Jonatan eme anak Raja Saul sintua, janah ia sekalak tentera si perpang. Nina Daud si Jonatan e teren asangken rajawali ras gegehen asangken singa. Bas sada wari, idah Jonatan lit 20 tentera kalak Pilisti i datas sada uruk. Emaka nina man si maba perlengkapen senjatana, ‘Adi lit tanda si ibereken Jahwe man banta, berarti banci siserang kalak e. Adi isuruh kalak Pilisti kita nangkih, berarti arus siserang kalak e.’ Dung e erlebuh kalak Pilisti, nina, ‘Mari nangkihken gelah erperang kita!’ Emaka nangkih kalak e duana ku datas uruk e janah italukenna tentera Pilisti.

Perban Jonatan anak Saul sintua, pasti ia pagi si nggantiken bapakna jadi raja. Tapi ieteh Jonatan maka Daud nge si ipilih Jahwe jadi raja i Israel, amin pe bage labo cian atena. Kompak kel Jonatan ras Daud. Erjanji kalak e maka sisampat-sampaten ia duana. Ibereken Jonatan uisna, pedangna, panahna, ras genditna man Daud. Eme buktina kalak e erteman.

Sanga kiam Daud arah Saul, ijumpai Jonatan ia janah nina, ‘Ula kam mbiar. Nggo ipilih Jahwe kam jadi raja. Bapakku pe ietehna nge.’ Nggit nge kam erteman ras kalak si bagi Jonatan?

Nggit Jonatan ngadapi mbue bahaya guna nampati temanna si Daud. Ietehna maka ibunuh bapakna atena Daud, emaka nina man bapakna, ‘Erdosa kam kari Pak, adi bunuhndu Daud, la kap lit salahna.’ Emaka irawai Saul si Jonatan. Piga-piga tahun kenca si e, mate me Saul ras Jonatan i bas peperangen.

Kenca mate Jonatan, idarami Daud me anak Jonatan si gelarna Mepiboset. Sanga jumpa Daud ras Mepiboset, nina, ‘Perban temanku bapakndu, aku si njaga ras si ngurus kam segedang geluhndu. Banci kam tading bas istanaku janah man ras aku.’ La pernah ilupaken Daud temanna si Jonatan.