1, 2. Penungkunen kai si megati isungkun kalak?

ANAK-ANAK melala kal penungkunenna. Adi nggo ijabapndu sungkunna ka, ’Engkai?’ Cubakenndu ka njabapsa, tapi sungkunna ka, ’Engkai maka bage?’

² La soal si nguda ntah pe si nggo metua, kerina lit penungkunenta. Misalna, megati kita nungkun kerna kai si man pangan, si man tukuren ntah pe si man paken. Tapi, lit ka penungkunen si penting kerna kegeluhen si gundari bage pe wari si pepagi. Adi jabapenna la bagi ukurta, banci dungna ngadi kita ndarami jabapenna.

3. Melala jelma erpengakap la ia banci ndatken jabapen kerna penungkunenna si penting, ngkai?

³ Banci kin Pustaka si Badia njabap kerina penungkunen si penting ndai? Banci. Tapi lit si erpengakap mesera kal ngangkaisa. Si deban erpengakap maka guru ntah pe peminpin agama ngenca metehsa. Lit ka si la meteh jabapenna tapi mela ngakuisa. Adi kam uga?

4, 5. Penungkunen penting kai si lit i bas ukurndu? Engkai maka arus daramindu jabapenna?

⁴ Banci saja kam merhat meteh jabapen kerna, Engkai maka aku tubuh? Kai si terjadi adi aku mate? Uga kin situhuna Dibata e? Nina Jesus, sekalak Guru si terberita, ”Pindolah, tentu ngalo me kam; daramilah, tentu idatndu; tuktuklah, tentu italangi pintun man bandu.” (Matius 7:7) Ula kam ngadi ngasa datndu jabapen si banci itekindu.

 ⁵ Teklah kam, adi ’terus daramindu’ pasti datndu jabapenna i bas Pustaka si Badia. (Kuan-kuanen 2:1-5) Jabapenna la mesera ngangkaisa. Enda banci erban kam ermeriah ukur gundari, janah ndatken arapen si luar biasa i bas wari si pepagi. Gundari sibahas sada penungkunen si erban melala jelma bingung.

6. Engkai maka piga-piga kalak erpengakap Dibata la ermediate nandangi kiniseranna?

⁶ Melala jelma erpengakap maka Dibata la ermediate. Adi ermediate kin Ia, pasti keadan doni enda la bagenda. I jah i je siidah perang, kesusahen, ras kejahaten. Manusia pe sakit, ngenanami kiniseran, dungna mate. Emaka, melala kalak tersungkun-sungkun, ’Adi tuhu-tuhu kin Dibata ermediate ngkai maka la ipengadiNa si enda kerina?’

7. (a) Alu cara uga peminpin agama ngajarken maka Dibata e kejam? (b) Engkai kita banci tek maka labo Dibata si erban kerina kiniseran?

⁷ Paksa terjadi kiniseran, peminpin agama ngataken maka enda peraten Dibata. Ia me si erbanca. Alu bage, peminpin agama situhuna nggo nalahken Dibata. Emaka, melala kalak erpengakap Dibata kejam. Tapi, Pustaka si Badia ngajarken maka Dibata la pernah erban kiniseran. Ia pe la pernah ncubai kalak alu kiniseran. Nina Jakup 1:13, ”Adi lit kalak ikenai percuban, ola min nina, ’Percuban enda rehna i bas Dibata nari.’ Sabap Dibata la banci icubai si jahat, janah ise pe labo icubai Dibata.” Emaka, amin gia ipediat Dibata kerina kiniseran terjadi, labo Dibata si erbanca. (Oge Jop 34:10-12.) Mari sinehen sada contoh.

8, 9. Engkai maka la adil adi sisalahken Dibata kerna kiniseranta? Bereken contohna.

 ⁸ Cuba ukurindu, sekalak bapa si mpebelin anakna alu kekelengen. Iajarina anakna erban keputusen si mehuli. I bas sada paksa, anakna e lanai nggit megiken bapana janah nadingken rumah. Ilakokenna si la mehuli, dungna ia ngenanami kiniseran. Erkiteken ipediat bapana ia lawes, banci kin bapana si ipersalahken? Pasti lang. (Lukas 15:11-13) Bali bagi bapa e, Dibata mpediat manusia paksa milih la megiken Ia ras ngelakoken kai si la mehuli. Tapi, adi keputusen e ngerehken kiniseran arus siinget maka labo Dibata si erbanca. Tentu la adil adi sipersalahken Dibata.

⁹ Lit alasen si masuk akal ngkai ipediat Dibata denga kiniseran terjadi. I bas Pasal 11, banci ipelajarindu kai nina Pustaka si Badia kerna si e. Tapi, teklah kam maka Dibata tuhu-tuhu ngkelengi kita janah la pernah erban kiniseran. Ia ngenca si banci siarapken nasapken kerina kiniseranta.​—Jesaya 33:2.

10. Kai si erbanca kita tek maka Dibata ngenca si ngasup nasapken kerina kejahaten?

¹⁰ Dibata badia kap. (Jesaya 6:3) Kerina perbahanenNa mehuli, murni janah bersih. Enda si erbanca kita banci tek nandangi Ia. La bagi manusia si maun-maun erban kesalahen. Penguasa si seh kal bujurna pe, la ngasup mpesikap doni enda si nggo ceda erkiteken kalak jahat. Kuasa Dibata la tertandingi. Ia ngenca si ngasup janah nggit mpesikap doni enda. Kerina kejahaten pasti ilesapken Dibata.​—Oge Masmur 37:9-11.

11. Uga perasan Dibata ngidah kiniseranndu?

¹¹ Uga perasan Dibata ngidah kai si terjadi i doni  ras kai si terjadi man bandu? Nina Pustaka si Badia, ”ngena kal ate TUHAN keadilen”. (Masmur 37:28) Enda me sabapna, Dibata ermediate kerna kai si benar ras si salah. La Ia senang adi manusia ngenanami kiniseran. Pustaka si Badia ngatakenca, ”erkadiola kal Ia” janah ceda kal ukurna ngidah doni dem alu kejahaten i bas jaman si nuria. (Kejadin 6:5, 6) Dibata la pernah mobah. (Maleaki 3:6) Pustaka si Badia ngatakenca maka Dibata tuhu-tuhu mperdiateken kam.​—Oge 1 Petrus 5:7.

12, 13. (a) Engkai maka keleng ateta kalak si deban, janah uga perasanta ngidah kerina kiniseran i doni? (b) Engkai maka banci kita tek isasapken Dibata pagi kerina kiniseran ras kinilaadilen?

¹² Nina Pustaka si Badia, manusia itepa sentudu ras tempas Dibata. (Kejadin 1:26) Ertina, sifat-sifat Dibata lit i bas manusia. Adi ceda ukurndu ngidah manusia si la ersalah ngenanami kiniseran, cedan ka ukur Dibata. Janari banci sieteh?

¹³ Nina Pustaka si Badia ”Dibata kekelengen kap”. (1 Johanes 4:8) Enda ertina kerina si ilakoken Dibata erpalasken kekelengen. Kita pe ngusih kekelengen Dibata. Cuba ukurindu enda, adi lit kuasandu nggit nge kam nasapken kerina kiniseran i doni enda? Pasti. Sabap keleng atendu manusia. Adi Dibata uga? Ia mbelin kuasaNa janah keleng ateNa kita. Emaka, pasti isasapkenNa kerina kiniseran ras kinilaadilen. Uga carana kam banci tek kerna janji Dibata? Aruslah tandaindu Ia.

14. Ise kin gelar Dibata, janah janari banci sieteh maka arus sipake gelar e?

¹⁴ Adi atendu erteman ras sekalak jelma, kai biasana  si tangtangna ikatakenndu? Pasti gelarndu. Lit kin gelar Dibata? Nina melala agama gelarNa Tuhan ntah pe Dibata. Tapi, enda labo gelar. Enda jabaten ntah pe penggelaren ngenca bali bagi ”raja” ntah pe ”presiden”. Dibata mpebetehken gelarNa eme kap Jahwe. Nina Masmur 83:19, ”Gelah ngaku ia maka Kam, si ergelar Jahwe, Kam saja si Meganjangna i bas kerina doni enda.” (Padan si Ndekah, si Nipegendek, cetaken tahun 1953, J.H. Neumann) Situhuna penulis Pustaka si Badia nuratken gelar enda lebih 7.000 kali. Ate Jahwe ietehndu gelarNa janah igunakenndu. Jahwe mpebetehken gelarNa gelah kam banci jadi temanNa.

15. Kai ertina gelar Jahwe?

¹⁵ Gelar Jahwe mbages kal ertina. Ertina eme kerina sura-suraNa ras janjiNa pasti terjadi. Janah ise pe la banci mpengadi Ia. Jahwe ngenca si banci make gelar e. *

16, 17. Kai ertina (a) ”si Mada Kuasa”? (b) ”Dibata si rasa lalap”? (c) ”si Nepa”?

¹⁶ Adi sioge kerna Dibata i bas Masmur 83:19 nina, ”Kam saja si Meganjangna  i bas kerina doni enda.” (Padan si Ndekah, si Nipegendek) Bage ka pe Ketangkasen 15:3 ngataken-ca, ”O Tuhan [ntah pe Jahwe], Dibata si Mada Kuasa, seh kal belinna perbahanenNdu si erbahanca ate mamang. O Raja kerina bangsa, seh kal bujurna perbahanenNdu, seh kal payona pendalankenNdu.” Kai ertina penggelaren ”si Mada Kuasa”? Ertina, seh kal belinna kuasa Dibata janah ise pe i bas alam semesta enda la ngasup nandingisa. Janah penggelaren ”Dibata si rasa lalap” ertina Ia lalap lit. Masmur 90:2  njelaskenca maka Dibata nggo lit nai-nai nari seh ku rasa lalap. La kin akapndu enda luar biasa!

¹⁷ Jahwe ngenca si Nepa. Nina Ketangkasen 4:11, ”O [Jahwe] Dibata kami Kam me si metunggung ngaloken kemulian, kehamaten ras Kuasa. Sabap Kam njadikenca kerina si nasa lit, janah erkiteken peratenNdu nge maka kerina e lit dingen nggeluh.” Kai saja si itepa Dibata? Malekat-malekat i surga, bintang-bintang i langit, buah-buahen, ras nurung i lawit—Jahwe si erbanca enda kerina!

18. Engkai piga-piga kalak erpengakap maka ia labo pernah banci rembak ras Dibata? Kai nina Pustaka si Badia kerna si e?

¹⁸ Kenca ngoge sifat-sifat Jahwe si mehuli, piga-piga kalak mbiar janah rukur, ’Dibata e mada kuasa, seh kal belinna, janah ringan i surga, ngkai maka iperdiatekenNa aku?’ Tapi, bage kin ate Dibata perukurenta? Tentu lang. Ate Jahwe gelah Ia rembak ras kita. Pustaka si Badia ngatakenca, ”Dibata e labo ndauh i bas kita nari sekalak-sekalak.” (Perbahanen Rasul-Rasul 17:27) Emaka, ate Dibata gelah kam rembak ras Ia, janah Ia erjanji, ”Ia pe ngerembakken diriNa man bandu.”​—Jakup 4:8.

19. (a) Uga carana kam banci jadi teman Dibata? (b) Sifat-sifat Dibata si apai si ngena kal atendu?

¹⁹ Uga carana kam banci jadi teman Dibata? Nina Jesus, ”Kegeluhen si tuhu-tuhu si la erkeri-kerin e: Itandai kalak Kam ngenca Dibata si tuhu-tuhu, dingen itandaina Jesus Kristus si isuruhNdu.” (Johanes 17:3) Teruslah erlajar kerna Pustaka si Badia, gelah banci itandaindu Jahwe ras Jesus. Janah dungna kam banci ndatken kegeluhen si rasa lalap. Contohna, bagi si nggo sipelajari, ”Dibata kekelengen kap.” (1 Johanes 4:16) Tapi, melala denga sifat-sifat Jahwe si mehuli si debanna. Pustaka si Badia ngatakenca maka Jahwe ’melias ras perkuah ate, la sukah merawa janah dem alu kekelengen si mbelin ras setia’. (Keluaren 34:6) Jahwe ”mehuli dingen nggit ngalemi”. (Masmur 86:5) Ia sabar dingen setia. (Masmur 31:6; 2 Petrus 3:9) Banci ietehndu terbuen kerna sifat-sifat Dibata adi terus ipelajarindu Pustaka si Badia.

20-22. (a) Uga carana kita banci rembak ras Dibata adi la banci si idah Ia? (b) Kai si arus ilakokenndu adi lit kalak nuruh kam ngadi erlajar Pustaka si Badia?

 ²⁰ Uga kam banci rembak ras Dibata adi labo idahndu Ia? (Johanes 1:18; 4:24; 1 Timotius 1:17) Adi ogendu kerna Jahwe i bas Pustaka si Badia banci gejapkenndu maka Ia tuhu-tuhu lit. (Masmur 27:4; Roma 1:20) Adi terus ipelajarindu terbuen kerna Jahwe, reh kelengna kal atendu Ia janah kam banci rembak ras Ia.

²¹ Banci gejapkenndu maka Jahwe e bali bagi sekalak Bapa. (Matius 6:9) Ia si mereken kegeluhen. Janah ateNa kita ndatken kegeluhen si mehulina. Enda me sura-sura Dibata si perkeleng man anak-anakNa. (Masmur 36:9) Pustaka si Badia ngajarken maka kita banci jadi teman Dibata. (Jakup 2:23) Cuba ukurindu, Dibata si Nepa si nasa lit nggit jadi temanndu!

²² Banci saja ate piga-piga kalak kam ngadi erlajar Pustaka si Badia. Mbiar ia kam pindah agama. Tapi, ula pediat ise pe ngambati kam jadi teman Jahwe. Ia me teman si mehulina si banci idatkenndu.

23, 24. (a) Engkai maka kam arus terus nungkun? (b) Kai si man pelajarenta i bas Pasal 2?

²³ Asum kam erlajar Pustaka si Badia banci saja lit si la iangkaindu. Ula kam mela nungkun ntah pe mindo penampat. Nina Jesus aruslah kita meteruk rukur bali bagi anak-anak si melala kal penungkunenna. (Matius 18:2-4) Ate Dibata kam ndatken jabapenna. Emaka, pelajarindulah Pustaka si Badia alu megermet gelah banci ipastikenndu maka kai si ipelajarindu e benar.​—Oge Perbahanen Rasul-Rasul 17:11.

²⁴ Cara si mehulina nandai Dibata eme kap alu erlajar Pustaka si Badia. I bas Pasal 2, banci ietehndu ngkai maka Pustaka si Badia la seri ras buku si debanna.