BAGIN 5
Ise si Megiken Dibata bas Jaman Nuah?
Bas jaman Nuah, buen kalak ngelakoken kai si jahat. Kejadin 6:5
Dungna lit anak-anak Adam ras Hawa, janah reh teremna jelma i doni. Kenca si e, lit malekat-malekat si ikut mberontak ras Setan.
Malekat-malekat e nusur ku doni ras ubahna bana jadi manusia gelah banci ngempoi diberu-diberu. Ilahirken diberu-diberu e anak-anak dilaki raksasa, si kejam ras megegeh.
Doni dem alu kalak jahat. Nina Pustaka, “Jahat kel manusia i doni. Kai si jahat ngenca lalap lit bas perukuren ras sura-surana.”
Begiken Nuah Dibata ras bangunna sada bahtra. Kejadin 6:13, 14, 18, 19, 22
Nuah kalak si bujur. Nina Dibata Jahwe man Nuah kernepkenNa ateNa kerina kalak jahat alu Banjir si Mbelin.
Suruh Dibata ka gelah bangun Nuah sada kapal si galang, si igelari bahtra. SuruhNa ia masuk ras keluargana bage pe ras kerina jenis binatang-binatang.
Persingeti Nuah kerina kalak maka nandangi reh Banjir si Mbelin, tapi la begiken kalak e. Lit si tawa-tawa nokohi Nuah ras lit ka si rate segat man bana.
Kenca dung bangun Nuah bahtra e, babana binatang-binatang ku bas.
