1. Menurut Pustaka si Badia, piga macam nge agama?

”BENGKETLAH arah pintun si kitik, sabap mbelang me pintun dingen mbelang pe dalan ku naraka, janah nterem kalak arah e erdalan. Pintun si kitik dingen dalan si mesera nuju ku kegeluhen si rasa lalap, janah piga-piga kalak ngenca ngasup arah e erdalan.” (Matius 7:13, 14) Menurut Pustaka si Badia, dua macam ngenca agama: si asli ras si palsu; si benar ras si salah; sada nuju ku kegeluhen, si deban nuju ku kematen.

2. Uga Pustaka si Badia ncidahken maka labo kerina agama ngena ate Dibata?

² Lit si erpengakap maka kerina agama ngena ate Dibata. Ayat-ayat enda ncidahken maka e la tuhu:

• ”Bangsa Israel erbahan dosa denga man TUHAN alu nembah man Baal ras Astarte, bage pe man dibata-dibata Siria, Sidon, Moap, Amon ras Pilisti. Itadingkenna TUHAN janah ngadi ia nembah man BaNa. Emaka merawa TUHAN man bangsa Israel.” (Hakim 10:6, 7) Adi kita nembah gana-gana ntah nini-nini si enggo mate, ntah pe dibata-dibata (dewa-dewi) si deban ras la nembah Dibata si tuhu-tuhu, penembahenta la ngena ate Jahwe.

• ”Bangsa enda muji Aku alu biberna, tapi ukurna ndauh sirang i bas Aku nari. La lit gunana ia ersembah man bangKu, sabap si iajarkenna labo Undang-undang Dibata, tapi undang-undang manusia nge.” (Markus 7:6, 7) Adi kalak si ngaku nembah Dibata ngajarken ajarenna sendiri, labo ajaren Pustaka si Badia, penembahen kalak e sia-sia. La ialoken Dibata.

• ”Dibata kesah kap, e maka arah kesah e ngenca maka banci manusia nembah Dibata alu payo.” (Johanes 4:24) Caranta nembah Dibata arus sentudu ras Pustaka si Badia.

3. Uga carana kita banci mbedaken agama si asli arah si palsu nari?

³ Uga carana gelah banci sieteh agama si ngena ate Dibata ntah si lang? Nina Jesus, ”Batang si mehuli tentu mehuli nge buahna, tapi batang si la mehuli tentu pe la mehuli buahna . . . Emaka itandaindu nge nabi si palsu e arah perbahanenna.” Alu kata sideban, adi sada agama rehna arah Dibata nari, agama e ngasilken buah si mehuli; tapi adi sada agama rehna arah Setan nari, agama e pasti ngasilken buah si la mehuli, si macik.​—Matius 7:15-20.

4. Sipat kai si arus icidahken kalak si nembah Jahwe?

⁴ Agama si asli ngasilken kalak si lit kekelengenna ras ncidahkenca i bas geluhna. Engkai? Perban Jahwe Dibata kekelengen kap. Nina Jesus, ”Adi sikeleng-kelengen kam, kerina kalak meteh maka kam ajar-ajarku.” Tuhu kin agama-agama ngikuti patoken enda guna penembahen si benar?​—Johanes 13:35; Lukas 10:27; 1 Johanes 4:8.

5. Kai si ikataken sada ensiklopedia kerna perdagangen budak i Afrika?

⁵ Contohna, perdiateken perdagangen budak i Afrika. The New Encyclopædia Britannica ngatakenca, ”Iperkiraken lit 18.000.000 kalak Afrika si ikiremken arah Islāmic trans-Saharan ras arah Samudra Hindia i bas perdagangen budak mulai tahun 650 seh ku tahun 1905. I bas pertengahen seh ku pendungi abad 15 kalak Eropa mulai ngelakoken perdagangen budak i pante barat Afrika, janah i bas tahun 1867 kira-kira enggo 7.000.000 seh ku 10.000.000 kalak Afrika ikiremken alu kapal guna jadi budak ku Benua si Mbaru [Benua Amerika].”

6. Uga agama ikut i bas perdagangen budak?

 ⁶ Uga tindaken agama paksa dilaki, diberu ras anak-anak i Afrika ibuat arah rumah ras keluargana alu paksa, irante, ibere cap alu besi si melas, kenca e itukur ras idayaken bali bagi binatang? Bethwell Ogot nulis i bas Daily Nation Nairobi, Kenya, ”Agama Kristen ntah pe Islam ngajarken kerna persadan kerina manusia, tapi kalak e ikut erban sada masarakat si ngaloken perbudaken erkiteken prasangka ras. . . . Arus siakui maka masarakat Muslim ras Kristen, negara-negara Barat ras Timur Tengah, bage pe erkiteken la lit kiniarun ate, ikut ngerehken kiniseran si la terturiken kempak kalak Afrika.”

7. Uga tindaken mbue pemimpin agama kerna peperangen?

⁷ Agama palsu ngasilken buah si la mehuli si deban. Misalna, amin gia Pustaka si Badia ngatakenca ”kelengi temanndu manusia”, mbue peminpin agama i belang-belang doni alu ergiah-giah ndukung ras ngiahken peperangen.​—Matius 22:39.

8. (a) Uga peminpin agama ndukung pembunuhen i bas erbage keadan kacau i Afrika? (b) Kai nina sekalak pastor kerna peminpin agama paksa perang sipil i Nigeria?

⁸ Lanai rahasia maka paksa tahun 1994, piga-piga biarawati ras pastor ikut i bas pembunuhen melala jelma i Rwanda. Agama pe ikut erban erbage keadan kacau si debanna i Afrika. Contohna, paksa perang sipil i Nigeria, agama-agama arah kedua belah pihak ndukung rayatna guna erperang. Paksa perang e terus la erkedungen, nina sekalak pastor maka peminpin gereja enggo ”nadingken dahin si ibereken Dibata man kalak e”. Nina ka, ”Kita si ngaku selaku pelayan Dibata nggo jadi pelayan Setan.”

9. Kai si ituriken Pustaka si Badia kerna pelayan-pelayan Setan?

⁹ Bagi si ikataken pastor ndai, Pustaka si Badia ngatakenca, ”Sabap Iblis pe banci nalihken rupana gelah teridah ia bali ras malekat terang! Jadi labo perkara si mbelin kal adi persuruhen Iblis e nalihken rupana gelah teridah bali ras persuruhen si mehuli.” (2 Korinti 11:14, 15) Bagi melala kalak jahat si pekulah-kulahna bana selaku kalak si bujur, Setan pe nipu kalak erkelangken pelayan-pelayan si tempa-tempa bujur tapi ngelakoken si macik.

10. Alu cara uga peminpin-peminpin agama nulak Dibata?

¹⁰ I belang-belang doni, peminpin agama mpeseh khotbah kerna kekelengen, perdamen, ras kebujuren tapi perbahanen kalak e dem alu segat ate, ikut i bas perang ras kejahaten. Pustaka si Badia alu tepat nggambarken kalak e, ”Ngaku ia maka itandaina Dibata, tapi arah perbahanenna teridah labo itandaina.”​—Titus 1:16.

11. Kai si ikataken Pustaka si Badia kerna agama palsu?

¹¹ Banci sieteh uga perukuren Jahwe kerna agama palsu alu ngoge buku Ketangkasen i bas Pustaka si Badia. I je, agama palsu igambarken bagi sekalak diberu, ”Babilon si Mbelin”. (Ketangkasen 17:5) Perdiateken kata-kata Dibata kerna diberu enda,

• ”Raja-raja doni erlua-lua ras diberu si perlua-lua si mbelin e.” (Ketangkasen 17:1, 2) Agama palsu la setia man Dibata, tapi ikut i bas urusen politik, megati ngkuasai pemerentahen.

• ”Babilon iukum sabap dareh nabi-nabi ras dareh anak-anak Dibata terdat i bas ia, gendekna dareh kerina manusia si nggo ibunuh i doni enda.” (Ketangkasen 18:24) Agama palsu niksa ras munuh juak-juak Dibata si setia janah ikut ertanggung jabap nandangi kematen jutan jelma i bas perang.

• ”Buena pujin ras kemewahen si ibahanna nandangi dirina.” (Ketangkasen 18:7) Agama palsu seh kal bayakna janah peminpin-peminpinna pe alu kemewahen.

• ”Alu ilmu sihir[na] itipu[na] kerina manusia i doni enda!” (Ketangkasen 18:23) Erkelangken ajarenna si palsu kerna tendi si la banci mate, agama palsu mbuka dalan ku kerina hubungen ras roh-roh jahat, tendung ras erban kalak mbiar nandangi kalak mate janah majuh nini-nini si nggo mate.

12. Persinget kai si ibereken Pustaka si Badia kerna agama palsu?

¹² Pustaka si Badia alu tegas mpersingeti kalak gelah ndarat arah agama palsu, ”Ndaratlah o, bangsangKu! Ndaratlah i bas kuta e nari! Ola kam ngikut i bas dosa-dosana janah ikut i bas mara si reh man bana!”​—Ketangkasen 18:4, 5.

13. Kai si nandangi terjadi kempak agama palsu ras kalak si ngikutkenca?

¹³ I bas wari si pepagi, Babilon si Mbelin, eme kerina agama palsu i doni, pasti ikernepken. Nina Pustaka si Badia, ”I bas sada wari reh man bana mara si erbage-bage: penakit, ate ceda ras kelihen. Meseng me ia ibahan api, sabap erkuasa kap Tuhan, Dibata Si ngadili ia e.” (Ketangkasen 18:8) Gelah la kita kena i bas kerina marana e, arus siputusken hubungenta ras agama palsu, la ikut i bas kerina kebiasan, perayan, ras kinitekenna si erbahan Dibata la senang. Enda seh kal pentingna, soal nggeluh ras matenta!​—2 Korinti 6:14-18.