1, 2. Kai contoh si ncidahken maka perlu sada patoken guna nentuken ajaren si benar?

UGA kita banci nandai Dibata? Perlu kin si pereksa kerina ajaren agama? Si e la mungkin silakoken. Amin gia banci silakoken, uga kita banci meteh apai ajaren si benar?

² Erkiteken mbue perbedan ajaren kerna Dibata, perlu sada cara guna meteh apai si benar, patoken si banci isetujui jelma si nterem. Contohna: Katakenlah i bas tiga lit persoalen kerna gedang sada potong uis. Nina perbinaga gedang uis e telu meter, tapi nina si nukur la seh telu meter. Uga persoalen e banci idungi? Alu nibari uis e make meteren.

3. Kai gunana Pustaka si Badia isuratken?

³ Kai meteren ntah pe patoken guna mutusken persoalen agama? Pustaka si Badia. Dibata erbahan Pustaka si Badia isuratken gelah kerina jelma i japa pe ringan banci erlajar kebenaren kerna Ia. Jutan Pustaka si Badia enggo icetak. Pustaka si Badia enggo iterjemahken, lengkap ntah pe sebagin, i bas lebih 2100 erbage cakap. Emaka menam kerina jelma banci ngoge kebenaren kerna Dibata i bas cakapna.

4. Keterangen kai saja si lit i bas Pustaka si Badia?

⁴ Pustaka si Badia pemere si meherga i bas Dibata nari. Pustaka si Badia nuriken man banta kerna kai si la banci ijelasken ise pe. Pustaka si Badia mpebetehken ise si nggeluh i bas alam roh. Pustaka si Badia ncidahken perukuren Dibata, uga Ia situhuna ras kai kin peratenNa. Ia nuriken uga Dibata erurusen ras manusia sedekah ribun tahun. Ia mpebetehken kai si nandangi terjadi i bas wari si pepagi. Janah ia pe nuduhken carana kita banci ndatken dalan si nuju ku kegeluhen si rasa lalap.

5. Contoh kai si ncidahken maka Pustaka si Badia sentudu ras ilmu pengetahuan?

⁵ Lit piga-piga alasen engkai kita banci tek maka Pustaka si Badia tuhu-tuhu kata Dibata. Sada alasenna eme kap: Pustaka si Badia sentudu ras ilmu pengetahuan. Adi nai, melala kalak erpengakap doni enda lit si natangsa. Misalna, nini-nininta nai tek maka doni enda itatang sada nipe si galang. Sentudu ras ilmu pengetahuan, lebih 3.500 tahun si lewat sekalak penulis Pustaka si Badia nuratken, maka ”i bas si la lit doni isangkutken” Dibata.​—Jop 26:7

6. Kai bukti si mbelinna maka Pustaka si Badia rehna arah Dibata nari?

⁶ Bukti si mbelinna maka Pustaka si Badia e tuhu-tuhu i bas Dibata nari eme kap catatenna si tepat kerna wari si pepagi. La seri ras peramal manusia, Dibata tuhu-tuhu meteh wari si pepagi; kai pe si ikatakenNa lalap jadi.

7. Nubuat si apai i bas Pustaka si Badia si igenepi bas masa si enggo lewat?

⁷ Ratusen nubuat Pustaka si Badia igenepi i bas masa si enggo lewat. Contohna, 700 tahun ope denga Jesus tubuh, Pustaka si Badia alu jelas mpebetehken maka Jesus tubuh i kuta Betlehem, janah e me si terjadi. (Miha 5:2; Matius 2:3-9) I bas bage buena nubuat kerna Jesus, Pustaka si Badia pe mpebetehken maka ia tubuh arah sekalak singuda-nguda janah ihianati alu 30 keping sen pirak. Nubuat-nubuat e tuhu-tuhu terjadi. Tentu saja lalit manusia si banci erban ramalen si bage rupana!​—Jesaya 7:14; Sakaria 11:12, 13; Matius 1:22, 23; 27:3-5.

8. Nubuat Pustaka si Badia si apai saja si igenepi i bas jamanta, janah kai buktina?

⁸ Melala nubuat Pustaka si Badia igenepi i bas jamanta. I jenda lit piga-piga:

• ”Bangsa pagi ngelawan bangsa, kerajan ngelawan kerajan. Ija pa pe terjadi pagi taneh linuren, kelihen ras penakit cacar.”—Lukas 21:​10, 11.

• ”Reh buena kejahaten.”​—Matius 24:12.

• ”I bas wari-wari pendungi . . . manusia nggeluh ngukurken dirina saja, merangap, . . . la ibegikenna kata nande bapana, . . . La ia eralang-alang merawa, merampus, la atena ngena si mehuli, . . . Njulmit ukurna dingen meganjang ukurna, lanai diatena Dibata tapi kesenangen saja idaramina.”​—2 Timotius 3:1-5.

Kam pasti setuju maka kerina e tuhu-tuhu terjadi gundari. Kebenaren ras ketepaten nubuat Pustaka si Badia ncidahken maka Pustaka si Badia labo buku biasa. Buku enda e me kap Kata si rehna arah Dibata nari!​—2 Timotius 3:16.

9, 10. Kai si ncidahken maka Dibata la mpediat manusia ngobah Pustaka si Badia?

⁹ Katakenlah lit sada pabrikndu, janah banndu sada daftar peraturen man si erdahinndu. Adi lit piga-piga musuh si ngobah kai si enggo itulisndu, kai si ilakokenndu? Pasti la ipediatndu. Bage ka pe, Dibata la mpediat manusia ngobah kebenaren KataNa, Pustaka si Badia.

¹⁰ Kalak si ncubaken ngobah ajaren Pustaka si Badia nggo terbukti la banci berhasil. Adi si bandingken Pustaka si Badia si ipake gundari ras Pustaka si Badia si nuria, isina seri. Enda ncidahken maka Pustaka si Badia la banci iobah ndigan pe.