Man Teman-Teman Kami, Umat Jahwe:

Selaku umat Dibata keleng ate kami Kata Dibata bas Pustaka. Tek kami man cerita si lit i je, tek kami man nasehatna. Tek kami maka keleng ate Jahwe man manusia bagi si ikataken Pustaka. (Masmur 119:105; Lukas 1:3; 1 Johanes 4:19) Merhat kel kami nampati kalak gelah tehna kebenaren bas Kata Dibata e. Emaka, meriah ukur kami nikapken buku enda, Pustaka—Gunana man Bandu. Lit ate kami si iceritaken kami kerna buku enda.

Tujun buku enda isikapken eme guna nampati anak-anak. Amin pe bage, buku enda banci ka nampati si nggo dewasa, si atena erlajar kerna cerita Pustaka. Emaka, ise pe banci datken manpaat arah buku enda, perban kerina nge banci mbaca Pustaka. Pasti meriah kel ukurta meteh isi Pustaka.

Buku enda nceritaken kerna kai si ikataken Pustaka mulai sanga iciptaken Dibata manusia si pertama. Iusahaken kami kel gelah cerita Pustaka e tuhu-tuhu jelas ras nukah ngangkaisa janah cocok ras sejarah.

Tapi, labo kejadin si lit i bas Pustaka ngenca si ijelasken bas buku enda. Tulisenna ras gambarna nggo isikapken kami gelah nampati kita mbayangken kejadinna ras banci sigejapken uga perasan kalak si iceritaken i je.

Buku enda mperjelas maka Pustaka e situhuna buku kerna manusia si patuh man Jahwe ras si ngelawan Jahwe. Tujun buku enda eme nampati kita gelah banci erlajar arah kejadin si  iceritaken i je. (Roma 15:4; 1 Korinti 10:6) Buku enda ibagi jadi 14 bagin. Tiap baginna, lit ringkasen pelajarenna.

Adi kam orang tua, banci ibacandu buku e radu ras anakndu janah ceritaken erti gambarna. Banci ka ijelaskenndu gelah ingetna kai pelajarenna. Cara enda pe banci ka ipake man si nggo dewasa si sangana erlajar Pustaka.

Mbera-mbera buku enda banci nampati kalak si metua ntah pe si nguda si tutus atena erlajar, gelah angkaina Kata Dibata ras idalankenna. Alu bage, banci kalak e nembah Jahwe radu ras umatNa.