Jahwe nge aku.’

 Emaka ipakeken Saul man Daud baju perangna, tapi nina Daud, ‘Labo aku banci erperang make baju enda.’ Dung e, ibuat Daud kalimbawangna, eme tali si ipake mbenterken batu, nce lawes ia ku lau maler. Ipilihna lima batu kitik si kibul janah masukkenna ku tasna. Kenca e kiam Daud ndahi Goliat. Nina Goliat man Daud, ‘Iko nak, gelah kuban ko jadi pangan perik-perik ras binatang buas.’ Tapi Daud la mbiar. Nina ngaloisa, ‘Kam reh alu pedang ras tombak, tapi aku reh alu gelar Jahwe. Dibata nge si ilawanndu, labo kami. Ieteh kerina kalak me kari, maka ndauh gegehen Jahwe asangken pedang ras tombak. Pasti iban Jahwe kena talu.’

Itama Daud batu ku kalimbawangna, nce iputar-putarkenna asa gegehna. Perban isampati Jahwe ia, batu e kena ku perdempaken takal Goliat. Naktak me Goliat ku taneh, dungna mate ia. Kerina kalak Pilisti kiam perban biarna. Tek nge kam man Jahwe, bagi Daud?