1. Kai asilna adi kam ’ngerembakken dirindu ku Dibata’?

JAHWE ngkelengi kalak si ngelayani Ia. Adi kam nembah Jahwe, kam pasti ipasu-pasuNa gundari bage pe i bas wari si pepagi. Pustaka si Badia ngatakenca, ”Rembakkenlah dirindu ku Dibata e maka Ia pe ngerembakken diriNa man bandu.”​—Jakup 4:8.

2. Kai arus silakoken gelah banci rembak ras Dibata, janah uga enda erpengaruh ku pertotonta?

² Guna ngerembakken diri ku Dibata, kam arus mpelajari ras ndalanken Kata-Na. Adi pertotonndu sentudu ras peraten Jahwe, pasti ibegiNa ras ijabapNa. Rasul Johanes nuratken, ”La kita mbiar i bas adep-adepen Dibata sabap ibegikenNa kita adi sipindo man BaNa kai si sentudu ras PeratenNa. IbegikenNa kita katawari pe adi kita mindo man BaNa; erkiteken sieteh maka enda tuhu me, sieteh pe maka iberekenNa man banta kai si ipindo kita i bas Ia nari.”​—1 Johanes 5:14, 15.

3-7. Uga carana kita banci ndatken kepentaren arah Dibata, janah kai gunana man banta?

³ Selain e, adi kam ngerembakken diri ku Dibata pasti kam ibereNa kepentaren guna ndungi masalah i bas kegeluhenndu. Pustaka si Badia ngatakenca, ”Adi lit i bas kam si kurang kepentarenna, ertotolah ia man Dibata si mereken kepentaren man bandu.”​—Jakup 1:5.

⁴ Uga kepentaren arah Dibata banci nampati kam? Salah sadana, enda banci nampati kam meteh kai si la ngena ate Jahwe. Kam pe banci meteh engkai maka e salah janah uga carana gelah kam banci mpedauhsa. Pemeteh e banci ngkawali kam arah melala perbeben si terjadi nandangi jelma si enterem. Misalna, perban patuh man pedah Dibata guna tetap bersih i bas lagu langkah, umat Dibata banci pulah arah perbeben erkiteken hamil sope erjabu, penakit si langket arah hubungen seks, ras perjabun si la ermeriah ukur ntah pe si rontang.

⁵ Kai ka gunana kepentaren arah Dibata? Enda banci nampati kam ndalani kegeluhen si mehulina kal. Kam banci erban keputusen si mehuli i bas kegeluhen tep-tep wari, misalna i bas cara nggunaken sen. Kam banci ngayaki sura-sura si erguna ras nulak sura-sura si kentisik ngenca gunana.

⁶ Kepentaren arah Dibata banci ka nampati kam ndatken hubungen si mehuli ras jelma si deban. Kam banci ndalani kegeluhen keluarga si lebih ermeriah ukur. Kam banci mbangun pertemanen si tuhu-tuhu si tahan ndekah, janah kam pe iergai kalak si deban, bage pe kalak si la ngelayani Dibata.

⁷ Selain si e, alu ndatken kepentaren arah Dibata, kam lebih ngergai kegeluhen ras ndalanisa alu lebih mehuli. Kepentaren e banci nampati kam ndungi kesuliten ras ngapuli paksa kam kecewa. Janah kam banci natap wari si pepagi alu lebih positif ras seimbang. Asilna kam lebih sehat secara daging ras perukuren.​—Kuan-kuanen 14:30; Jesaya 48:17.

8. Adi kam ngelayani Dibata, kam ibebasken arah kebiaren nandangi kai?

⁸ Adi kam ngelayani Dibata si benar, kam pasti bebas arah kebiaren si erban gulut ukur kalak si la ngelayani Ia. Perban ietehndu maka kalak mate la banci erban kai pe, kam la mbiar kempak ia. Perban kam tek kerna janji Dibata guna mpekeke kalak mate, kam la mbiar mate. Janah, perban ietehndu maka Dibata e si mbelinna kuasana, kam pe la mbiar nandangi sihir ntah pe kinigurun.​—Johanes 8:32.

9-11. Ise pagi si nggeluh i Pardis, ras ise si lang?

⁹ Adi kam ngerembakken diri ku Dibata, kam la perlu mbiar kerna wari si pepagi. Sieteh maka masalah-masalah si terjadi gundari enggo inubuatken Pustaka si Badia. Jahwe mpebetehken man banta maka enda kentisik ngenca; Kinirajan Dibata pasti ngobah doni enda jadi pardis.​—Lukas 21:10, 11, 31; 23:43.

¹⁰ Kalak si rembak ras Jahwe dingen si ngelayani Ia saja si nggeluh pagi i pardis. Pustaka si Badia ngatakenca, ”Kalak jahat pedas me lesap, adi idarami, lanai ia lit i japa pe. Kalak si meteruk rukur ndatken taneh e, inanamina kedamen ras kesenangen.”​—Masmur 37:10, 11.

¹¹ Kerina kalak si lalap mekeng ras si la patuh nandangi hukum Dibata la banci ndatken kegeluhen si rasa lalap. (2 Tesalonika 1:8, 9) Kalak enda lanai pagi lit. Kalak e bage pe Setan ras begu-beguna pasti kernep. (Ketangkasen 20:10, 14) Tapi, kalak si erlajar kerna Jahwe dingen ngelayani Ia ngenanami keriahen ukur si luar biasa i bas Pardis i doni.

12. Kai nina Pustaka si Badia kerna wari si pepagi?

¹² Jahwe enggo nikapken melala pemere si seh kal ulina man kalak si engkelengi Ia! Perdiateken kai nina Pustaka si Badia kerna kegeluhen i bas Pardis i doni:

• Mbue pangan: ”Mbuahlah page [ntah pe, mbue pangan] i belang-belang negeri, uruk-uruk dem alu ulih juma.”​—Masmur 72:16.

• Lit rumah si metunggung: ”Ipajekken bangsangKu pagi rumah janah ia nge ngiani rumah e, labo kalak si deban.”​—Jesaya 65:21.

• Pendahin si erban ukur meriah: ”Kasa kai ulihna latih tuhu-tuhu kal inanamina. Kelatihenna la sia-sia.”​—Jesaya 65:22, 23.

• Lanai lit penakit: ”Lanai pagi lit si sakit ringan i bas negerinta.”​—Jesaya 33:24.

• Lanai lit kalak si cacat: ”E maka kalak pentang erpengidah pagi, kalak pasek erpemegi. Kalak cempang lompat-lompat desken belkih, kalak si la beluh ngerana ersurak-surak alu meriah.”​—Jesaya 35:5, 6.

• Lanai lit pagi kiniseran, ceda ate, kematen: ”Iapusi Dibata me kerina iluh anak-anakNa e. Lanai pagi lit kematen, ceda ate, tangis ntah pe si mesui. Sabap si pemena enggo lepas.”​—Ketangkasen 21:4.

• Lanai lit perang: ”Ipengadi [Dibata] perang i belang-belang doni enda.”​—Masmur 46:10.

• Nggeluh si rasa lalap: ”Kalak bujur me si ndatken bagin taneh i bas negeri e, janah ringan ia i je rasa lalap.”​—Masmur 37:29.

13. Ise ngenca si banci erban doni jadi pardis? Engkai?

¹³ Manusia la pernah banci erban enda kerina terjadi, tapi Jahwe lit kuasana guna erban kerina sura-suraNa terjadi. La lit kai pe si banci mpengadi Ia. Pustaka si Badia ngatakenca, ”Sabap la lit si metahat i bas Dibata.”​—Lukas 1:37.

14. Uga carana kam banci bengket i bas dalan si nuju ku kegeluhen si rasa lalap?

¹⁴ Erkelangken Saksi-Saksi-Na, Jahwe mereken kesempaten man kalak guna ’bengket arah dalan si kitik’ ras ndalani dalan si nuju ku kegeluhen si rasa lalap. Mbelin arapen kami gelah kam ikut jadi bagin i bas kalak si ermeriah ukur si ngaloken undangen e. Mbelin arapen kami, kam ndalanken agama si benar ras ngenanami pasu-pasu Jahwe seh rasa lalap!​—Matius 7:13, 14.