PELAJAREN 1
Tuhu kin Kerina Agama Ngajarken Kebenaren?
1. Agama kai saja nge si ietehndu?
MENAM kerina kalak Karo setuju maka nembah ku Dibata sada hal si penting. Tapi, la kerina sada arihna kerna cara nembah man BaNa. Kalak Islam sembahyang i mesjid, kalak Kristen kebaktin i gereja, janah kalak Budha ras Hindu i bas kuil. Agama-agama si pemena erban penembahen bas ingan si niakapna keramat. Tapi, la e saja. I bas kalak Islam lit erbage aliren. Kalak si ngaku Kristen pe mbue erbagena. Selain gereja-gereja utama, lit ka ribun aliren gereja si deban i belang-belang doni. Janah, agama si pemena pe la bali i bas tep-tep daerah.
Agamanta Arus Erpalasken Kebenaren
2. (a) Kai si mpengaruhi cara kalak nembah Dibata? (b) Agama si isusurken orang tua ntah pe si ipaksaken bangsa si deban, enggo kin pasti benar?
2 Kai si mpengaruhi cara kalak nembah Dibata? Teremen jelma ngikutken agama orang tuana. Tapi, lit si milih agamana erkiteken pengaruh kejadin i bas masa si enggo lewat. Contohna i bas Afrika, nina buku The Africans—A Triple Heritage, ”Islam ipebelang i bagin utara Sahara alu peperangen ras penakluken, . . . Kekristenen pe reh belangna i bagin selatan Sahara alu cara si bage. Adi i bas utara Sahara, Islam ipebelang alu pedang, i selatan, Kekristenen ipebelang alu bedil.” Aminna gia bage, enterem i bas kita tek maka agamanta ngena ate Dibata. Tapi, sada agama lenga tentu benar amin gia agama e isusurken orang tua, ntah pe erkiteken ipaksaken bangsa si deban man nini-nininta.
3-5. Anding-andingen kai si nampati kita banci ngantusi maka labo kerina agama ngajarken kai si benar?
3 Aminna gia kerina agama ngaku ngajarken cara si benar i bas nembah Dibata, ajaren agama-agama e la seri. Agama-agama ngajarken mbue hal si beda kerna ise Dibata ras kai si niarapkenNa man banta. Cubaken ukurindu enda: misalna, kam ndatken dahin bas sada perusahan si mbelin. I bas wari si pemena, erkiteken pinpinenndu paksa la erdahin, kam nungkun man telu temanndu si sada dahin kerna kai nge si arus ilakokenndu. Nina temanndu erdahin si pemena ate pinpinenndu kam napu lante. Si peduaken ngataken maka kam arus ngecet dingding. Si peteluken nuruh kam mbagiken surat.
4 Kenca e, kam nungkun man kalak e kerna pinpinenndu. Nina temanndu si pemena pinpinenndu e nggedang, nguda denga ras kasar jelmana. Nina si peduaken ia gendek, metua ras mehuli. Nina si peteluken pinpinenndu e labo sekalak dilaki tapi diberu. Mbelin kemungkinenna, nina ukurndu pasti la kerina si ikataken teman-temanndu e benar. Adi tetap atendu erdahin i je, banci saja usahakenndu guna meteh uga kin situhuna pinpinenndu e janah kai kin pemindonna.
5 Bage ka pe agama. Erkiteken mbue ajaren kerna ise kin Dibata ras kai si niarapkenNa i bas manusia nari, arus sipastiken maka caranta nembah Dibata sue ras kai si benar. Tapi, banci kin sieteh kebenaren kerna Dibata?
