Lit anak Isebel si diberu, gelarna Atalia, ia pe jahat seri bagi nandena. Atalia erjabu ras Juda. Kenca mate dilakina, anakna si jadi raja. Tapi sanga anakna e mate, ibanna dirina jadi si merentah i Juda. Kenca si e, ibunuhna kerina si lit hakna jadi raja i bas keluargana, janah kerina si banci nggantiken ia pasti ibunuhna, kempuna pe ibunuhna. Kerina kalak mbiar man diberu e.

Ieteh Joyada ras diberuna, Jehoseba, kerina perbahanen Atalia si seh kel jahatna e. Amin pe erbahaya tapi ibunikenna sada kempu Atalia si gelarna Joas. I rumah pertoton me ia galang.

Sanga umur Joas nggo pitu tahun, idilo Joyada kerina peminpin ras kalak Lewi janah nina man kalak e, ‘Jagai pintu rumah pertoton, ula bere ise pe masuk.’ Kenca e, itangkuhken Joyada me Joas jadi raja i Juda janah itamana mahkota i takalna. Kerina kalak i Juda ersurak, ‘Mejuah-juahlah kam, Raja!’

Ibegi Ratu Atalia sora si megang e janah kiam ia ku rumah pertoton. Sanga idahna raja si mbaru e, serko ia nina, ‘Penghianat! Penghianat!’ Itangkap pengawal me ratu si jahat e, ibabana lawes janah ibunuhna. Tapi nggo sempat ikutken bangsa e perbahanen diberu si jahat e. Dung e, kai si terjadi?

Isampati Joyada bangsa e gelah erban janji man Jahwe. Kalak e erjanji maka Jahwe ngenca si isembahna. Iruntuhken Joyada rumah pertoton man Baal ras patung-patung seh ngasa per-per. Ipilihna imam-imam ras kalak Lewi si erdahin i rumah pertoton gelah kerina kalak banci ka nembah Jahwe. Itugaskenna ka penjaga i gerbang rumah pertoton gelah kalak si najis la banci masuk. Kenca si e, Joyada ras peminpin-peminpin maba Joas ku istana raja janah isuruhna ia kundul bas tahtana. Meriah kel ukur kalak si tading i Juda. Nggo banci kalak e nembah Jahwe perban lanai lit Atalia si jahat bage penembahen Baal. Tehndu nge, banci Joyada nampati kalak si deban perban ia perpang.