I bas Assur lit sada kuta gelarna Niniwe. Kalak si tading i je jahat-jahat kerina. Isuruh Jahwe nabi Juna lawes ku Niniwe, janah isuruhNa kalak e gelah robah. Tapi la ikutken Juna kai nina Jahwe, lawes ia ku ingan si deban. Inangkihina kapal si lawes ku Tarsis, labo ku Niniwe.

Sanga kapal e i tengah laut, reh me angin badai si meter, janah mbiar kel kalak si ertugas i kapal e. Ertoto kalak e man dibatana, ‘Engkai maka enda terjadi?’ Dungna ngaku Juna, ‘Salahku nge enda. La kuikutken kai si ikataken Jahwe. Ambekken saja aku ku laut, gelah ngadi badai e.’ Tantangna kalak e la nggit ngambekken Juna ku laut. Tapi perban terus ipaksa Juna, dungna, iambekken kalak e me Juna ku laut. Nce, ngadi badai e.

Iakap Juna mate nge kari ia. Sanga reh gedapna ia ku lau, ertoto ia man Jahwe. Kenca si e, ikirim Jahwe nurung si galang. Ibendutna Juna, tapi tetap denga ia nggeluh i bas beltek nurung e. Nce, ertoto Juna, ‘Erjanji aku, patuh aku lalap man baNdu.’ Lit telu wari dekahna ilindungi Jahwe Juna i bas beltek nurung e. Dungna, isuruh Jahwe nurung e ngutahken Juna ku daraten.

Kenca iselamatken Jahwe si Juna, isuruh denga nge ia ku Niniwe? Ue. Isuruh Jahwe ka Juna lawes ku Niniwe. Sekali enda, patuh Juna. Sanga seh ia i je ikatakenna man kerina kalak jahat si tading i je, ‘Empat puluh wari nari, ihancurken me kuta Niniwe!’ Kepeken, kenca ibegi kalak e kai si ikataken Juna, robah kalak e. Ikataken raja Niniwe man rayatna, ‘Ertotolah kena man Dibata ras robahlah kena. Mbera-mbera la ibunuhNa kita.’ Perban robah kalak e, la surung ihancurken Jahwe kuta Niniwe.

Merawa Juna perban kuta e la surung ihancurken. Cuba min ukurindu: Jahwe sabar ras mekuah ateNa man Juna, tapi Juna la atena mekuah man kalak Niniwe. Dung e, lawes Juna ku darat kuta e janah kundul ia teruh batang gundur, nce jungut-jungut ia i je. Kenca e, mate me batang gundur e, janah merawa ka Juna. Emaka nina Jahwe man bana, ‘Batang gundur e keleng atendu, tapi kalak Niniwe lang. Perban mekuah nge ateKu kalak e maka la surung Kuukum.’ Kai pelajarenna man banta? Ergan kalak Niniwe asangken sinuan-sinuan.