Kenca ibunuh Daud si Goliat, iban Raja Saul me Daud jadi kepala tenterana. Terkenal kel Daud perban rusur ia menang bas perang. Sanga mulih Daud erperang, reh me diberu-diberu ngalo-ngalo ia janah landek ras rende, ‘Italuken Saul ribun kalak, ras italuken Daud puluhen ribu kalak!’ Emaka cian ate Saul man Daud, janah ibunuhna atena ia.

Beluh kel Daud main kulcapi. Bas sada wari sanga Daud main kulcapi i lebe-lebe Saul, ipantemken Saul tombakna ku Daud. Ngelak Daud, emaka leket tombak e ku dinding. Kenca e, melala cara si iban Saul guna munuh Daud. Dungna, kiam Daud ku gurun.

Ipepulung Saul 3.000 tentera janah lawes kalak e ndarami Daud. Sanga masuk Saul ku sada gua si galang, la ietehna kepeken i je Daud cebuni. Erkusik teman Daud, nina, ‘Enda me kesempatenndu munuh Saul.’ Emaka alu manjar-anjar ideheri Daud si Saul janah ipotongna ujung uisna, tapi la ieteh Saul. Kenca e salah akap Daud bana perban la iergaina raja si nggo ipilih Jahwe. La ibere Daud teman-temanna munuh Saul. Emaka ilebuhna Saul, janah ikatakenna maka lit nge kesempatenna munuh Saul, tapi la ilakokenna. Tetap denga nge segat ate Saul man Daud?

Ue, segat denga atena. Terus ayak-ayakna Daud. Bas sada berngi, alu sinik-sinik masuk me Daud ras bere-berena, Abisai, ku kemah Saul. Sanga si e, kerina sangana tunduh, bage pe Abner, panglima Saul. Nina Abisai man Daud, ‘Enda me kesempatenta! Gelah kubunuh ia.’ Nina Daud ngaloi, ‘Jahwe kari si erurusen ras Saul. Otah, sibuat saja tombak ras ingan tehna, nce lawes kita.’ Inangkihi Daud gunung si lit i deher kemah Saul. Itatapna ku teruh janah erlebuh ia, ‘Abner, ngkai maka la ilindungindu rajandu? I ja ingan teh ras tombak Saul?’ Ieteh Saul maka e sora Daud, emaka nina, ‘Banci nge bunuhndu aku tapi la bunuhndu. Kuteh nge maka kam me raja si ipilih Jahwe.’ Mulih me Saul ku istanana. Tapi lit denga keluarga Saul si la atena segat man Daud.