1, 2. Ku ja banci sidarami perlindungen gundari?

BAYANGKEN paksa kam erdalan reh me angin si meter. Langit reh gelapna, lit kilap, janah terbegi sora lenggur. Kenca e reh udan si meder. Idaramindu ingan cio. Paksa nggo datndu, tenang kal ukurndu!

² Bali bagi situasinta gundari. Keadan doni enda reh serana kal. Banci saja kam nungkun ku ja nge banci kudarami perlindungen? Nina penulis buku Masmur, ”Banci ikatakenna man [JAHWE], ’Kam kap inganku cicio dingen sekawalku, Dibatangku, man baNdu kap aku ernalem.’” (Masmur 91:2) Jahwe banci mereken penampat i bas perbebenta, ras mereken arapen si luar biasa i bas wari si pepagi.

3. Uga Jahwe ngkawali kita?

³ Uga Jahwe ngkawali kita? Ia banci nampati kita i bas ngadapi perbeben. Ndauh gegehen Ia asa ise pe si banci ncilakai kita. Amin gia kita ngadapi kiniseran gundari, banci kita tek maka pasti nge ipepasap Jahwe pagi. Pustaka si Badia nuruh kita, ”Tetaplah kam i bas keleng ate Dibata.” (Judas 21) Seh kal perluna tetap ndeher ras Jahwe guna ndatken penampatNa i bas masa si seh kal serana enda. Tapi uga cara ngelakokenca?

4, 5. Uga cara Jahwe ncidahken kekelengenNa?

⁴ Gelah banci tetap ndeher ras Jahwe, arus sisedari maka keleng kal ateNa kita. Ukuri kerina si nggo  ibereken Jahwe. Contohna, doni si risiken rubia-rubia ras sinuan-sinuan si mejile, pangan si seh kal tabehna ras lau si meciho si man inemen. Arah Pustaka si Badia, Jahwe mpebetehken gelar ras sifat-sifatNa si luar biasa. Si mbelinna, icidahkenNa kekelengenNa alu ngutus anak si ikelengiNa, Jesus, ku doni guna mereken kegeluhenna banta. (Johanes 3:16) Janah erkiteken tebusen e, banci sidatken masa depan si luar biasa.

⁵ Jahwe erban Kerajan Mesianik, sada pemerentahen i surga si nandangi nasapken kerina kiniseran. Kerajan enda pagi erban doni jadi pardis, i je kerina jelma tading i bas dame ras ermeriah ukur seh rasa lalap. (Masmur 37:29) Jahwe pe ngajari kita uga carana ndalani kegeluhen si terulin gundari. IundangNa ka kita gelah ertoto, janah pasti ibegikenNa. Alu jelas Jahwe ncidahken maka Ia ngkelengi kita.

6. Uga carana kam ngergai kekelengen Jahwe?

⁶ Uga carana kam ngergai kekelengen Jahwe? Cidahken pengataken bujurndu. Tapi seh kal sayangna, gundari nterem kalak la meteh ngataken bujur. Bali bagi paksa Jesus i doni, ipepalemna sepuluh kalak gadamen tapi sekalak ngenca si ngataken bujur. (Lukas 17:12-17) Pasti ateta bali bagi dilaki si ngataken bujur man Jesus. Terus ateta ngataken bujur man Jahwe.

7. Uga arusna kita ngkelengi Jahwe?

⁷ Kita pe perlu ncidahken kekelengenta man Jahwe. Jesus mpebetehken man ajar-ajarna maka kalak e arus ngkelengi Jahwe asa ukurna, asa tendina, dingen asa gegehna lit. (Oge Matius 22:37.) Kai ertina si e?

8, 9. Uga carana kita ncidahken kekelengenta man Jahwe?

⁸ Bias kin ngaku keleng saja man Jahwe? Lang. Adi keleng ateta Jahwe asa ukurta lit, asa tendinta, dingen  asa gegehta, banci sicidahken arah perbahanenta. (Matius 7:16-20) Alu tangkas Pustaka si Badia ngajarken maka adi sikelengi Dibata, sipatuhi perentah-perentahNa. Mesera nge matuhisa? Lang. Perban ”perentah-perentah e labo mberat”.​—Oge 1 Johanes 5:3.

⁹ Adi kita patuh man Jahwe, pasti kita puas ras ermeriah ukur. (Jesaya 48:17, 18) Tapi kai nge si banci nampati kita gelah tetap ndeher ras Jahwe? Mari sipelajari.

10. Engkai maka kita arus terus erlajar kerna Jahwe?

¹⁰ Uga kam banci jadi teman Jahwe? Alu erlajar Pustaka si Badia banci lebih itandaindu Jahwe janah banci kam jadi temanNa. Hubungen si rembak ras Jahwe bali bagi api si perlu terus ijaga gelah tetap gara. Api merluken ranting gelah tetap gara, bage ka pe gelah tetap rembak ras Jahwe, kita arus terus erlajar kerna Ia.​—Kuan-kuanen 2:1-5.

11. Uga penggejapenndu asum erlajar Pustaka si Badia?

¹¹ Asum kam terus erlajar Pustaka si Badia, pelajaren e banci ngkenai pusuhndu. Perdiateken uga penggejapen dua ajar-ajar Jesus paksa ijelaskenna nubuat Pustaka si Badia. Nina kalak e, ”Ma malem kal tuhu ateta dingen ergiah-giah ukurta asum ia ngerana ras kita i gedang-gedang dalan dingen iterangkenna man banta kerna isi Pustaka si Badia?”​—Lukas 24:32.

12, 13. (a) Kai nge si banci terjadi adi la sijaga kekelengenta man Dibata? (b) Uga cara njagasa?

¹² Bali bagi penggejapen ajar-ajar ndai, banci saja penggejapenndu pe bage paksa mulai iantusindu isi Pustaka si Badia. Enda banci nampati kam nandai Jahwe ras ngkelengi Ia. Pasti la atendu erkurangna kekelengenndu man Jahwe.​—Matius 24:12.

 ¹³ Kenca jadi teman Dibata, teruslah usahaken gelah hubungenndu ras Jahwe tetap paguh. Kam arus terus erlajar kerna Ia ras Jesus bage pe ngukuri kai si nggo ipelajarindu janah uga kam banci ndalankenca i bas kegeluhenndu. (Johanes 17:3) Paksa kam ngoge ntah pe erlajar Pustaka si Badia, sungkuni bandu, ’Kai si banci kupelajari kerna Jahwe? Engkai maka arus kukelengi Jahwe asa ukurku dingen tendingku lit?’​—1 Timotius 4:15.

14. Uga pertoton mpeteguh kekelengenta man Jahwe?

¹⁴ Adi kam erteman ras sekalak jelma, pasti kam ngerana ras ia alu ratur, si enda banci erban hubungen kena tetap paguh. Bage ka pe, paksa kita ngerana man Jahwe alu ratur i bas pertoton, si e erbahanca kekelengenta man baNa erpaguhna. (Oge 1 Tesalonika 5:17.) Pertoton sada pemere si meherga. Arus min kita  ngerana kempak Ia arah pusuhta nari. (Masmur 62:8) Ula min sibelasken pertoton si nggo ihapal, tapi arus min bas pusuh nari. Jelas me, adi terus kita erlajar Pustaka si Badia ras ertoto arah pusuh nari, si e banci njaga kekelengenta man Jahwe tetap paguh.

15, 16. Uga pendapatndu kerna dahin erberita si meriah?

¹⁵ Adi ateta terus ndeher ras Jahwe, perlu sipebeteh-ken man kalak si deban kerna kinitekenta. Nuriken kempak kalak si deban kerna Jahwe sada kinihamaten si mbelin. (Lukas 1:74) Janah enda sada tanggung jabap si ibereken Jesus man kerina kalak Kristen si tuhu-tuhu. Kita kerina arus mberitaken berita si meriah kerna Kinirajan Dibata. Nggo nge ilakokenndu?​—Matius 24:14; 28:19, 20.

¹⁶ Menurut rasul Paulus pendahin erberita si meriah seh kal mehergana; ikatakenna enda sada ’erta’. (2 Korinti 4:7) Mpebetehken man kalak si deban kerna Jahwe ras sura-suraNa sada pendahin si seh kal pentingna. Enda sada carandu ngelayani Jahwe, janah Ia ngergai kai si nggo ilakokenndu man baNa. (Heber 6:10) Erberita si meriah pe erguna man bandu ras kalak si megiken kam perban isampatindu kalak si deban bage pe dirindu sendiri gelah ndeher ras Jahwe janah ndatken kegeluhen si rasa lalap. (Oge 1 Korinti 15:58.) Lit kin pendahin si deban si banci mereken kepuasen man bandu asangken erberita si meriah?

17. Engkai pendahin erberita si meriah seh kal pentingna?

¹⁷ Dahin erberita si meriah seh kal pentingna. Arus ’simbarken berita e’, alu la ertaren-taren. (2 Timotius 4:2) Kerina kalak perlu megi kerna Kinirajan Dibata.  Nina Pustaka si Badia, ”Wari [JAHWE] si mbelin enggo ndeher enggo seh kal deherna janah pedas me ia reh!” Wari e ”labo banci la jadi, janah labo ipedekah-dekah”. (Sepanya 1:14; Habakuk 2:3) Payo, kentisik nari, Jahwe pasti ngkernepken doni Setan si jahat enda. Sope si e terjadi, kerina kalak perlu ipersingeti gelah ia banci milih guna ngelayani Jahwe.

18. Engkai arus sisembah Jahwe radu ras turang seninanta?

¹⁸ Ate Jahwe kita nembah Ia radu ras turang seninanta si sada kiniteken. Nina Pustaka si Badia, ”Marilah kita sisampat-sampaten gelah keke ukurta guna nehken keleng ate ras ndalanken si mehuli. Ola kita la reh ku perpulungen, bagi si ibahan piga-piga senina-nta. Tapi lebih asa si e siiah-iahenlah kita sabap sieteh maka wari [Jahwe], e me wari kerehenNa, reh me.” (Heber 10:24, 25) Arus siusahaken kal gelah banci reh ku perpulungen. Bas perpulungen kita banci sisampat-sampaten ras siiah-iahen.

19. Kai si erbahanca kita banci ngkelengi turang seninanta?

¹⁹ Paksa kam reh ku perpulungen, kam banci jumpa ras turang senina si mehuli si banci nampati kam ngelayani Jahwe. Kam banci jumpa ras erbage-bage turang senina, bali bagi kam, ia pe iusahakenna kal nembah Jahwe. Janah bali bagi kam, ia pe la sempurna ras erban salah. Paksa kalak e erban salah, nggitlah kam ngalemi ia. (Oge Kolose 3:13.) Teruslah ukuri sifat-sifat mehuli turang seninandu, alu ngelakoken si e, enda banci nampati kam ngkelengi ia janah erdeherna ras Jahwe.

20, 21. Kai kin ”kegeluhen si tuhu-tuhu” e?

²⁰ Ate Jahwe gelah kerina kalak si rembak ras Ia  ndatken kegeluhen si seh kal ulina. Pustaka si Badia ngajarken maka kegeluhenta i bas wari si pepagi pasti seh kal bedana ras kegeluhenta si gundari.

²¹ I bas wari si pepagi, banci kita nggeluh si rasa lalap, labo 70 ntah pe 80 tahun saja. Kita banci ngenanami kegeluhen alu kesehaten si sempurna, dame, ras dem keriahen ukur i bas pardis si mejile. Enda me si ikataken Pustaka si Badia ”kegeluhen si tuhu-tuhu”. Jahwe erjanji mereken kerina enda man banta, tapi arus silakoken kerina si banci silakoken gundari gelah ’ndatken’ janah ncikep nteguh arapen e.​—1 Timotius 6:12, 19.

22. (a) Uga carana gelah banci sicikep nteguh kegeluhen si tuhu-tuhu? (b) Engkai maka kegeluhen si rasa lalap la banci sidatken alu gegehta sendiri?

²² Uga carana gelah banci sicikep nteguh kegeluhen si tuhu-tuhu? Kita arus ’ndalanken si mehuli’ ras ’bayak i bas perbahanen si mehuli’. (1 Timotius 6:18) Enda ertina perlu sidalanken kai si nggo sipelajari bas Pustaka si Badia. Tapi, kegeluhen si tuhu-tuhu e la banci sidatken arah gegehta jine. Labo pernah kita metunggung ndatken kegeluhen si rasa lalap. Enda sada pemere i bas Jahwe nari man juak-juakNa si setia, salah sada bukti ’lias ateNa’ si la metunggung sidatken. (Roma 5:15) Bapanta si nisurga tuhu-tuhu ateNa mereken pemere enda man juak-juakNa si setia.

23. Engkai maka arus erban pilihen si benar gundari?

²³ Sungkuni bandu, ’Enggo nge kusembah Dibata alu cara si ngena ateNa?’ Adi akapndu perlu erbahan perubahen, lakokenlah alu tutus. Paksa kita ernalem man Jahwe janah siusahaken asa ngasupta patuh man baNa, Jahwe pasti jadi inganta cio. Pasti ijagaiNa  juak-juakNa si setia gelah banci selamat i bas doni Setan si jahat enda. Kenca si e, kita nggeluh i bas Pardis seh rasa lalap, bagi si nggo ijanjiken Jahwe. Jelas me, kam banci ndatken kegeluhen si rasa lalap adi kam erbahan pilihen si benar gundari!