1, 2. Kai penungkunen nterem kalak?

TSUNAMI ngkernepken sada kuta. Sekalak dilaki nembaki sada gereja, nterem jelma luka-luka ras mate. Sekalak diberu mate erkiteken penakit kanker, nadingken lima anakna.

² Paksa bencana alam ntah pe kejadin si la mehuli si bage terjadi, nterem kalak nungkun, ”Engkai maka bage?” Melala si nungkun ngkai maka doni enda dem alu ate segat bage pe kiniseran. Pernah nge bage penungkunenndu?

3, 4. (a) Kai penungkunen Habakuk? (b) Uga Jahwe njabapsa?

³ I bas Pustaka si Badia, lit ka kalak si setia si bage ka penungkunenna. Contohna, nabi Habakuk nungkun man Jahwe, ”Engkai maka ipediatNdu kuidah kejahaten? Uga maka ngasup Kam natap-natap kelepaken si bage kelekna? Encedai, sigegeh-gegeh kerina i sekelewetku; perubaten ras perjengilen i japa pe.”​—Habakuk 1:3.

⁴ I bas Habakuk 2:2, 3, banci sioge kai jabapen Dibata man penungkunen Habakuk janah Ia erjanji maka ipehulina keadan e. Keleng kal ate Jahwe manusia. Pustaka si Badia ngataken, ”Ia kap si mperdiateken kam.” (1 Petrus 5:7) Situhuna, segaten ate Jahwe ngidah kerina kiniseran e asangken kita. (Jesaya 55:8, 9) Emaka, mari sipelajari sada penungkunen, Engkai maka melala kal kiniseran i doni enda?

5. Kai si ikataken guru-guru agama kerna kiniseran? Kai nina Pustaka si Badia?

⁵ Rusur ikataken pastor, pendeta, ras guru-guru agama, kerina kiniseran manusia e peraten Dibata. Piga-piga ngatakenca kerina si terjadi i bas sekalak jelma, termasuk kejadin si la mehuli, nggo isuratken Dibata janah la pernah banci sieteh alasenna. Si debanna ka ngatakenca, manusia termasuk anak-anak, mate gelah tading ras Dibata i surga. Tapi enda la tuhu, labo Jahwe si erbahanca. Nina Pustaka si Badia, ”Nggit kin Dibata si Mada Kuasa mahan si salah? Tentu lang.”​—Jop 34:10, 11.

6. Engkai maka nterem jelma nalahken Dibata kerna kiniseran si terjadi i doni enda?

⁶ Enterem kalak nalahken Dibata kerna kiniseran si terjadi i doni enda, erkiteken iakapna Dibata penguasa doni. Tapi bagi si nggo sipelajari bas Pasal 3, penguasa doni enda eme Setan si Iblis.

7, 8. Engkai maka melala kal kiniseran bas doni enda?

⁷ Nina Pustaka si Badia ”kerina doni enda lit i bas kuasa si Jahat e”. (1 Johanes 5:19) Penguasa doni enda, Setan, jahat dingen kejam. Ia si ”nipu i belang-belang doni enda”. (Ketangkasen 12:9) Enterem jelma ngusih ia. Eme salah sada alasen ngkai maka doni enda dem alu tipun, ate segat, bage pe kekejamen.

⁸ Lit alasen si deban ngkai maka melala kal kiniseran i doni enda. Kenca Adam ras Hawa mberontak isusurkenna dosa man anak-anakna. Erkiteken dosa, manusia banci erban manusia si deban ngenanami kiniseran. Jagon atena rusur ia asangken jelma si deban. Kalak e rubati, perang, ras itindasna jelma si deban.  (Pengerana 4:1; 8:9) Maun-maun manusia ngenanami kiniseran erkiteken ”kerina nge kalak banci kena sial”. (Pengerana 9:11) Paksa kalak e lit i bas ingan ntah pe waktu si salah, kecelakan ras kejadin si la mehuli banci terjadi man bana.

9. Kai si erbahanca kita tek maka lit alasen si tepat ngkai maka ipediat Jahwe kiniseran terjadi?

⁹ Jahwe la pernah erban kiniseran. Jahwe la banci isalahken adi terjadi perang, kejahaten, ras penindasen. Labo Ia si erbanca bencana alam bagi linur, angin topan, bage pe banjir. Tapi banci saja kam tersungkun-sungkun, ’Adi Jahwe nge si megegehNa bas alam semesta enda, ngkai maka la ipengadiNa kerina kejadin si la mehuli?’ Sieteh maka keleng kal ate Dibata kita, emaka pasti lit alasen si tepat ngkai maka ipediatNa kiniseran terus terjadi.​—1 Johanes 4:8.

10. Kai tuduhen Setan man Jahwe?

¹⁰ I bas peken Eden, Iblis nipu Adam ras Hawa. Setan nuduh Dibata selaku penguasa si jahat. Ikatakenna Dibata la mereken kai si mehuli man Adam ras Hawa. Ate Setan gelah kalak enda tek maka ulin ia asangken Jahwe si jadi penguasa, janah kalak enda la perlu Dibata.​—Kejadin 3:2-5; nehen Penjelasen tambahen 27.

11. Penungkunen kai si perlu sijabap?

¹¹ Adam ras Hawa la patuh man Jahwe janah mberontak nentang Ia. Kalak enda erpengakap banci itentukenna kai si benar ras si salah man dirina. Uga Jahwe banci mbuktiken maka penentang e salah janah Ia ngenca si meteh kai si mehulina man banta?

12, 13. (a) Engkai maka la mis ikernepken Jahwe penentang e? (b) Engkai maka Jahwe mpediat Setan ngkuasai doni enda janah manusia merentah dirina?

 ¹² Jahwe la mis ngkernepken Adam ras Hawa. Tapi ipediatNa lit kesusuren kalak enda. Alu bage Jahwe mereken kesempaten man anak-anak Adam ras Hawa guna milih ise atena si jadi penguasana. Sura-sura Jahwe eme gelah doni enda dem alu manusia si sempurna, janah enda pasti terjadi la soal kai si ilakoken Iblis.​—Kejadin 1:28; Jesaya 55:10, 11.

¹³ Setan nentang Jahwe i lebe-lebe jutan malekat. (Jop 38:7; Daniel 7:10) Emaka ibereken Jahwe waktu man Setan guna mbuktiken payo ntah lang tuduhenna e. IberekenNa ka waktu man manusia guna merentah bana i bas pengaruh Setan gelah teridah banci ntah lang kalak enda berhasil adi la lit penampat Dibata.

14. Ribun tahun manusia nggo merentah dirina, kai hasilna?

¹⁴ Enggo ribun tahun icubaken manusia merentah dirina, tapi gagal. Setan terbukti perbual. Manusia perlu penampat Dibata. Payo si ituriken nabi Jeremia paksa ikatakenna, ”Kueteh O [JAHWE], maka labo manusia si nentuken nasipna; labo manusia si engkuasai geluhna.”​—Jeremia 10:23.

15, 16. (a) Engkai maka ipediat Jahwe bage dekahna kiniseran terjadi? (b) Engkai maka lenga imasapken Jahwe perbeben si ibahan Setan?

¹⁵ Engkai maka bage dekahna ipediat Jahwe kiniseran terjadi? Engkai maka la ipengadiNa saja hal-hal si la mehuli? Iperluken waktu guna mbuktiken maka  pemerentahen Setan e nggo gagal. Enggo icubaken manusia erbage-bage pemerentahen, kerina gagal. Kalak e nggo erban kemajun i bas ilmu pengetahuan ras teknologi. Tapi gundari reh lalana kinilaadilen, kalak si musil, kejahaten, bage pe perang. Kita la banci berhasil merentah dirinta adi la isampati Jahwe.

¹⁶ Perbeben si ibahan Setan lenga isasapken Jahwe erkiteken adi ilakokenNa e berarti isampatiNa pemerentahen Setan, janah Jahwe la pernah nggit ngelakoken e. Selain si e, manusia banci saja erpengakap ia nggo berhasil merentah bana. Tapi enda labo tuhu, Jahwe la nggit nampati kalak e. Dibata la pernah erbual.​—Heber 6:18.

17, 18. Kai nge pagi si ilakoken Jahwe nandangi kerina si nggo icedaken Setan?

¹⁷ Banci nge ipehuli Jahwe kerina si ceda si terjadi erkiteken pemberontaken Setan ras manusia? Banci. Kai pe banci ilakoken Dibata. IetehNa ndigan kerina tantangen Setan e banci tuhu-tuhu ijabap. Kenca si e, banNa doni enda jadi pardis bali bagi sura-suraNa si pemena. Kerina ”kalak mate si i bas kuburen” ipekeke pagi. (Johanes 5:28, 29) Manusia lanai pernah banci sakit ntah pe mate. Ipehuli Jesus pagi kerina si nggo ceda ibahan Setan. Igunaken Jahwe pagi Jesus guna ”ngkernepken pendahin Iblis”. (1 Johanes 3:8) Bujur kal sikataken man Jahwe erkiteken nggo sabar Ia man banta. Alu bage, banci sitandai Ia janah sipilih jadi penguasanta. (Oge 2 Petrus 3:9, 10.) Amin gia kita ngenanami kiniseran, isampatiNa kita gelah ngasup ngadapisa.​—Johanes 4:23; oge 1 Korinti 10:13.

 ¹⁸ La ipaksa Jahwe kita milih Ia jadi Penguasanta. IberekenNa man banta kebebasen guna milih. Mari sinehen kai ertina pemere enda.

19. Pemere si luar biasa kai si ibereken Jahwe man banta? Engkai maka bujur kal sikataken erkiteken pemere e?

¹⁹ Pemere Jahwe si luar biasa eme kebebasen guna milih si erbanca kita la seri ras rubia–rubia. Kai si ilakoken rubia-rubia erkiteken nalurina, tapi kita banci milih uga ateta ndalani kegeluhenta janah milih erban Jahwe senang ntah lang. (Kuan-kuanen 30:24) Selain si e, kita la bagi mesin si ngelakoken kai pe erkiteken iperentahken. Lit kebebasenta milih jadi jelma si uga ateta, ise temanta, janah kai ateta silakoken i bas geluhta. Ate Jahwe gelah kita nggeluh ermeriah ukur.

20, 21. Kai pilihen si mehulina kal si banci ibahanndu gundari?

²⁰ Ate Jahwe gelah sikelengi Ia. (Matius 22:37, 38) Meriah ukur sekalak bapa paksa ikataken anakna ”keleng ateku kam pa” erkiteken katakenna bas pusuh nari labo terpaksa. Jahwe pe bage. Ibereken Jahwe kebebasen man banta guna ngelayani Ia ntah lang. Setan, Adam, ras Hawa milih la patuh man Jahwe. Uga kam nggunaken kebebasenndu guna milih?

²¹ Pilihlah ngelayani Jahwe. Lit jutan jelma si deban si nggo milih ngelayani Jahwe janah nulak Setan. (Kuan-kuanen 27:11) Kai si perlu ilakokenndu gundari gelah banci nggeluh i doni si mbaru si ijanjiken Dibata paksa lanai pagi lit kiniseran? I bas pasal selanjutna banci sidat jabapenna.