1, 2. Kai si iteki melala jelma kerna kalak si nggo mate?

JUTAN jelma tek kematen labo pendungi kegeluhen, tapi perpindahen saja ku alam si deban. Melala kalak erpengakap nini-ninina si nggo mate pindah arah doni enda ku ingan si la teridah, i bas doni ingan manusia nari ku alam roh.

² Melala kalak tek maka nini-nini si nggo mate banci mereken keselamaten ras rejeki man keluargana i doni. Menurut kalak enda, tendi nini-nini e banci jadi teman si megegeh, si ngasup mereken peranin si mehuli, kesangapen, janah ngkalawali arah bahaya. Adi la iperdiateken ntah pe kitik iban ukurna, nini-nini enda banci ngerehken mara, bagi penakit, kemusilen, ras kiniseran.

3. Kai si iban piga-piga kalak guna nembah nini-nini si nggo mate?

³ Kalak si nggeluh erban kerja adat ras upacara guna njaga hubungen si mehuli ras nini-nini si nggo mate. Kebiasan-kebiasan enda khususna teridah jelas i bas acara sope ras paksa penguburen, contohna, njaga ras nggendangi kalak mate ntah pe kerja ngangkat tulan-tulan. Penembahen man nini-nini teridah ka i bas cara si deban. Contohna, ope denga man pangan ntah inemen si entabeh, piga-piga kalak nerapkenca guna icibalken.

4. Kai si iteki melala jelma kerna tendi?

⁴ Lit ka si tek manusia e tendina la banci mate, si tetap nggeluh kenca kula mate. Nina, adi mehuli perbahanenna tendina lawes ku surga ntah ku pardis, tapi adi lang tendina isiksa. Ajaren enda megati enggo ipersada ku kebiasan ntah pe kiniteken jelma si nterem. Contohna, momo berita ceda ate megati ngataken: ’Enggo idilo Dibata’, ntah ’Enggo mulih ku rumah Bapa’. Kerina kiniteken enda erpalasken ajaren maka tendi e tetap nggeluh kenca kula mate. Kai nina Pustaka si Badia kerna si e?

5, 6. Kai kin tendi e menurut Pustaka si Badia?

⁵ Enterem kalak erpengakap tendi eme biak si nggeluh si lit i bas manusia. I bas Pustaka si Badia, ”tendi” megati iterjemahken ”jiwa” ku cakap Indonesia. ”Kesah” megati iterjemahken ”roh”. Pustaka si Badia ncidahken maka tendi labo biak si nggeluh si lit i bas jelma; tendi eme jelma e sendiri. Paksa nepa nininta Adam, Dibata Jahwe labo mereken man Adam sada tendi, tapi kesah kegeluhen, emaka ’nggeluh me jelma [tendi, NW] ndai’. Adam e me tendi, manusia seutuhna.​—Kejadin 2:7.

⁶ Erkiteken si e, Pustaka si Badia ngatakenca maka tendi banci keke guna ngelakoken sada dahin. (Masmur 57:9) Tendi banci ersurak. (Jesaya 61:10) Piga-piga Pustaka si Badia nerjemahken kata i bas cakap aslina jadi ”tendi” i bas ayat-ayat e. Terjemahen Pustaka si Badia si deban lit ka si nerjemahkenca alu nggunaken kata ”biak si nggeluh”, ”kalak”, ”aku” ntah pe ”jelma”. Kerina seri ertina. Misalna, tendi banci man. (Imamat 7:20) Banci puasa. (Masmur 35:13) Banci ngandung.​—Jeremia 13:17.

7. Turiken ayat-ayat i bas Pustaka si Badia si ncidahken maka tendi banci mate.

⁷ Erkiteken tendi eme jelma e sendiri, paksa jelma mate tendina lanai lit. Esekiel 18:4 ngatakenca, ”Ise erdosa, ia me mate.” Bage ka pe, Perbahanen Rasul-rasul 3:23 ngatakenca, ”Ise [jelma] si la megiken kata nabi e ipeserap pagi i bas bangsa Dibata nari janah iukum.” Emaka, tendi labo sada biak si tetap nggeluh paksa kula mate.

8. Kai kin kesah si lit i bas kula manusia?

⁸ Kesah labo seri ras tendi. I bas kula manusia, kesah eme gegeh kegeluhen si erban manusia banci ngelakoken dahin i bas geluhna. Kesah e bagi listrik. Listrik banci mpegeluh lampu erban terang, banci erban kipas angin erputar, janah kulkas erban mbergeh. Bage ka pe, kesah banci erban kita ngenehen, megi, ras rukur. Tapi, kesah la banci ngelakoken kai pe adi la lit mata, cuping, ntah pe otak. Eme sabapna, kerna manusia, Pustaka si Badia ngatakenca, ”Kune mate ia, mulihken ia ku taneh, i bas wari si e kerina sura-surana peltep.”​—Masmur 146:4.

9. Kai si terjadi nandangi tendi ras kesah paksa manusia mate?

⁹ Eme sabapna, menurut Pustaka si Badia, tendi ntah pe kesah labo nadingken kula guna terus nggeluh i bas alam roh paksa manusia mate.

10. Kai si ikataken Pustaka si Badia kerna keadan kalak si enggo mate?

¹⁰ Adi bage, uga keadan kalak mate? Perban Jahwe si nepa manusia, emaka ietehNa kai si terjadi sanga kita mate. KataNa ngajarken maka kalak mate lanai nggeluh, la banci megi, ngenehen, ngerana ntah pe rukur. Pustaka si Badia ngatakenca,

• ”Kalak si enggo mate . . . kai pe lanai itehna.”​—Pengerana 9:5.

• ”Kekelengenna, pernembeh atena, pusuhna si mecimberu kerina mate radu ras ia.”​—Pengerana 9:6.

• ”Sabap denggo lanai bo lit dahin, ntah pe perukuren. I bas doni kematen lanai bo lit pemeteh ntah pe kepentaren, janah ku jah me perlawesndu.”​—Pengerana 9:10.

11. Kenca Adam erdosa, kai nina Jahwe man bana?

¹¹ Cuba ukurindu kai nina Pustaka si Badia kerna nininta si pemena, Adam. Jahwe njadiken Adam i bas ”abu taneh” nari. (Kejadin 2:7) Adi Adam patuh man peraturen Jahwe, ia banci nggeluh ermeriah ukur rasa lalap i doni. Tapi, Adam la patuh, ukumenna kematen. Ku ja Adam kenca ia mate? Nina Dibata man bana, ”I bas taneh nari kam ijadiken, janah jadi taneh ka kam mulihken.”​—Kejadin 3:19.

12. Kai si terjadi man Adam paksa ia mate?

¹² I ja Adam ope itepa Jahwe arah taneh nari? La ia lit i japa pe. Adam lenga lit. Jadi, paksa Jahwe ngataken man Adam, ”jadi taneh ka kam mulihken”, maksudNa Adam lanai nggeluh, bali bagi taneh. Adam la nggeluh i bas alam roh. Adam la ’lawes’ ku alam si deban. Labo ia lawes ku surga ntah pe ku ingan siksan. Ia mulihi ku keadan la nggeluh; ia lanai lit.

13. Kai si terjadi paksa manusia ras rubia-rubia mate?

¹³ Tuhu kin keadan si bage terjadi man kerina kalak si enggo mate? Tuhu. Nina Pustaka si Badia, ”Kai si jadi man rubia-rubia e ka nge jadi man manusia . . . Labo lit lainna ingan si itujuna, eme abu. Asalna i bas abu nari janah mulihken ka nge ia ku abu.”​—Pengerana 3:19, 20.

14. Kai nge si terjadi pagi man kalak si enggo mate?

¹⁴ Pustaka si Badia erjanji maka Dibata mpekeke kalak si enggo mate guna nggeluh i bas doni si jadi pardis. (Johanes 5:28, 29; Perbahanen Rasul-rasul 24:15) Tapi, e terjadi i bas wari si pepagi. Gundari, kalak e medem denga i bas kematen. (Johanes 11:11-14) Kita la perlu mbiar ntah pe nembah man bana, perban ia la banci nampati ntah pe ngerehken bahaya.

15, 16. Uga cara Setan erban kalak tek maka kalak mate e lit denga?

¹⁵ Ajaren maka kalak si enggo mate nggeluh denga eme sada guak si imbarken Setan. Gelah manusia tek nandangi guak enda, ia ras begu-beguna erupaya gelah manusia erpengakap maka penakit ras masalah si deban rehna arah roh-roh kalak si enggo mate. Situhuna piga-piga perbeben begu-begu si erbanca, janah lit ka si lang. Tapi si pastina, labo tuhu kalak mate banci ngerehken cilaka man banta.

¹⁶ Tapi, lit cara si deban si igunaken begu-begu gelahna kalak erpengakap maka ajaren Pustaka si Badia kerna kematen labo tuhu. Begu-begu erban tipun, piga-piga kalak ibanna tempa-tempa ngenehen ntah pe ngerana ras kalak si enggo mate. Enda ilakokenna alu pengenehenen, nipi, kinigurun, ntah pe alu cara si deban. Tapi, situhuna si ijumpai kalak enda labo kalak si enggo mate. Begu-begu e nge si ipekulah-kulahna bana jadi kalak si enggo mate. Eme alasenna engkai maka Jahwe numpahi guru si baso ras ise pe si nungkun man kalak si enggo mate.​—Ulangen 18:10-12; Sakaria 10:2.