I kuta Siria, tading me anak diberu si kitik denga, ia kalak Israel. Ia iculik tentera Siria arah keluargana nari, nce jadi pelayan man diberu Panglima Siria me ia. Panglima e gelarna Naaman. Amin gia kalak si tading i je la nembah Jahwe, tapi anak diberu si kitik e tetap nembah Jahwe.

Naaman lit penakit kulitna si mekelek, janah mesui kel akapna. Merhat kel anak diberu e nampati ia. Emaka nina man diberu Naaman, ‘Lit kueteh si banci nambari dilakindu. I bas Israel, lit sekalak nabi Jahwe gelarna Elisa, banci itambarina dilakindu.’

Ikataken diberu Naaman man Naaman kai si ikataken anak diberu e. Nggit Naaman ngelakoken kai pe, emaka lawes me ia ku rumah Elisa i Israel. Akap Naaman ia ialo-alo bagi kalak penting. Tapi sanga ia seh, labo Elisa si njumpai ia, tapi pelayan Elisa. Janah, ikatakenna man Naaman, ‘To lawes kam ku Lau Jordan janah ridi kam pitu kali i je. Dung e kari, malem nge kam.’

Kecewa kel Naaman. Emaka nina, ‘Kuakap itambarina aku alu ngelebuh Dibatana, nce ibanna tanna i datas takalku. Kepeken, isuruhna aku ridi i lau bas Israel. Bas Siria gia me lit nge lau si terjilen. Engkai maka la ku jah saja aku suruhna?’ Merawa ate Naaman emaka lawes ia arah rumah Elisa nari.

Emaka itami-tami pelayan-pelayanna me Naaman gelah ula ia emosi, nina, ‘Tapi, Pa, nindu kai pe ilakokenndu gelah malem. Si ikataken nabi e me labo mesera ngelakokenca. Engkai maka la ikutkenndu saja?’ Ibegiken Naaman si ikataken pelayanna e. Emaka lawes ia ku Lau Jordan janah ridi ia pitu kali i je. Sanga nggo pitu kali ia ridi, ndarat ia i bas lau nari janah malem me penakitna. Meriah kel ukurna, emaka ijumpaina Elisa guna ngataken bujur. Nina man Elisa, ‘Nggo kueteh maka Jahwe me Dibata si benar.’ Menurutndu uga nge perasan anak diberu e sanga idahna Naaman nggo sehat?