1. Uga belangna kiniteken nandangi kinigurun, sihir ntah pe guru si baso i bas masarakat?

”IBAS Afrika lanai man sungkunen lit ntah lang guru si baso,” nina buku African Traditional Religion, janah nambahken maka ”i bas erbage golongen masarakat Afrika, guru si baso seh kal pentingna”. Mulai si la erpendidiken seh ku si meganjang sekolahna, bage pe piga-piga peminpin agama Kristen ntah pe Islam, lit ka si tek kempak kinigurun, sihir, ntah pe guru si baso.

2. Menurut kiniteken jelma si enterem, ja nari rehna gegeh kinigurun?

² Melala kalak tek maka gegeh kinigurun tuhu-tuhu lit. Dibata me si ngaturkenca. Mahluk roh ras nini-nini si enggo mate banci nggunaken gegeh e. Janah, piga-piga kalak meteh uga cara ndatken ras makesa, man tujun si mehuli (ilmu putih) ntah pe tujun si jahat (ilmu hitam).

3. Kai kin ilmu hitam e, janah menurut melala kalak, kai nge si banci ilakokenna?

³ Ilmu hitam, ntah pe guna-guna, ipake lako nerang musuh. Beritana, kalak si lit gegeh kiniguruanna, ngasup ngerehken lingkaber, perik, laneng, ras rubia-rubia si debanna guna nerang kalak. Melala kalak tek maka ilmu hitam e me si erban kalak rubati, la banci mupus, sakit ras mate.

4. Menurut enterem jelma, kai si banci ilakoken guru si baso, ras kai pengakun piga-piga bekas guru si baso?

⁴ Ilmu hitam mbelin kal hubungenna ras guru si baso. Menurut cerita, guru si baso banci nadingken kulana, guna jumpa ras guru si baso si deban ntah pe kalak si man bunuhenna. Enda si tuhuna sada pengakun saja nge arah kalak si pernah jadi guru si baso, sabap kula guru si baso e lit denga i bas ingan medem. Enda me piga-piga si niakui bekas guru si baso (lalan si nguda-nguda) si itulis sada majalah Afrika, ”Kubunuh 150 kalak alu kecelakan kereta ntah pe motor.” ”Kubunuh lima danak-danak alu ngincep darehna.” ”Kubunuh telu rondongku perban aku itadingkenna.”

5. Kai kin ilmu putih e, janah uga cara kalak nggunakenca?

⁵ Menurut beritana ilmu putih banci engkawali kalak i bas si jahat nari. Kalak si nggunaken ilmu putih make cincin ntah pe gelang si ”sakti”. Kalak e nginem ntah pe ndampeli dagingna alu pulungen tawar. Lit si muniken barang-barang keramat i bas rumah ntah pe itanemna bas taneh guna jadi perlindungen. Lit ka si ernalem man jimat si risiken ayat-ayat Quran ntah pe Pustaka si Badia.

6. Kai si ilakoken Setan ras begu-beguna i bas masa si enggo lewat, ras uga pendapatta kerna kinigegehenna?

⁶ Situhuna, Setan ras begu-beguna musuh si erbahaya kal man manusia. Kalak enda ngasup mpengaruhi perukuren ras kegeluhen kerina jelma, janah i bas masa si nggo lewat kalak e banci neluki manusia ras rubia-rubia. (Matius 12:43-45) La banci siakap enteng kinigegehen kalak e, tapi labo ka perlu si pebelin-belin.

7. Ate Setan kita tek kerna kai, janah bereken contohna?

⁷ Setan penipu si ahli. Ibanna kalak erpengakap maka kinigegehenna e luar biasa, tapi situhuna labo bage kal hebatna. Sada contoh: I bas peperangen, lit tentera si nggunaken rekamen sora guna pebiar-biar musuh. Sope nerang, rekamen sora pelor ras meriam iputar alu sora si megang. Ate tentera ndai gelah musuh erpengakap maka ia paksana iserang sada pasuken si megegeh alu persenjatan si hebat. Ate setan pe kita erpengakap maka kinigegehenna la tersibar. Tujunna: erbahan manusia mbiar janah ngikutken sura-surana labo ndalanken peraten Jahwe. Mari siperdiateken telu guak Setan si atena gelah kita tek.

8. Kai sada guak si ipembarken Setan?

⁸ Sada guak si ipembarken Setan eme: La lit masalah si terjadi adi la ibahan. Enda pasti ilakoken sekalak jelma, alu langsung ntah pe erkelangken gegeh kinigurun. Contohna, katakenlah sekalak anak mate perban malaria. Ieteh nandena nge maka penakit e perban rengit. Tapi, banci saja ia tek maka sekalak jelma nggunaken guru si baso guna ngirimken rengit e.

9. Uga Pustaka si Badia ncidahken maka tep-tep perbeben labo rehna arah Setan?

⁹ Amin gia Setan ngasup erbahan piga-piga perbeben, labo ertina ia si erbahan tep-tep perbeben e. Pustaka si Badia ngatakenca, ”I bas perlumban labo lalap si meter kiam si menang, i bas peperangen labo lalap kalak si megegeh si menang. Labo kalak pentar lalap si jumpa pencarin, janah labo kalak cerdik rusur ndatken kebayaken. Bage pe labo kalak si mbages pemetehna si terberita. Tapi kerina nge kalak banci kena sial.” (Pengerana 9:11) Sekalak pelari banci saja lebih meter kiam asangken imbang-imbangna, tapi banci saja ia la menang. ”Kerina nge kalak banci kena sial” si erbahan ia talu. Mungkin saja ia terantuk, ndabuh, sakit ntah pe tersiher. Enda banci terjadi man ise pe. Kejadin-kejadin enda labo arah Setan ntah pe guru si baso nari, tapi tuhu-tuhu kecelakan saja.

10. Cerita kai si ipembarken Setan kerna guru si baso, janah uga carana kita banci meteh maka enda sada guak?

¹⁰ Guak si peduaken si ipembarken Setan: Guru si baso nadingken kulana i bas berngi wari ras njumpai guru si baso si deban, ntah pe ngincep dareh ntah munuh si man bunuhenna. Gundari, cuba ukuri, ’adi guru si baso banci ngelakokenca, kai si ndarat arah kulana?’ Sieteh maka tendi eme kalak e sendiri, labo sada bentuk kegeluhen si ndarat arah kalak e. Selain e, roh eme gegeh kegeluhen si la banci ngelakoken kai pe adi la lit kula.

11. Engkai guru si baso labo banci nadingken kulana?

¹¹ Tendi ntah pe roh labo banci ndarat i bas kula nari guna ngelakoken si mehuli ntah pe si jahat. Emaka, guru si baso la banci nadingken kulana. Kalak e labo tuhu-tuhu ngelakoken kai si enggo ikatakenna ntah pe siakapna enggo ilakokenna.

12. Kai si ilakoken Setan gelah kalak tek maka kalak e nggo ngenanami kai si situhuna labo pernah terjadi?

¹² Kai si erbanca guru si baso ngaku pernah ngalamisa? Setan banci erbahan kalak erpengakap enggo ngelakoken sada dahin, tapi situhuna labo. Alu pengenehenen, Setan erban kalak tempa-tempa ngidah, megi, ras ngelakoken kai si situhuna labo pernah terjadi. Alu cara-cara enda, ate Setan erban kalak ndauh arah Dibata nari ras erpengakap maka Pustaka si Badia e salah.

13. (a) Tuhu kin ilmu putih e mehuli? (b) Kai si ikataken Pustaka si Badia kerna kinigurun?

¹³ Guak si peteluken: Ilmu putih e mehuli; guna ngelawan ilmu hitam. Pustaka si Badia la mbedaken ilmu putih ras ilmu hitam. Kerina enda dosa i lebe-lebe Dibata. Perdiateken hukum si ibereken Jahwe man bangsa Israel kerna kinigurun ras kalak si ngelakokenca:

• ”Ula kam ertendung ntah pe erbahan kinigurun.”​—Imamat 19:26.

• ”Adi sekalak dilaki ntah diberu jadi guru pertendung eme nungkun man begu kalak si nggo mate, arus ibenteri alu batu ngayak mate.”​—Imamat 20:27.

• ”Ula pelepas bangsandu ertendung, ngoge tanda-tanda, ntah mpergunaken mangmang, ntah make guna-guna.”​—Ulangen 18:10-14.

14. Engkai maka Jahwe erban hukum si ngelarang kinigurun?

¹⁴ Hukum-hukum enda alu jelas ncidahken maka Dibata la senang adi umatNa ngelakoken kinigurun. Jahwe mereken hukum enda kempak umatNa perban Ia ngkelengi kalak e janah labo Ia senang adi kalak e ikuasai ukur mbiar ras cerita si la tuhu. La ateNa kalak e itindes ntah pe isiksa begu-begu.

15. Uga Pustaka si Badia ncidahken maka Jahwe lebih erkuasa asangken Setan?

¹⁵ Amin gia la nuratken kerina si banci ras si la banci ilakoken begu-begu, Pustaka si Badia ncidahken maka Dibata Jahwe ndauh lebih erkuasa asangken Setan ras begu-beguna. Jahwe nggo mpelawes Setan arah surga nari. (Ketangkasen 12:9) Perdiateken maka Setan pe mindo man Dibata guna ncubai Jop, janah ia pe patuh man perentah Dibata gelah la munuh Jop.​—Jop 2:4-6.

16. Kempak ise kita arus ernalem?

¹⁶ Kuan-kuanen 8:10 ngatakenca, ”TUHAN e bali ras benteng si paguh, ku je me perlawes kalak bujur gelah ia terkelin.” Emaka, kita arus ernalem man Jahwe. Juak-juak Dibata la ngarapken jimat ntah pe ”pulungen tawar” guna engkawali ia arah perbahanen Setan ras begu-beguna; kalak e pe la mbiar iguna-gunai guru si baso. Juak-juak Dibata tek kata-kata Pustaka si Badia, ”Iperdiateken TUHAN kerina doni enda, gelah IberekenNa gegeh man kalak si setia man BaNa. Nggo ilakokenndu perbahanen si bodoh. Emaka mulai genduari nari kam lalap erperang.”​—2 Kronika 16:9.

17. Jakup 4:7 erban kita tek kerna kai? Tapi, kai nge si arus si lakoken?

¹⁷ Kam banci tek kerna si enda adi kam ngelayani Jahwe. Jakup 4:7 ngatakenca, ”Emaka endeskenlah dirindu man Dibata. Lawanlah Iblis; kiam me Iblis e i bas kam nari.” Adi kam ngelayani Dibata si tuhu-tuhu, erpengendeslah man BaNa, kam banci tek maka Jahwe engkawali kam.