1. Uga carana gelah mehuli hubungenta ras Dibata?

GELAH mehuli hubungenta ras Dibata, ola sitik pe kita terlibat i bas agama palsu. Kita harus ndalanken agama si benar. Gundari, jutan kalak i belang-belang doni paksana ngelakokenca.

2. I bas piga negeri nge Saksi-Saksi Jahwe lit, janah kai si ilakokenna?

² Bagi si enggo inubuatken Pustaka si Badia, kerina kalak si ndalanken agama si benar jadi bagin i bas ”kalak si nterem” si rehna arah ”kerina bangsa, suku, negara, ras i bas kerina cakap nari”. (Ketangkasen 7:9) I bas lebih 235 negeri, jutan Saksi-Saksi Jahwe nampati kalak mpelajari dalan-dalan Jahwe si erpalasken kekelengen ras kai si ipindona man banta.

3. Ise nge si isembah Saksi-Saksi Jahwe, janah kai si la ilakoken kalak enda?

³ Saksi-Saksi Jahwe ngakui maka Jahwe ngenca si patut isembah. Kalak e la nggit nembah mungkuk i lebe-lebe patung ntah pe lambang-lambang agama. (1 Johanes 5:21) Kalak e la ikut i bas nggendangi kalak mate ntah pe upacara si deban si ndukung ajaren agama palsu ras ”pengajaren setan-setan”. (1 Timotius 4:1) Tapi, kalak enda ngapuli kalak si erceda ate, alu njelasken janji Dibata kerna kinikeken kalak mate i bas pardis i doni.​—Johanes 5:28, 29; Perbahanen Rasul-rasul 24:15.

4. Uga pendapat ras tindaken umat Dibata kerna kinigurun?

⁴ Saksi-Saksi sitik pe la muat bagin i bas kinigurun, sihir, ntah pe guru si baso, sabap kalak e meteh kerina e rehna i bas Iblis nari. Kalak e la ernalem man kinigurun guna jadi perlindungenna, ia tek man Jahwe saja.​—Kuan-kuanen 18:10.

5. Kai buktina Saksi-Saksi Jahwe ”labo sikerajangen doni”?

⁵ Nina Jesus, ajar-ajarna ”labo sikerajangen doni”. (Johanes 17:16) Paksa i doni Jesus la nggit ikut bas politik. (Johanes 6:15) Saksi-Saksi pe la muat bagin i bas politik, semangat kebangsan bage pe perjuangen erbage golongen i doni enda. Tapi, kalak e nggalar pajak ras matuhi hukum i bas negeri inganna tading.​—Johanes 15:19; Roma 13:1, 7.

6. Petunjuk kai si niikuti juak-juak Dibata kerna perjabun ras kesirangen?

⁶ Perban matuhi peraturen pemerentah, Saksi-Saksi Jahwe ncatatken perjabunna secara hukum. (Titus 3:1) Erkiteken ngikuti petunjuk Dibata, kalak e la erkidua ntah pe erpoligami. (1 Timotius 3:2) Perban ndalanken perentah Pustaka si Badia, la piga. Perjabun juak-juak Dibata idungi alu kesirangen.

7. Uga carana Saksi-Saksi Jahwe sikeleng-kelengen?

⁷ Saksi-Saksi sikeleng-kelengen. Kekelengen enda ras kekelengen nandangi Dibata mpersada kalak enda i bas perkade-kaden si tuhu-tuhu, amina gia kalak e rehna arah melala suku ras bangsa. Paksa terjadi mara ntah pe kesuliten si mekelek, Saksi-Saksi sisampat-sampaten. Kalak enda ncidahken kekelengenna tep-tep wari.​—Johanes 13:35.

8. Perbahanen la mehuli kai saja si la ilakoken umat Dibata?

⁸ Umat Jahwe ngusahaken diri gelah banci nggeluh alu mehuli. Kalak enda la nangko, erbual, erlua-lua, mabuk, janah la erban usaha ntah pe bisnis alu cara si la bujur. Perbulangen la nggit mekpek ntah kasar man ndeharana. Ope denga jadi Saksi Jahwe, piga-piga ngelakoken si bage rupana, tapi perban penampat Jahwe kalak enda lanai ngelakokenca. I bas mata Dibata, ia nggo ”ibersihken”.​—1 Korinti 6:9-11.

9. Kai si ikataken sada buku kerna gereja-gereja i Afrika?

⁹ Payo, melala agama ngaku maka ia benar. Banci saja icidahkenna alu perbahanen-perbahanen si hebat guna ndukung pengakunna e. Contohna, nina sada buku si njelasken kerna gereja-geraja i Afrika, ”Si nggunaken ilmu sihir ras si jadi guru si baso enggo buen ilakoken [terpuk Kristen si mbaru] . . . Kalak enda ngaku erkuasa erban tanda sengget. Nabi-nabina mereken pengenehenen ras ngertiken nipi. Janah nggunaken minak ras lau si malem-malem, abu, lilin ras rempah-rempah si itutung gelah ula sakit, ntah pe guna mpepalem penakit.”

10, 11. Engkai maka agama si erban tanda sengget gundari enda lenga bo tentu rehna arah Dibata nari?

¹⁰ Anggota agama-agama enda ngaku maka tanda sengget si ibahanna e mbuktiken agamana ipasu-pasu Dibata. Tapi, tanda sengget si ikatakenna e labo mbuktiken sada agama ngena ate Jahwe. Iblis mereken kuasa kempak piga-piga kalak si ndalanken agama palsu guna ngelakoken ’kuasana’. (2 Tesalonika 2:9) Janah pe, Pustaka si Badia ernubuat maka kiningasupen si luar biasa si rehna arah Dibata nari, misalna ernubuat, ngerana i bas erbage-bage cakap kesah, ras pemeteh si khusus, ”masap”.​—1 Korinti 13:8.

¹¹ Jesus mpersingeti, ”Labo kerina kalak si erlebuh man bangKu, ’O Tuhan, Tuhan!’ bengket ku bas Kinirajan Surga, tapi kalak si ngelakoken rikutken si ngena ate bapangKu i Surga nge bengket ku bas Kinirajan e. I bas wari pendungi pagi, nterem kalak ngataken man bangKu, ’O Tuhan, Tuhan! I bas GelarNdu ernubuat kami, i bas GelarNdu ipelawes kami setan-setan dingen ibahan kami tanda-tanda sengget.’ Tapi ningKu pagin njabapsa, ’La kam Kutandai pe. Laweslah i bas Aku nari, o kalak jahat!’”—Matius 7:21-23.

12. Ise si bengket pagi ku Kinirajan Surga?

¹² Emaka, ise si bengket pagi ku Kinirajan Surga? Kalak si ngelakoken peraten Jahwe.

13. Pendahin kai si ibereken Dibata man umatNa gundari, janah ise si ngelakokenca?

¹³ Kai ate Dibata silakoken genduari? Nina Jesus, ”Berita Si Meriah kerna Kinirajan e iberitaken man manusia i belang-belang doni enda, jadi saksi man kerina bangsa.” (Matius 24:14) Enda me pendahin si ilakoken Saksi-Saksi Jahwe alu ergiah-giah.

14. Kai kin Kinirajan Dibata e? Janah ise pagi si merentah i bas Kinirajan e?

¹⁴ ”I belang-belang doni”, Saksi-Saksi Jahwe mberitaken Kinirajan Dibata selaku sada pemerentahen i surga, si merentah doni pagi alu adil ras benar. Kalak enda ngajarken maka Jahwe nggo nangkuhken Jesus Kristus jadi Raja Kinirajan e, bage pe 144.000 si jadi temanna guna merentah si nggo ipilih arah manusia nari.​—Daniel 7:14, 18; Ketangkasen 14:1, 4.

15. Kai nge pagi si ikernepken Kinirajan e?

¹⁵ Saksi-Saksi ncidahken arah Pustaka si Badia maka Kinirajan Dibata nandangi ngkernepken Setan ras kerina si lit i bas kekuasanna. Kerina agama palsu ras ajarenna si la ngergai Dibata janah si mpehaga Iblis pasti masap! (Ketangkasen 18:8) Kerina pemerentahen manusia si ngelawan Dibata pe pasti lesap!​—Daniel 2:44.

16. Ise nge pagi si jadi rayat i bas pemerentahen Jesus, ras i ja kalak e pagi tading?

¹⁶ Selain si e, Saksi-Saksi Jahwe mpebetehken maka Jesus nandangi mereken pasu-pasu si luar biasa man kerina si ndalanken perentah Dibata. Kalak enda pagi si jadi rayatna i doni. Pustaka si Badia erjanji, ”Kalak musil si mindo man bana isampatina, bage pe kalak si kekurangen ras kalak si la lit si nampatisa. Ikelengina kalak si la ergegeh dingen musil, ikelinina geluh kalak si nggeluh i bas kekurangen.”​—Masmur 72:12, 13.

17. Ise kin ngenca si mberitaken Kinirajan Dibata?

¹⁷ La lit terpuk si deban si ngelakoken peraten Dibata alu mberitaken berita si meriah kerna Kinirajan. Saksi-Saksi Jahwe ngenca si mpebetehken man kerina kalak i belang-belang doni kerna Kinirajan Dibata.