Kerajan Israel si sepuluh suku nggo italuken Sanherip, Raja Assur. Nce, iserangna ka atena kerajan Juda si dua suku. Sada per sada italukenna kuta-kuta si lit i Juda. Tapi si utamana atena iserangna eme Jerusalem. La ieteh Sanherip maka Jerusalem e ilindungi Jahwe.

Raja Juda eme Hiskia, nggo mereken melala sen man Sanherip gelah ula iserangna Jerusalem. Nggo ialoken Sanherip sen e, tapi tetap denga ikirimna tenterana nerang Jerusalem. Mbiar kel kalak si tading i Jerusalem perban tentera Assur nggo reh deherna. Emaka nina Hiskia man kalak e, ‘Ula kam mbiar. Amin pe megegeh kalak Assur e, banci nge iban Jahwe kita gegehen asangken kalak e.’

Iutus Sanherip si Rabsake ku Jerusalem guna nokoh-nokohi kalak e. Kenca seh Rabsake i deher kuta, serko ia, ‘Labo banci isampati Jahwe kena. Ula kena nggit itipu Hiskia. La lit dibata si ngasup nelamatken kena arah kami.’

Emaka ipindo Hiskia petunjuk man Jahwe. Nina Jahwe man bana, ‘Ula kam mbiar man kai si ikataken Rabsake. Labo banci italuken Sanherip kuta Jerusalem.’ Kenca e, ikirim Sanherip surat man Hiskia. Nina bas surat e, ‘Nyerah sajalah kena. Labo banci iselamatken Jahwe kena.’ Emaka ertoto me Hiskia, ‘O Jahwe, selamatken min kami, gelah ieteh kerina kalak maka Kam ngenca Dibata si benar.’ Nina Jahwe man Hiskia, ‘Kulindungi nge Jerusalem. Labo Kupediat raja Assur masuk ku bas kutaKu.’

Tek kel Sanherip maka banci nge italukenna Jerusalem. Tapi bas sada berngi, isuruh Jahwe sada malekatNa ku ingan tentera-tentera Assur erkemah. Ibunuh malekat e me 185.000 tentera Assur! Mate me kerina tentera-tentera Sanherip si megegeh e. Perban nggo talu Raja Sanherip, mulih me ia ku kutana. Bagi si nggo ijanjiken Jahwe, ilindungiNa Hiskia bage pe Jerusalem. Adi bas Jerusalem kam sanga si e, tek nge kam man Jahwe?