Kenca Saul mate, Daud me si jadi raja. Sanga e, umur Daud nggo 30 tahun. Kenca piga-piga tahun jadi raja, bas sada berngi idahna sekalak diberu si mejile i datas rumahna nari. Dungna, ieteh Daud maka gelar diberu e Batseba janah nggo erjabu ia ras Uria, salah sada tenterana. Isuruh Daud si Batseba reh ku inganna. Kenca e, ras kalak e medem janah hamil me diberu e. Mbiar kel Daud ieteh kalak kesalahenna e, emaka itutup-tutupina. Suruhna panglimana namaken Uria i barisen si arah lebena i bas peperangen janah suruhna itadingken kalak e ia. Mate me Uria bas perang e, kenca si e iempoi Daud me Batseba.

Tapi idah Jahwe kerina perbahanen Daud e. Kai si ilakoken Jahwe? Isuruh Jahwe me nabi Natan njumpai Daud. Nina Natan man Daud, ‘Lit kalak bayak si melala biri-birina, nce lit kalak mesera sada ngenca biri-birina, janah keleng kel atena. Tapi ibuat kalak bayak e biri-biri kalak si mesera ndai.’ Kenca begi Daud, merawa kel ia, janah nina, ‘Kalak bayak e arus ibunuh!’ Nce nina Natan man Daud, ‘Kam kap kalak bayak e!’ Menyesal kel Daud, janah ngaku ia man Natan, ‘Nggo erdosa aku man Jahwe.’ Melala kel masalah bas keluarga Daud perban dosana enda. Iukum Jahwe si Daud, tapi tetap pediatNa ia nggeluh perban ia nggit ngakui salahna ras nggit inasehati.

Ibangun Daud atena rumah pertoton man Jahwe, tapi anakna nge si ipilih Jahwe guna mbangunsa, eme Salomo. Emaka isikapken Daud man Salomo bahan-bahan guna mbangun rumah pertoton e, janah nina, ‘Rumah pertoton e arus seh kel jilena. Salomo nguda denga kel, emaka kusikapken sajalah bahan-bahan bangunen e man ia.’ Melala kel sen si isumbangken Daud guna mbangun rumah pertoton. Idaramina ka tukangna. Ipepulungna emas ras pirak bage pe kayu aras arah Tirus ras Sidon nari. Sanga Daud nggo nandangi mate, iberena man Salomo petunjuk guna mbangun rumah pertoton e. Nina Daud, ‘Isuruh Jahwe aku nulis enda kerina man bandu. Isampati Jahwe nge kam. Ula kam mbiar. Bangunlah rumah pertoton e.’