1, 2. (a) Kai nge si erbahanca sada pemere banci erguna man bandu? (b) Engkai maka tebusen sada pemere si mehergana kal i bas Dibata nari?

KAI pemere si mehulina kal si pernah ialokenndu? Sada pemere la arus meherga gelah erguna. Adi pemere e erban meriah ukurndu ntah pe tuhu-tuhu iperlukenndu, pasti ngataken bujur kal kam kerna si e.

² I bas kerina pemere Dibata, lit sada pemere si tuhu-tuhu kal siperluken. I bas pasal enda banci sipelajari kerna uga Jahwe ngutus anakNa, Jesus Kristus guna jadi tebusen, gelah kita banci nggeluh si rasa lalap. (Oge Matius 20:28.) Alu ngutus Jesus ku doni, ibuktiken Jahwe maka ia tuhu-tuhu ngkelengi kita.

3. Engkai maka manusia mate?

³ Kai kin tebusen e? Tebusen eme cara si igunaken Jahwe mbebasken manusia i bas dosa ras kematen nari. (Epesus 1:7) Gelah sieteh ngkai maka tebusen iperluken, arus sieteh kai si terjadi i peken Eden ribun tahun si nggo lewat. Orang tuanta, Adam ras Hawa, nggo erdosa. Erkiteken nggo erdosa, mate me ia. Anak-anakna pe mate ka perban nggo iwarisina dosa i bas Adam ras Hawa nari.​—Nehen Penjelasen tambahen 9.

4. Ise kin Adam e, ras kai saja si ibereken bana?

⁴ Paksa Jahwe nepa manusia si pemena, Adam, iberekenNa  pemere si meherga kal. Eme kap kegeluhen manusia si sempurna. Perukuren ras dagingna sempurna. Adam la pernah banci sakit, la banci metua janah la banci mate. Erkiteken Jahwe si nepa ia, Dibata bagi sekalak bapa man bana. (Lukas 3:38) Jahwe rusur ngerana ras Adam. IturikenNa man Adam kai si niarapkenNa i bas ia nari janah berekenNa pendahin si erban meriah ukurna.​—Kejadin 1:28-30; 2:16, 17.

5. Kai ertina Adam itepa ”sentudu ras tempas Dibata”?

⁵ Adam itepa ’sentudu ras tempas Dibata’. (Kejadin 1:27) Ibereken Jahwe bana sifat-sifat si bali bagi sifatNa, contohna kekelengen, kepentaren, keadilen, ras kuasa. IberekenNa kebebasen erbahan pilihen. Adam la bagi robot. Banci ipilihna kai si benar ntah pe si salah. Adi patuh man Dibata, ia banci nggeluh si rasa lalap i Pardis.

6. Kai si nggo bene iban Adam paksa ia la patuh man Dibata? Kai pengaruhna man banta?

⁶ Paksa Adam la patuh man Dibata janah iukum mate, bene me hubungenna si rembak ras Jahwe, kegeluhenna si sempurna, ras rumahna i Pardis. (Kejadin 3:17-19) Jadi, tuhu-tuhu meherga kal si arus igalari Adam kerna perbahanenna e. Ipilihna la patuh man Dibata, emaka lanai lit arapenna. Erkiteken kai si ilakoken Adam, ”dosa enggo ngkenai kerina manusia ibas doni enda arah sekalak manusia, janah dosana e maba kematen. Erkiteken si e kematen enggo ngelangketi kerina manusia, sabap tep-tep kalak enggo erdosa”. (Roma 5:12) Paksa Adam erdosa, ’idayakenna’ dirina ras kita kerina jadi budak dosa bage pe kematen. (Roma 7:14) Lit nge arapenta? Lit.

7, 8. Kai ertina tebusen?

 ⁷ Kai kin tebusen e? Situhuna lit dua ertina. Pemena, tebusen eme erga si igalari guna mbebasken sekalak jelma ntah pe guna ndatken mulihi barang si nggo igadeken. Peduaken, tebusen eme erga si nutupi ntah pe si nggalari sada barang.

⁸ La lit manusia si banci nggalari kerugin si ibahan Adam paksa ia erdosa. Kerina kesusurenna ikut erdosa janah dungna mate. Tapi Jahwe nggo nikapken cara guna mbebasken kita i bas dosa ras kematen nari. Mari sipelajari uga carana ras kai gunana man banta.

9. Alu kai tebusen banci igalari?

⁹ Asa ndigan pe manusia la banci nggalari tebusen guna ndatken kegeluhen si sempurna si nggo ibeneken Adam. Engkai? Erkiteken kita kerina la sempurna. (Masmur 49:7, 8) Tebusen arus igalari alu kegeluhen manusia si sempurna. Pustaka si Badia ngataken maka Jesus ”enggo ngasamken kesahna”. (1 Timotius 2:6) Kegeluhen si sempurna si ikorbanken Jesus seri ergana ras kegeluhen si nggo ibeneken Adam.

10. Uga carana Jahwe nikapken tebusen?

¹⁰ Uga carana Jahwe nikapken tebusen? Jahwe ngutus Jesus, anakNa si tonggal ku doni. (1 Johanes 4:9, 10) Jesus nggit nadingken Bapana ras rumahna i surga. (Pilipi 2:7) Jahwe mindahken kegeluhen Jesus i surga nari ku doni, janah tubuh jadi manusia si sempurna si la lit dosana.​—Lukas 1:35.

11. Uga maka banci sekalak jelma jadi tebusen man kerina manusia?

¹¹ Paksa manusia si pemena, Adam, la patuh man Jahwe ibenekenna kegeluhen si sempurna si arusna  banci iberekenna man kesusurenna. Banci nge jelma si deban nasapken kematen kerina kesusuren Adam? Banci. (Oge Roma 5:19.) Jesus si la pernah erdosa, mereken kegeluhenna si sempurna guna jadi tebusen. (1 Korinti 15:45) Kegeluhenna si sempurna banci erguna nasapken kematen kerina kesusuren Adam.​—1 Korinti 15:21, 22.

12. Engkai maka Jesus arus ngenanami kiniseran si seh kal mberatna?

¹² Pustaka si Badia nuriken uga suina iakap Jesus sope ia mate. Ia iligasi alu kejam, ipakuken i tiang siksan, janah mesui kal iakapna nandangi mate. (Johanes 19:1, 16-18, 30) Engkai maka arus bage kal suina? Erkiteken ikataken Setan maka la lit manusia si banci setia man Dibata adi ngenanami percuban si mberat. Tapi, Jesus mbuktiken maka manusia si sempurna banci tetap setia man Dibata aminna pe ngenanami kiniseran si seh kal mberatna. Bayangken uga riahna akap Jahwe ngidah Jesus!​—Kuan-kuanen 27:11; nehen Penjelasen tambahen 15.

13. Uga carana tebusen igalari?

¹³ Uga tebusen e igalari? Jesus mereken man Bapana kegeluhenna si sempurna. I bas tahun 33, tanggal 14 Nisan i kalender Jahudi, ipediat Jahwe musuh-musuh Jesus munuh ia. (Heber 10:10) Telu wari kenca si e, Jahwe mpekeke Jesus janah iberekenNa kula bagi malekat. Paksa Jesus mulih ku Bapana i surga, iberekenna nilai kegeluhen manusiana si sempurna man Jahwe guna jadi tebusen. (Heber 9:24) Erkiteken tebusen nggo igalari, lit kesempatenta banci pulah i bas dosa ras kematen nari.​—Oge Roma 3:23, 24.

14, 15. Kai si arus silakoken gelah dosa-dosanta ialemi?

¹⁴ Mari sinehen kai gunana man banta gundari bage pe i bas wari si pepagi.

¹⁵ Dosa-dosanta nggo ialemi. Mesera siakap terus ngelakoken kai si benar. Kita erbahan kesalahen i bas pengerananta bage pe perbahanenta. (Kolose 1:13, 14) Uga kita banci ialemi? Kita arus tuhu-tuhu erkadiola nandangi kesalahen si nggo siban janah alu meteruk rukur mindo gelah Jahwe ngalemi kita. Kenca si e, banci kita tenang erkiteken dosa-dosanta nggo ialemi.​—1 Johanes 1:8, 9.

16. Kai si arus silakoken gelah dame pusuh peratenta?

¹⁶ Pusuh peratenta banci dame. Adi kita erban salah, pusuh peratenta nalahken kita. Banci saja lanai lit arapenta ras lanai siakap meherga banta. Tapi ula kita nerah. Adi sipindo gelah Jahwe ngalemi kita, banci kita tek maka ibegikenNa janah ialemiNa salahta. (Heber 9:13, 14) Ate Jahwe gelah situriken kerina perbeben ras kelemahenta man baNa. (Heber 4:14-16) Asilna kita banci rembak ras Dibata.

17. Pasu-pasu kai si banci sidatken erkiteken Jesus mate guna man banta?

¹⁷ Lit arapenta nggeluh si rasa lalap. ”Sabap upah dosa eme kematen; tapi pemere si ibereken Dibata man banta eme kegeluhen si rasa lalap i bas persadan ras Kristus Jesus.” (Roma 6:23) Erkiteken Jesus mate guna man banta, kita banci nggeluh si rasa lalap janah lanai sakit. (Ketangkasen 21:3, 4) Tapi, kai si arus silakoken gelah banci ndatken pasu-pasu e?

18. Janari banci sieteh Jahwe ngkelengi kita?

¹⁸ Ukurken uga riahna akapndu paksa lit sekalak jelma mereken sada pemere si mehuli man bandu. I bas kerina pemere Dibata, tebusen pemere si mehergana kal. Erkiteken e, arus sikataken mbue bujur man Dibata. Johanes 3:16 ngatakenca, ”Sabap bage pengkelengi Dibata doni enda, emaka iberekenNa anakNa si tonggal.” Jelas me, keleng kal ate Jahwe kita emaka iberekenNa anakNa, Jesus. Janah sieteh maka Jesus pe ngkelengi kita, perban ia nggit mate guna kita. (Johanes 15:13) Tentu saja, tebusen e pasti erbahan kam tek maka Jahwe ras Jesus tuhu-tuhu ngkelengi kam.​—Galati 2:20.

19, 20. (a) Uga carana kam banci jadi teman Dibata? (b) Uga carana kam banci ncidahken maka ialokenndu korban tebusen Jesus?

¹⁹ Gundari kam nggo erlajar kerna kekelengen Jahwe si mbelin. Adi bage, uga kam banci jadi temanNa? La menukah ngkelengi sekalak jelma si la itandaindu. Johanes 17:3 ngataken maka banci sitandai Jahwe. Adi tandaindu Ia, kekelengenndu man baNa reh bagesna, kam pe ersura-sura erban meriah ukurNa ras banci kam jadi temanNa. Emaka, teruslah erlajar kerna Jahwe alu mpelajari Pustaka si Badia.​—1 Johanes 5:3.

²⁰ Aloken korban tebusen Jesus. Nina Pustaka si Badia, ”Ise tek man anak e ialokenna me kegeluhen situhu-tuhu si la erkeri-kerin.” (Johanes 3:36) Kai ertina erkiniteken? Ertina ngelakoken kai si niajarken Jesus man banta. (Johanes 13:15) Erkiniteken man Jesus labo bias cakap saja. Guna ngaloken tebusen, perbahanenta arus sentudu ras kinitekenta. Nina Jakup 2:26, ”Kiniteken la rikut ras perbahanen mate kap.”

21, 22. (a) Engkai maka arus kita reh ku acara Peringet-ingeten Kematen Jesus tep-tep tahun? (b) Kai si banci sipelajari i bas Pasal 6 ras 7?

 ²¹ Rehlah ku acara Peringet-ingeten Kematen Jesus. Berngi sope Jesus mate, iperentahkenna gelah siperingeti kematenna. Silakoken enda tep-tep tahun, janah igelari Peringet-ingeten ntah pe Perjamun Berngi Tuhan. (1 Korinti 11:20; Matius 26:26-28) Ate Jesus gelah siinget maka ia nggo mereken kegeluhenna si sempurna jadi tebusen guna kita. Nina Jesus, ”Bahanlah bagenda guna peringet-ingeten man bangku.” (Oge Lukas 22:19.) Paksa kam reh ku acara e, icidahkenndu maka iergaindu tebusen e janah iingetndu uga belinna kekelengen Jahwe ras Jesus man banta.​—Nehen Penjelasen tambahen 16.

²² Tebusen pemere si mehergana kal si pernah sialoken. (2 Korinti 9:14, 15) Pemere enda pe mbelin kal gunana man jutan jelma si nggo mate. I bas Pasal 6 ras 7 banci sipelajari kerna si e.