Gelar Dibata eme Jahwe, ertina ”Ia si erbahanca kerina jadi”. Jahwe me Dibata si mada kuasa ras si nepa si nasa lit. Lit kuasaNa guna ngelakoken kai si ateNa ilakokenNa.

I bas cakap Heber gelar Dibata itulis empat huruf. I bas cakap Inggris, ibelasken YHWH ntah pe JHVH. I bas teks asli kitap-kitap Heber gelar Dibata lit itulis kira-kira 7.000 kali. I belang-belang doni erbage-bage cara kalak mbelasken gelar Jahwe, uga umumna i bas cakap si ipakena.

▸ Psl. 1, par. 15

Pengarang Pustaka si Badia eme Dibata, tapi igunakenNa manusia guna nulissa. Bali bagi sekalak pengusaha si nuruh sekretarisna nulis sada surat si risiken isi pikiren pengusaha e. Dibata mbimbing manusia alu kesah si badia guna nulis isi pikirenNa. Kesah si badia mbimbing kalak enda alu erbage-bage cara, maun-maun arah pengenehenen ntah pe nipi gelah banci nuratkenca.

▸ Psl. 2, par. 5

Prinsip eme ajaren Pustaka si Badia si njelasken kerna kebenaren dasar. Contohna, prinsip ”pergaulen si la mehuli, ncedaken biak si mehuli” ngajarken maka banci sidatken pengaruh si mehuli ntah si la mehuli arah teman-temanta ergaul. (1 Korinti 15:33) Janah prinsip ’kai si isuan manusia e ka nge iperanina’ ngajarken maka la kita banci lepas i bas akibat perbahanenta nari.​—Galati 6:7.

▸ Psl. 2, par. 12

Enda berita i bas Dibata nari. Banci berupa penjelasen kerna peraten Dibata, ajaren moral, perentah, ntah pe penghakimen. Banci ka berupa berita kerna kai si nandangi terjadi i bas wari si pepagi. Melala kal nubuat i bas Pustaka si Badia si nggo terjadi.

▸ Psl. 2, par. 13

Jesus me si nggenepi melala nubuat i bas Pustaka si Badia kerna Mesias. Nehen kotak ”Nubuat kerna Mesias”.

▸ Psl. 2, par. 17, cit.

Jahwe nepa doni gelah jadi pardis, ingan tading manusia si ngkelengi Ia. Sura-suraNa lenga berubah. Kentisik nari, Dibata ngkernepken kejahaten janah mereken kegeluhen si rasa lalap man umatNa.

▸ Psl. 3, par. 1

Setan eme malekat si minpin pemberontaken guna nimbak Dibata. Ia igelari Setan si ertina ”Si nimbak” erkiteken ia ngelawan Jahwe. Ia pe igelari Iblis, si ertina ”Tukang fitnah”. Gelar enda ibereken bana erkiteken ia ngataken si la benar kerna Dibata ras nipu manusia.

▸ Psl. 3, par. 4

Jahwe nepa malekat ndekah ope lenga Ia nepa doni. Kalak enda itepa guna nggeluh i surga. Lit erjuta-juta malekat. (Daniel 7:10) Gelar ras kepribadinna erbage-bage, janah malekat si setia dingen meteruk rukur la nggit isembah manusia. Jabaten ras tugasna pe la seri. Piga-piga ngelayani i lebe-lebe tahta Jahwe, lit si mpeseh berita i bas Ia nari, lit si ngelindungi ras mbimbing umatNa i doni, lit si ngelakoken penghakimenNa, ras lit si ndukung dahin erberita si meriah. (Masmur 34:7; Ketangkasen 14:6; 22:8, 9) I bas wari si pepagi, kalak enda ikut erperang ras Jesus bas Harmagedon.​—Ketangkasen 16:14, 16; 19:14, 15.

▸ Psl. 3, par. 5; Psl. 10, par. 1

Dosa eme kai pe si lit i bas pusuhta, perukurenta, ntah pe perbahanenta si la ngena ate Jahwe ntah pe la sentudu ras peratenNa. Erkiteken dosa ncedai hubunganta ras Dibata, iberekenNa banta hukum ras prinsip si banci nampati kita gelah la ngelakoken dosa. Tangtangna, Jahwe nepa kerina alu sempurna, tapi paksa Adam ras Hawa la patuh man Jahwe kalak enda erdosa janah lanai sempurna. Kalak enda reh tuana dungna mate, janah erkiteken kita nggo ndatken warisen dosa i bas Adam nari kita pe reh tuana janah dungna mate.

▸ Psl. 3, par. 7; Psl. 5, par. 3

Enda perang Dibata guna ngkernepken Setan ras donina bage pe kerina kejahaten.

▸ Psl. 3, par. 13; Psl. 8, par. 18

Kinirajan Dibata eme sada pemerentahen si ipajekken Jahwe i surga. Jesus Kristus me Rajana. I bas wari si pepagi, Jahwe nggunaken KinirajanNa guna ngkernepken kerina kejahaten. Kinirajan Dibata pagi si merentah doni enda.

▸ Psl. 3, par. 14

Dibata nepa Jesus ope denga ijadikenNa kerina si nasa lit. Jahwe ngutus Jesus ku doni gelah mate guna kerina manusia. Kenca Jesus ibunuh, Jahwe mpekeke ia. Gundari, Jesus nggo jadi Raja i bas Kinirajan Dibata.

▸ Psl. 4, par. 2

Inubuatken ntah pe iramalken Pustaka si Badia ndigan Mesias reh. Eme i bas pendungi periode si igelari 69 minggu, si ibenai i bas tahun 455 SM janah idungi i bas tahun 29 M. 

Janari banci sieteh enda idungi i bas tahun 29 M? 69 minggu ibenai i bas tahun 455 SM paksa Nehemia seh i Jerusalem janah mulai majekken kota e mulihi. (Daniel 9:25; Nehemia 2:1, 5-8) Bali bagi kata ”lusin” ngingetken kita maka jumlahna 12, bage ka pe kata ”minggu” ngingetken kita maka jumlahna 7. Minggu i bas nubuat enda labo minggu si gedangna pitu wari tapi minggu si gedangna pitu tahun, sentudu ras aturen nubuat, ”tep-tep wari ikira sada tahun”. (Bilangen 14:34; Esekiel 4:6) Enda ertina sada minggu gedangna pitu tahun, jadi 69 minggu gedangna 483 tahun (69 x 7). Adi sikira 483 tahun mulai tahun 455 SM ndabuhna tahun 29 M. I bas tahun enda me Jesus iperidiken jadi Mesias!​—Lukas 3:1, 2, 21, 22.

 Nubuat enda pe ngataken maka lit sada minggu si deban, ertina pitu tahun tambahen. I bas periode enda, bas tahun 33 M, Mesias ibunuh, janah i bas pemena tahun 36 M, berita si meriah kerna Kinirajan Dibata iberitaken man kerina bangsa labo man kalak Jahudi saja.​—Daniel 9:24-27.

▸ Psl. 4, par. 7

Pustaka si Badia ngajarken maka Jahwe me si Nepa, janah Ia me si nepa Jesus sope njadiken kerina si nasa lit. (Kolose 1:15, 16) Jesus labo Dibata si Mada Kuasa. La pernah ikatakenna ia Dibata. Buktina nina Jesus, ”Bapangku e belinen nge kuasana asangken aku.” (Johanes 14:28; 1 Korinti 15:28) Tapi piga-piga agama ngajarken maka Dibata e telu tapi sada, eme: Bapa, Anak, ras kesah si badia. Kata ”Dibata Si Telu Sada” la lit i bas Pustaka si Badia. Enda ajaren palsu.

Kesah si badia eme tenaga Dibata si la teridah si igunaken Jahwe i bas ngelakoken peratenNa. Labo sekalak jelma. Contohna, kalak Kristen i bas abad pemena ”dem alu kesah si badia,” janah nina Jahwe, ”Kucurcurken pagi kesahKu man kerina manusia.”​—Perbahanen Rasul-Rasul 2:1-4, 17.

▸ Psl. 4, par. 12; Psl. 15, par. 17

Kalak Kristen si tuhu-tuhu, la nggunaken kayu persilang i bas nembah Dibata. Engkai?

1. Kayu persilang nggo ndekah ipake i bas agama palsu. Mbarenda igunaken i bas penembahen alam bage pe upacara seks kekafiren. 300 tahun kenca kematen Jesus, kalak Kristen la nggunaken kayu persilang i bas nembah Dibata. Tapi igunaken Kaisar Konstantin Roma jadi lambang Kekristenen gelah Kekristenen terberita. Tapi kayu persilang la lit hubungenna ras Jesus Kristus. The New Catholic Encyclopedia njelasken, ”Kayu persilang nggo lit i bas kebudayan [si nai] sope lenga lit kalak Kristen bage pe agama Kristen.”

2. Jesus labo mate bas kayu persilang. Kata Junani si iterjemahken kayu persilang pada dasarna ngertiken  ”tiang si pinter”, ”kayu”, ntah pe ”sada batang kayu”. The Companion Bible njelasken, ”I bas cakap Junani [Padan si Mbaru] kata enda labo pernah ngertiken dua kayu.” Jesus mate i bas sada tiang.

3. Jahwe la senang adi sisembah Ia alu ngunaken patung-patung ntah pe lambang-lambang.​—Keluaren 20:4, 5; 1 Korinti 10:14.

▸ Psl. 5, par. 12

Jesus merentahken ajar-ajarna guna mperingeti kematenna. Si enda ilakoken tiap tahun i bas tanggal 14 Nisan, tanggal si seri paksa kalak Israel ngerayaken Paskah. Roti ras anggur, si ngelambangken kula ras dareh Jesus ielaken man kerina kalak si reh ku acara e. Kalak si merentah pagi ras Jesus i surga man roti ras minem anggur e. Kalak si pengarapenna nggeluh si rasa lalap i doni, alu mehamat reh ku Peringet-ingeten tapi la man roti ntah pe minem anggur.

▸ Psl. 5, par. 21

I bas Terjemahan Dunia Baru ntah pe NW edisi cakap Inggris, kata ”tendi” banci ngertiken (1) jelma, (2) rubia-rubia, ras (3) kegeluhen sekalak jelma ntah pe rubia-rubia. Enda piga-piga contohna:

• Jelma. I bas jaman Nuah ”lit piga-piga kalak ngenca si i bas perahu e, e me waluh kalak [tendi, NW]; janah kerina selamat arah lau e”. (1 Petrus 3:20) I bas ayat enda kata ”tendi” ngertiken jelma eme Nuah, ndeharana, telu anakna, ras telu permainna.

• Rubia-rubia. ”Nina Dibata, ’Lit lah erbage-bage macam si nggeluh [tendi, NW] ndemi lau ras erbage-bage  perik ndemi awang-awang.’ Nina Dibata, ’Jadi lah i bas taneh nari kerina erbage rubia-rubia si nggeluh [tendi, NW]: kerina erbage asuh-asuhen ras kerina rubia-rubia si meliar, si galang ras kitik.’ Emaka jadi bage.”​—Kejadin 1:20, 24.

• Kegeluhen sekalak jelma ntah pe rubia-rubia. Nina Jahwe man Musa, ”Kerina kalak si munuh kam [munuh tendindu, NW] atena nggo mate.” (Keluaren 4:19) Isuratken Paulus ka, ”La erlatih-latih ikepkepna pertendinndu, sabap ia ertanggung jabap man Dibata.”​—Heber 13:17.

  Selain si e, paksa sekalak jelma ngelakoken sada dahin ’asa tendina’, ertina ilakokenna dahin e alu bulat ukur ras mereken si mehulina.​—Matius 22:37; Ulangen 6:5.

▸ Psl. 6, par. 5; Psl. 15, par. 17

I bas cakap Heber ras Junani kata si iterjemahken ”kesah” bas Terjemahan Dunia Baru edisi cakap Inggris banci la seri ertina. Tapi kerina ngertiken kai si la banci iidah manusia, bagi angin ntah pe kesah manusia ras rubia-rubia. Kata-kata enda pe banci ngertiken gegeh manusia bage pe kesah si badia, tenaga aktif Dibata. Pustaka si Badia labo ngajarken maka lit sada bagin i bas sekalak jelma si tetap nggeluh kenca ia mate.​—Masmur 104:29; Lukas 11:13.

▸ Psl. 6, par. 5; Psl. 15, par. 17

Gehena eme gelar sada baluren deher Jerusalem, ingan sampah-sampah itutung ngasa keri. La lit bukti si ncidahken maka i bas jaman Jesus, rubia-rubia ntah pe manusia isiksa ntah itutung nggeluh-nggeluh i bas baluren enda. Emaka, Gehena labo ngelambangken ingan si la teridah i ja kalak si nggo mate isiksa ras itutung seh rasa lalap. Paksa Jesus ngerana kerna kalak si iambekken ku Gehena, maksudna eme mate tapi lanai ipekeke ntah pe kernep seh rasa lalap.​—Matius 5:22; 10:28, NW.

▸ Psl. 7, par. 20

Enda pertoton si igunaken Jesus paksa ngajari ajar-ajarna uga cara ertoto. Pertoton enda pe igelari pertoton Bapa Kami ntah pe contoh pertoton. Contohna, Jesus ngajari kita gelah notoken:

• ”GelarNdu ipebadia min”

  Kita ertoto gelah Jahwe mpebadiaken gelarNa, i bas kerina guak. Alu bage kerina si lit i surga ras i doni nghamati ras ngergai gelar Dibata.

• ”Reh min KinirajanNdu”

  Kita ertoto gelah pemerentahen Dibata ngkernepken doni Setan si jahat enda, erkuasa i belang-belang doni, ras erbahan doni enda jadi pardis.

• ”Sehlah min peratenNdu i bas doni enda”

  Kita ertoto gelah sura-sura Dibata nandangi doni enda terjadi, janah manusia si patuh ras sempurna banci nggeluh si rasa lalap i Pardis, bali bagi sura-sura Jahwe paksa nepa manusia.

▸ Psl. 8, par. 2

Jahwe nikapken tebusen guna nelamatken manusia i bas dosa ras kematen nari. Tebusen eme erga si igalarken guna ndatken mulihi kegeluhen manusia si sempurna si nggo bene iban Adam, janah guna mpesikap hubungen manusia si nggo ceda ras Dibata Jahwe. Dibata ngutus Jesus ku doni gelah mate guna kerina manusia si erdosa. Emaka, kerina manusia banci nggeluh si rasa lalap selaku manusia si sempurna.

▸ Psl. 8, par. 21; Psl. 9, par. 13

Nubuat i bas Daniel pasal 4 ngajarken maka Dibata majekken KinirajanNa i bas tahun 1914.

Nubuat: Jahwe mereken sada nipi si risiken nubuat man Raja Nebukadnesar kerna sada batang kayu si mbelin si itabah. I bas nipi e, ituriken maka tongkeh batang kayu e iiket alu besi ras tembaga gelah la banci turah seh ngasa ’pitu paksa’. Kenca si e, batang kayu e turah mulihi.​—Daniel 4:1, 10-16.

Erti nubuat enda: Batang kayu e ngertiken pemerentahen Dibata. Ertahun-tahun dekahna, Jahwe nggunaken raja-raja i Jerusalem guna merentah Israel. (1 Kronika 29:23) Tapi raja-raja e la setia, emaka kalak e lanai niijinken merentah. Jerusalem ikernepken bas tahun 607 SM, i je me ibenaken ’pitu paksa’. (2 Raja-Raja 25:1, 8-10; Esekiel 21:25-27) Paksa ikataken Jesus, ”Jerusalem italuken kalak si la nandai Dibata seh pagi genep paksa si enggo itetapken Tuhan”, maksudna eme ’pitu paksa’ e. (Lukas 21:24) Emaka, kedungen ’pitu paksa’ e labo sanga Jesus i doni. Jahwe erjanji maka itangkuhkenNa sada  raja i bas pendungi ’pitu paksa’ e. Pemerentahen Raja si mbaru enda, Jesus, ngerehken pasu-pasu si simpar pagi man juak-juak Dibata i belang-belang doni seh rasa lalap.​—Lukas 1:30-33.

Dekahna ’pitu paksa’ e: ’Pitu paksa’ dekahna eme 2.520 tahun. Adi sikira 2.520 tahun mulai tahun 607 SM nari dabuhna eme i bas tahun 1914. I bas tahun enda me Jahwe nangkuhken Jesus, Mesias, jadi Raja i bas Kinirajan Dibata i surga.

Janari banci sidatken jumlah 2.520? Pustaka si Badia ngataken maka telu setengah paksa seri ras 1.260 wari. (Ketangkasen 12:6, 14) Emaka ’pitu paksa’ eme dua kali jumlah si e, ntah pe 2.520 wari. Jadi, 2.520 wari seri ras 2.520 tahun sentudu ras aturen nubuat, ”tep-tep wari ikira sada tahun”.​—Bilangen 14:34; Esekiel 4:6.

▸ Psl. 8, par. 23

Kata ”pengulu malekat” ertina eme ”kepala malekat”. I bas Pustaka si Badia sekali ngenca itulisken kerna pengulu malekat, gelarna eme Mikael.​—Daniel 12:1; Judas 9.

Mikael eme pemipin tentera Dibata, malekat-malekat si setia. Nina Ketangkasen 12:7, ”Mikael ras malekat-malekatna erperang ngelawan naga e . . . ras malekat-malekatna.” Buku Ketangkasen ngataken maka Peminpin tentera Dibata eme Jesus, emaka Mikael e gelar Jesus si deban.​—Ketangkasen 19:14-16.

▸ Psl. 9, par. 4

Istilah enda ngertiken sada periode waktu paksa kejadin-kejadin penting terjadi bas doni enda sope Kinirajan Dibata ngkernepken doni Setan. Istilah si  deban bagi ”kedungen jaman enda” ras ”kerehen anak manusia”, igunaken i bas nubuaten Pustaka si Badia janah ngertiken periode waktu si seri. (Matius 24:3, 27, 37) ”Wari-wari pendungi” ibenai paksa Kinirajan Dibata mulai merentah i surga i bas tahun 1914 janah idungi paksa doni Setan enda ikernepken bas Harmagedon.​—2 Timotius 3:1; 2 Petrus 3:3.

▸ Psl. 9, par. 5

Paksa ipegeluh Dibata mulihi kalak si nggo mate, e igelari kinikeken. Lit siwah kinikeken si icatat i bas Pustaka si Badia. Elia, Elisa, Jesus, Petrus, ras Paulus pernah mpekeke kalak mate. Mukjizat enda banci terjadi erkiteken gegeh Jahwe ngenca. Ia erjanji guna mpekeke ”subuk kalak si bujur bage pe kalak si la bujur” guna nggeluh i doni. (Perbahanen Rasul-Rasul 24:15) Pustaka si Badia ngataken maka lit ka kinikekeken ku surga. Enda terjadi paksa kalak si ipilih, ntah pe si iminaki Dibata ipekeke guna nggeluh ras Jesus i surga.​—Johanes 5:28, 29; 11:25; Pilipi 3:11; Ketangkasen 20:5, 6.

▸ Psl. 9, par. 13

Demonisme ntah pe spiritisme eme perbahanen si la mehuli guna ncubaken ngerana ras begu-begu, secara langsung ntah pe erkelangken tukang sihir, dukun ntah pe guru si baso. Kalak ngelakoken spiritisme erkiteken tek nandangi ajaren palsu maka lit denga tendi kalak si nggo mate si banci jadi begu. Begu-begu pe icubakenna mpengaruhi manusia gelah la patuh man Dibata. Si termasuk i bas bentuk-bentuk demonisme eme ilmu perbintangen, ilmu ramal, ilmu sihir, ilmu gaib, takhayul ras si debanna. Melala buku, majalah, ramalen bintang,  film, gambar-gambar, bage pe lagu-lagu erban si enda kerina tempa-tempa la bahaya ntah pe menarik. Lit piga-piga adat istiadat i bas acara penguburen si lit hubungenna ras begu-begu, misalna erban cibal-cibalen man kalak mate, nggendangi kalak mate, naruhken bunga i bas wari-wari tertentu, ntah pe njagai mait segedang berngi.​—Galati 5:20; Ketangkasen 21:8.

▸ Psl. 10, par. 10; Psl. 16, par. 4

Jahwe eme Dibata si Mada Kuasa, janah Ia si nepa kerina si nasa lit. (Ketangkasen 15:3) Eme sabapna Ia si mpuna si nasa lit janah lit kedolatenNa, ntah pe wewenangNa guna merentah tinepaNa. (Masmur 24:1; Jesaya 40:21-23; Ketangkasen 4:11) IbahanNa peraturen man kerina tinepaNa. Lit ka hakNa nangkuhken kalak si deban jadi penguasa. Banci sidukung kedolaten Dibata adi sikelengi ras sipatuhi Ia.​—1 Kronika 29:11.

▸ Psl. 11, par. 10

Aborsi eme sada perbahanen si isengaja munuh anak si lenga tubuh. Tapi penyebabna labo erkiteken kecelakan ntah pe reaksi alami (kelemahen) kula manusia. Kenca pembuahen, sekalak anak labo jadi sada bagin si deban i bas kula nandena saja. Tapi nggo jadi sekalak jelma.

▸ Psl. 13, par. 5

Enda sada prosedur medis guna mindahken dareh utuh ntah pe salah sada i bas empat komponen utama dareh i bas kula sekalak jelma ku kula kalak si deban. Ntah pe  mindahken dareh si nggo isimpan ku kula kalak si deban. Empat komponen utama dareh eme plasma, sel dareh merah, sel dareh putih, ras keping dareh.

▸ Psl. 13, par. 13

I bas Pustaka si Badia kata ”disiplin” labo sekadar ngertiken ukumen. Paksa kita idisiplin, kita ibimbing, iajari, ras ikoreksi. Jahwe la pernah kasar ntah pe kejam man kalak si idisiplinNa. (Kuan-kuanen 4:1, 2) IberekenNa contoh si mejile man orang tua. Disiplin si ibereNa mbelin gunana, eme si erbahanca kalak ngergai disiplin e. (Kuan-kuanen 12:1) Jahwe ngkelengi umatNa janah iajariNa kalak e. IberekenNa bimbingen guna mpehuli perukuren si salah janah nampati kalak e gelah banci rukur ras ertindak sentudu ras si ngena ateNa. Orang tua, mereken disiplin termasuk nampati anak-anakndu ngangkai alasen ngkai maka ia arus patuh. Kam pe arus ngajari ia gelah ngkelengi Jahwe, Pustaka si Badia janah ngangkai prinsip-prinsipna.

▸ Psl. 14, par. 13

Kalak enda eme mahluk roh si jahat, si la teridah, janah seh kal gegehna. Begu-begu eme malekat-malekat jahat. Kalak enda jadi jahat paksa mberontak ngelawan Dibata. (Kejadin 6:2; Judas 6) Kalak enda ikut i bas pemberontaken Setan guna ngelawan Jahwe.​—Ulangen 32:17; Lukas 8:30; Perbahanen Rasul-Rasul 16:16; Jakup 2:19.

▸ Psl. 16, par. 4