1. Uga kiniteken agama si pemena iumpamaken bagi piramid ntah pe deleng?

PIGA-PIGA kiniteken i bas agama si pemena iumpamaken bagi piramid ntah pe deleng. I bas tampukna eme kap Dibata si meganjangna kal kinigegehenNa. Bas rebe-rebenna eme kap dewa-dewa ras mahluk roh, si ngelayani Dibata. I deher dewa-dewa ras mahluk roh e lit nini-nini si nai si nginget ras ermediate nandangi keadan keluargana si tading i doni. Si arah teruh kal eme kap kuasa begu-begu misalna, kinigurun, ertendung ras ilmu sihir.

2. Uga pengaruh kiniteken si pemena nandangi agama?

² Agama-agama si pemena enda mbelin kal pengaruhna nandangi agama-agama si deban. Misalna, nina buku The Asians: Their Heritage and Their Destiny, ”Kalak si tek nandangi agama-agama i doni enda lit i bas Asia Tenggara gundari, tapi lalan kiniteken ras kebiasanna rehna mungkin bas animisme, Hinduisme, Buddhisme, Islam ntah pe gabungen arah piga-piga agama nari.” Sekalak Afrika ngatakenca, ”Kinipatuhen man Agama (Kristen ntah pe Islam) la banci mpengadi kami guna majuh nini-nini i bas ingan si keramat i kuta kami.”

3. Uga carana kita banci meteh ise situhuna si tading i alam roh?

³ Tuhu kin kiniteken si pemena ngajarken kebenaren? Pustaka si Badia mpebetehken kebenaren man banta kerna ise situhuna si tading i alam roh.

4. Kerna Dibata, kiniteken kai si seri i bas melala agama?

⁴ Buen agama setuju maka lit nge Dibata janah Ia me Si Mada Kuasa. Pustaka si Badia ngatakenca, ”Tuhan Dibatandu, ganjangen kap asa kerina dibata-dibata ras gegehen asa kerina kuasa-kuasa si deban. Ia kap Dibata si mbelin dingen mbisa, janah si nasa lit mbiar man bana.” (Ulangen 10:17) Kalak Islam pe tek lit sada Dibata Si Mada Kuasa. Kerna agama si pemena i bas Afrika, Profesor Geoffrey Parrinder ngatakenca, ”Teremen kalak Afrika tek nandangi Dibata Si Mada Kuasa, bapa kerina dewa ras manusia, si nepa si nasa lit.”

5. Kai saja penggelaren man Dibata?

⁵ Aminna gia menam kerina jelma tek man Dibata, lalan ka si lenga bo tangkas ietehna ise kin Dibata e. Bena-benana i bas nandai sekalak jelma perlu kal sieteh gelarna. I bas melala agama lit perbedan kerna gelar Dibata. Piga-piga agama si ngaku Kristen biasana nggelarisa Dibata, ertina ”Si Mada Kuasa”. I bas agama Islam igelari Allah. I bas piga-piga agama si pemena, penggelaren man Si Mada Kuasa la seri i bas tep-tep cakap. I bas Indonesia enda lit melala gelar ras penggelaren man si Mada Kuasa. Contohna, Nini si Mbelin (Karo), Debata Mulajadi Nabolon (Tapanuli), Gusti Allah (Jawa), Hyang Widhi Wasa (Bali), Opo Empung (Minahasa), Puang Matua (Toraja), Ran ying Hatalla (Dayak), ntah pe Sang Hyang Kersa (Sunda).

6, 7. What is God’s name, and how do we know?

 ⁶ Kai nge nina Dibata kerna gelarNa? Sanga Dibata nuruh Musa minpin bangsa Israel ndarat arah Mesir nari, nungkun ia, ”Kenca dage aku reh ku anak Israil, janah ningku man bana: Dibata nu ninindu nuruh aku ndahi kam, janah isungkunna aku: Si kai nge gelar Ia? Kuga ningku dage man bana?”​—Keluaren 3:13, Padan si Ndekah, cetakan tahun 1953, J.H. Neumann.

⁷ Jabap Dibata, ”Bage nindu man kalak Israil, ’Jahwe, Dibata nu ninindu, . . . , Ia nge si nuruh aku ndahi kam; enda me gelarku rasa lalap, bagenda igelari kam Aku ersundut-sundut.’” (Keluaren 3:15, Padan si Ndekah, cetakan tahun 1953, J.H. Neumann) Gelar Dibata lit itulis lebih 7.000 kali i bas Pustaka si Badia, aminna gia melala penerjemah Pustaka si Badia nggantikenca alu penggelaren ”Dibata” ntah pe ”Tuhan”.

8. Uga kin Dibata e, janah kai nge arus silakoken gelah ngena ateNa?

⁸ Uga kin situhuna Dibata Jahwe e? Ia kesah, mada kuasa, mulia. Ia si meganjangna, la lit si seri bagi Ia. (Ulangen 6:4; Jesaya 44:6) Nina Jahwe man Musa, ”Aku kap Tuhan Dibatandu si percimberu.” Ertina, gelah ngena ate Dibata kita arus nembah man BaNa saja. La ateNa kita nembah kempak kai pe ntah man ise pe.​—Keluaren 20:3-5.

9. Engkai maka banci sikataken Jesus e labo seri ras Jahwe?

⁹ Gundari melala perbedan pendapat kerna ise kin Jesus. Melala kalak Kristen tek maka Jesus e bagin i bas Si Telu Sada si ”Badia”. Tapi, Pustaka si Badia la ngajarken maka Dibata e telu pribadi tapi sada. Janah Pustaka si Badia la ngajarken adi Jesus seri ras Jahwe. Jesus saja pe ngatakenca, ”Bapangku e belinen nge kuasana asangken aku.”​—Johanes 14:28.

10. Ija Jesus tading ope denga ia reh ku doni?

¹⁰ Pustaka si Badia ngajarken maka ope denga Jesus nggeluh jadi manusia i doni, ia ringan i surga selaku mahluk roh si mbisa. Selain nepa Adam ras Hawa i doni, Jahwe pe nepa mahluk-mahluk roh i surga. Jesus me mahluk roh si pemena si itepa Jahwe.​—Johanes 17:5; Kolose 1:15.

11. Uga maka banci Jesus tubuh jadi manusia?

¹¹ Kira-kira 2.000 tahun si nggo lewat, Jahwe mindahken kegeluhen mahluk roh enda ku bertin sekalak si nguda-nguda si gelarna Maria. Malekat Gibrael (ntah pe, Jibril) ngatakenca man bana, ”Mehuli pagi kulandu janah ipupusndu sada anak dilaki, bahanlah gelarna Jesus. Janah Ia me pagi raja . . . , kinirajanna la erkeri-kerin.”​—Lukas 1:31, 33. *

12. Kai salah sada alasen Jesus reh ku doni?

¹² Kenca e, Jesus tubuh, reh belinna, janah ngajari manusia kerna peraten ras tujun Dibata. Nina man sekalak gubernur Romawi, ”Aku tubuh dingen reh ku doni enda guna ncidahken kebenaren Dibata.” (Johanes 18:37) Alu ngukuri kai si iajarken jesus, kita banci erlajar kebenaren kerna peraten ras tujun Dibata. Banci sieteh uga carana gelah ngena ate Dibata.

13. Kai alasen si peduaken Jesus reh ku doni?

¹³ Alasan sipeduaken engkai maka Jesus reh ku doni eme kap mereken kegeluhenna jadi tebusen man manusia. (Matius 20:28) Enda ilakokenna gelah banci kita ibebasken arah dosa si isusurken nininta Adam. Asilna kita banci ndatken kegeluhen si rasa lalap. Rasul Johanes nuratken, ”Sabap bage pengkelengi Dibata doni enda, emaka iberekenNa anakNa sitonggal gelah ola bene ise pe si tek man BaNa, tapi gelah dat kegeluhen situhu-tuhu si la erkeri-kerin.”​—Johanes 3:16.

14. (a) Kai si terjadi nandangi Jesus kenca kematenna? (b) Kai gundari jabaten Jesus i surga?

¹⁴ Kenca kematenna, Jesus ipekeke ku surga, mulihi nggeluh jadi mahluk roh si mbisa. (Perbahanen Rasul-rasul 2:32, 33) Kenca si e, ibereken Jahwe man bana, ”kuasa kehamaten, ras kuasa kinirajan, gelah kerina manusia i bas tep-tep bangsa, suku, ras cakap nembah man bana.” (Daniel 7:13, 14) Jesus nggo jadi Raja si mbisa; ia Raja i bas pemerentahen Jahwe si i surga. Kentisik nari icidahkenna kuasana nandangi doni enda.

15. Ndigan ras i ja malekat itepa?

¹⁵ Labo Jahwe ras Jesus saja si tading i bas alam roh. Jahwe nepa mahluk-mahluk roh si debanna eme malekat-malekat. Salah sada eme kap Gibrael, si ngerana man Maria. Malekat-malekat labo manusia si pernah nggeluh i doni. Malekat-malekat itepa i surga ndekah ope denga manusia itepa i doni. (Jop 38:4-7) Beliganna erjuta-juta.​—Daniel 7:10.

16. Engkai maka manusia la banci nembah malekat-malekat?

¹⁶ Malekat-malekat si setia la atena kita nembah ia. Dua kali icubaken rasul Johanes nembah malekat-malekat, tapi itulak malekat e alu ngataken, ”Ola sembah aku, . . . Sembahlah Dibata!”​—Ketangkasen 19:10; 22:8, 9.

17. Kai si ncidahken maka malekat-malekat ngasup ngkawali juak-juak Dibata, janah engkai keterangen enda erban kita tenang?

¹⁷ Malekat-malekat lanai ncidahken dirina man juak-juak Dibata i doni, bali bagi si ilakokenna paksa mbebasken rasul-rasul Jesus i bas penjara nari. (Perbahanen Rasul-rasul 5:18, 19) Tapi, adi kita nembah Jahwe bali bagi si iajarken Katana, Pustaka si Badia, banci kita tek maka pasuken malekatNa si megegeh dingen la teridah banci ngkawali kita. Nina Pustaka si Badia, ”Malekat Tuhan ngkawali kalak si tutus dingen mulahisa i bas si jahat nari.” (Masmur 34:7; 91:11) Engkai maka keterangen enda erban kita tenang? Perban lit mbue musuh si bahaya i bas alam roh si atena ncedai kita!

18. (a) Engkai maka sekalak malekat mberontak man Dibata? (b) Kai gelar si ibereken man malekat pemberontak e?

¹⁸ La kerina malekat Dibata setia man BaNa. Piga-piga mberontak man Dibata. Kalak e jadi musuh Dibata ras musuh manusia i doni. Engkai maka enda banci terjadi? Kerina malekat itepa Dibata selaku malekat si benar ras mehuli. Tapi salah sada anak-anak Dibata enda merincuh gelah manusia nembah man bana, janah ilakokenna me sura-surana si jahat e. Mahluk roh enda igelari Setan, si ertina ”Si nimbak [Dibata]”. Ia pe igelari ka Iblis, si ertina ”Tukang pitnah”, perban ikatakenna guak si jahat kerna Jahwe.

19. Engkai ras uga carana Setan niksa Jop?

¹⁹ Setan ngajuk manusia gelah ikut ras ia mberontak man Dibata. Perdiateken kai si ilakokenna kempak Jop juak-juak Dibata si setia. Jop sekalak dilaki si seh kal bayakna. Lit 7.000 biri-birina, 3.000 unta, 1.000 lembu, ras 500 kelede. Lit ka sepuluh anakna ras melala juak-juakna. Tangtangna, Setan munuh asuh-asuhen ras juak-juak Jop. Kenca si e, i banna ”angin si meter” ncedai rumah, ras munuh kerina anak-anak Jop. Dung e, isiksa Setan Jop alu ”ipeturahna ugah mekelek i bas kula Jop mulai i bas tapak-tapak nahena nari terus ku piseranna”.​—Jop 1:3-19; 2:7.

20. (a) Kai upah kesetian Job? (b) Jop setia man Dibata, tapi kai si berhasil ilakoken Setan man jelma si deban?

²⁰ Aminna gia percuban e seh pagitna, Jop tetap setia man Dibata. Emaka ipepalem Jahwe ia janah ”iberekenna man Jop kinibayaken dua kali lipat buena asa si mbarenda”. (Jop 42:10) Setan gagal encedai kesetian Jop, tapi Setan berhasil mpedauh melala jelma arah Dibata nari. Pustaka si Badia ngatakenca, ”Kerina doni enda lit i bas kuasa si jahat e.”​—1 Johanes 5:19.

21. (a) Kai buktina Setan merhat isembah? (b) Engkai maka Jesus la nggit nembah Setan?

²¹ Setan merhat gelah kita nembah ia. Enda jelas teridah sanga igodana Jesus kira-kira 2.000 tahun si nggo lewat. Pustaka si Badia nuriken, ”Ibabai Iblis e ka Jesus ku deleng si seh kal ganjangna. Jenari ituduhkenna man Jesus kerina kerajan doni enda ras kinibayakenna. Nina Iblis e man Jesus, ’Kerina kerajan doni enda ras kiniulinna ku berekan man bandu, adi nggit Kam erjimpuh nembah man bangku.’” Emaka ngaloi Jesus nina, ”Laweslah Iblis! Lit kap tersurat i bas Pustaka si Badia: ’Sembahlah Tuhan Dibatandu, janah ia saja ngenca patut man sembahen!’” (Matius 4:8-10) Jesus tuhu-tuhu meteh hukum Jahwe, janah la ia nggit ngelakoken sura-sura Setan.

22. Kai si ibahan malekat-malekat jahat enda man manusia?

²² Malekat-malekat si deban ikut ras Setan mberontak man Dibata. Malekat-malekat si jahat enda jadi musuh manusia i doni. Kalak e kejam dingen jahat. Nai, malekat-malekat si jahat enda erbahan piga-piga kalak la banci ngerana ras la erpengidah. (Matius 9:32, 33; 12:22) Si deban ibahanna sakit ras adon. (Matius 17:15, 18; Markus 5:2-5) Anak-anak pe isiksana.​—Lukas 9:42.

23. (a) Kai si iarapken malekat-malekat jahat e i bas manusia nari? (b) Tipun Setan ras begu-beguna erbahan manusia ngelakoken kai?

²³ Bali bagi Setan, malekat-malekat jahat merhat isembah, aminna pe ietehna maka penembahen e man Jahwe saja. Kalak e labo saja senang isembah, tapi ngarapken, merincuh ras ngajarken kalak gelah nembah ia. Alu nipu, guak ras pebiar-biar jelma, Setan ras begu-beguna enggo erbahan mbue manusia nembah ia. Tentu, la melala kalak si meteh maka ia nembah Setan ras begu-beguna. Teremen si dungna sengget kenca meteh maka agamana ndukung Setan. Tapi, Pustaka si Badia mpersingeti kita, ”Kai si ipersembahken ibabo batar-batar persembahen berhala, labo ipersembahken man Dibata, tapi man Setan nge.”​—1 Korinti 10:20.

24. Kai salah sada cara si ilakoken Setan gelah manusia nembah ia?

²⁴ Salah sada cara si ilakoken Setan ras begu-beguna gelah manusia nembah ia eme kap alu pembarken guak kerna keadan kalak si enggo mate. Mari si nehen kai si iajarken Pustaka si Badia kerna si e.