1. Pertoton kai si ieteh nterem jelma si man bahasenta gundari?

JUTAN jelma meteh pertoton si igelari Pertoton Bapa Kami. Jesus nggunaken pertoton enda guna ngajari ajar-ajarna cara ertoto. Kai kin si itotokenna? Janah ngkai pertoton e penting man banta gundari?

2. Kai telu hal si niajarken Jesus gelah sitotoken?

² Nina Jesus, ”Dage, bagendalah nindu ertoto: ’O Bapa kami si ni Surga. GelarNdu ipebadia min; Reh min KinirajanNdu; Sehlah min peratenNdu, i bas doni enda bagi ni Surga.’” (Oge Matius 6:9-13.) Engkai maka Jesus ngajari kita notoken telu hal enda?​—Nehen Penjelasen tambahen 20.

3. Kai si banci sipelajari kerna Kinirajan Dibata?

³ Enggo sipelajari gelar Dibata eme Jahwe. Janah nggo ka sipelajari kai sura-suraNa man manusia bage pe man doni enda. Tapi kai maksud Jesus paksa ikatakenna, ”Reh min KinirajanNdu”? Banci sipelajari kai kin Kinirajan Dibata e, kai si nandangi ilakokenna, janah uga Kinirajan e pagi mpebadiaken gelar Dibata.

4. Kai kin Kinirajan Dibata e, janah ise nge Rajana?

⁴ Kinirajan Dibata eme pemerentahen i surga si ipajekken Jahwe janah Jesus me Rajana. Jesus eme ”Raja i bas kerina raja, dingen Tuhan i bas kerina tuan”. (1 Timotius 6:15) Jesus ngasup ngelakoken kai si ndauh ulin asangken kerina si pernah ilakoken  pemerentah manusia, janah gegehen kuasana asang-ken kerina pemerentah manusia.

5. Janari pemerentahen Dibata e merentah? Kai pagi si iperentahna?

⁵ Empat puluh wari kenca Jesus ipekeke, ia mulihken ku surga. Dungna, itangkuhken Jahwe ia jadi Raja. (Perbahanen Rasul-Rasul 2:33) Pemerentahen Dibata e pagi si merentah doni enda i surga nari. (Ketangkasen 11:15) Eme sabapna Pustaka si Badia nggelari Kinirajan Dibata e ”Kinirajan Surga”.​—2 Timotius 4:18.

6, 7. Engkai maka Jesus ndauh ulin asangken raja-raja si deban?

⁶ Pustaka si Badia ngataken, maka belinen Jesus asangken kerina raja manusia erkiteken ia ”ngenca nggeluh rasa lalap”. (1 Timotius 6:16) Kerina manusia si merentah dungna mate, tapi Jesus la pernah banci mate. Kerina kiniulin si ilakoken Jesus man banta banci sigejapken seh rasa lalap.

⁷ Nubuat Pustaka si Badia ngatakenca Jesus pagi jadi Raja si adil dingen perkuah, ”Kesah [JAHWE] ringan i bas ia, mereken pemeteh ras kuasa merentah rayatna. Ietehna peraten [JAHWE], mehamat ia kempaksa, janah keriahenna, e me matuhi [JAHWE]. La erpalasken si teridah saja ia ngadili, tah pe erpalasken kai si ibegina; tapi alu bujur irungguina perkara kalak musil, janah ibelana kalak si tertindas. Arah perentahna kalak si ersalah iukum, janah kalak jahat ikernepken.” (Jesaya 11:2-4) Nggit nge kam adi bage rajandu?

8. Janari banci sieteh maka labo Jesus ngenca si merentah i surga?

⁸ Enggo ipilih Dibata piga-piga manusia guna merentah  ras Jesus bas pemerentahen surga. Contohna, nina rasul Paulus man Timotius, ”Adi tetap megenggeng kita, ras ia ka pe kita pagi erkuasa.” (2 Timotius 2:12) Piga kalak pagi si merentah ras Jesus?

9. Piga kalak pagi si merentah ras Jesus? Ndigan mulai ipilih Dibata kalak enda?

⁹ Bagi si nggo sipelajari bas Pasal 7, rasul Johanes ndatken sada pengenehenen i ja iidahna Jesus jadi raja i surga ras 144.000 raja si debanna. Ise kin si 144.000 e? Johanes njelasken maka ”i bas perdempakenna kerina nggo isuratken gelar anak biri-biri e ras gelar Bapana”. Janah nina, ”Iikutkenna anak biri-biri e ku ja gia ia lawes. Ia enggo itebusi i bas manusia si deban nari.” (Oge Ketangkasen 14:1, 4.) Si 144.000 enda, eme kalak Kristen si setia si nggo ipilih Dibata gelah ”irajaina pagi doni enda” ras Jesus. Paksa kalak e mate ipekeke ia ku surga. (Ketangkasen 5:10) Mulai jaman rasul-rasul, nggo ipilih Jahwe piga-piga kalak Kristen si setia guna jadi bagin i bas 144.000 raja.

10. Engkai maka banci ikataken Jahwe perkeleng i bas milih Jesus ras 144.000 kalak guna merentah manusia?

¹⁰ Jahwe ermediate kal man banta, emaka ipilihNa piga-piga manusia guna merentah ras Jesus. Jesus banci jadi penguasa si mehuli erkiteken iangkaina uga kita. Ietehna uga nanamna jadi manusia. Rasul Paulus ngatakenca Jesus banci nggejapken perasanta, ia ”labo kalak si la nggejapken kekoten-kekotenta”. Janah ”erlajar patuh ia arah kiniseranna”. (Heber 4:15; 5:8) Si 144.000 enda pe pernah jadi manusia si la sempurna, si ngadapi perbeben ras penakit. Emaka, banci kita tek Jesus ras si 144.000  enda labo ngenca ngangkai perasanta, tapi iangkaina ka perbeben-perbeben geluhta.

11. Engkai maka iajari Jesus ajar-ajarna gelah notoken peraten Dibata terjadi i surga?

¹¹ Jesus ngajari ajar-ajarna gelah notoken peraten Dibata terjadi i surga. Engkai? I bas Pasal 3 nggo sipelajari maka Setan mberontak nentang Jahwe. Tapi, Jahwe mpediat ia ras malekat-malekat si la setia tading i surga piga-piga waktu dekahna. Emaka labo kerina si tading i surga ngelakoken peraten Dibata. I bas Pasal 10, banci sipelajari terbuen kerna Setan ras begu-beguna.

12. Kai dua kejadin penting si ituriken Ketangkasen 12:10?

¹² Pustaka si Badia ngataken, kenca Jesus jadi Raja, mis ia erperang ngelawan Setan. (Oge Ketangkasen 12:7-10.) Ayat 10 nuriken dua kejadin si seh kal pentingna. Si pemena, Jesus Kristus mulai merentah i bas Kinirajan Dibata. Si peduaken, Setan isampetken surga nari ku doni. Kentisik nari sipelajari maka kejadin-kejadin enda nggo terjadi.

13. Kai si terjadi i bas surga paksa Setan isampetken?

¹³ Pasti meriah kal iakap malekat-malekat si setia kenca Setan ras begu-beguna isampetken surga nari. Sioge, ”Emaka ersuraklah o Surga, bage pe kerina kam si ringan i bas!” (Ketangkasen 12:12) Gundari lit kedamen i surga erkiteken kerina si tading i surga ersada guna ngelakoken peraten Dibata.

14. Kai si terjadi i doni kenca Setan isampetken i bas surga nari?

¹⁴ Tapi, beda kal keadanna i doni. Hal-hal si la mehuli  terjadi man manusia ”sabap Iblis enggo nusur ku kam, janah merawa ia sabap ietehna maka kentisik nari ngenca kesempaten lit i bas ia”. (Ketangkasen 12:12) Merawa kal Setan. Ia nggo isampetken surga nari, janah ietehna kentisik nari ikernepken ia. Kai pe ilakokenna guna erban perbeben, kinisuin, ras kiniseran i belang-belang doni.

15. Kai peraten Dibata nandangi doni enda?

¹⁵ Tapi peraten Dibata man doni enda lenga berubah. Sura-suraNa bagi si gelgel denga, eme gelah manusia si sempurna nggeluh si rasa lalap i bas doni si jadi pardis. (Masmur 37:29) Emaka, uga Kinirajan Dibata erbanca enda terjadi?

16, 17. Kai si niajarken Daniel 2:44 kerna Kinirajan Dibata?

¹⁶ Nubuat bas Daniel 2:44 ngatakenca, ”Tupung paksa penguasa-penguasa ndai, ipanteki Dibata nu langit me sada kerajan si la ermasap-masap. Ndigan pe la tertaluken, tapi ikernepkenna me seh keri kerajan-kerajan si deban, janah kenca bage pajek ia rasa lalap.” Kai ertina nubuat enda man banta?

¹⁷ Si pemena, enda ngajarken maka Kinirajan Dibata mulai merentah ”tupung paksa penguasa-penguasa ndai”. Ertina, paksa Kinirajan Dibata mulai merentah lit denga pemerentahen si deban si merentah i doni enda. Peduaken, enda ngajarken maka Kinirajan Dibata lit rasa lalap janah la pernah banci igantiken alu pemerentahen si deban. Si peteluken, Kinirajan Dibata pagi erperang ngelawan kerina pemerentahen i doni enda. Kinirajan Dibata pagi si menang janah pemerentahenNa ngenca si erkuasa i  belang-belang doni. Emaka, manusia banci ngenanami pemerentahen si mehulina kal i doni enda.

18. Kai gelar perang pendungi Kinirajan Dibata ras pemerentahen doni enda?

¹⁸ Uga carana Kinirajan Dibata nggantiken pemerentahen doni enda? Sope terjadi perang pendungi, si igelari Harmagedon, isesatken begu-begu ”raja-raja i belang-belang doni enda; ipepulungna raja-raja e guna erperang i bas wari si mbelin e, e me wari Dibata si Mada Kuasa!” Jelas me, pemerentahen manusia pagi erperang ngelawan Kinirajan Dibata.​—Ketangkasen 16:14, 16; nehen Penjelasen tambahen 10.

19, 20. Engkai maka Kinirajan Dibata arus merentah doni enda?

¹⁹ Engkai maka kita perlu Kinirajan Dibata? Lit telu alasenna. Si pemena, kita kerina nggo erdosa, eme sabapna kita sakit ras mate. Tapi, nina Pustaka si Badia, i bas Kinirajan Dibata pagi kita banci nggeluh si rasa lalap. Buktina, nina Johanes 3:16, ”Sabap bage pengkelengi Dibata doni enda, e maka iberekenNa anakNa sitonggal, gelah ola bene ise pe si tek man baNa, tapi gelah dat kegeluhen si tuhu-tuhu si la erkeri-kerin.”

²⁰ Alasen si peduaken erkiteken melala jelma si jahat i sekelewetta. Melala jelma erbual, nipu ras si la mehuli lagu langkahna. Kita la ngasup ngkernepken kalak enda, tapi Dibata ngasup. Manusia si terus ngelakoken perbahanen si jahat ikernepken pagi bas Harmagedon. (Oge Masmur 37:10.) Alasen si peteluken erkiteken pemerentahen manusia la lit kiningasupenna, kejam, dingen dem alu korupsi. Kalak enda la nggit nampati manusia gelah patuh man Dibata.  Nina Pustaka si Badia, ”Lit sekalak si erkuasa janah kalak si deban ngenanami kiniseran erkiteken kuasana.”​—Pengerana 8:9.

21. Uga Kinirajan Dibata erban sura-sura Dibata terjadi i doni enda?

²¹ Kenca Harmagedon, Kinirajan Dibata pasti erbahan sura-sura Dibata terjadi i doni enda. Contohna, ikernepkenNa pagi Setan ras begu-beguna. (Ketangkasen 20:1-3) Seh me waktuna, lanai lit jelma si sakit ntah pe mate. Erkiteken tebusen, kerina manusia si setia banci nggeluh seh rasa lalap i Pardis. (Ketangkasen 22:1-3) Kinirajan Dibata pagi mpebadiaken gelar Dibata. Kai ertina? Ertina, paksa pemerentahen Dibata erkuasa i doni enda, kerina manusia nghamati gelar Jahwe.​—Nehen Penjelasen tambahen 21.

22. Janari banci sieteh maka Jesus lenga jadi Raja paksa ia i doni ntah pe mis kenca ia ipekeke?

²² Jesus ngajari ajar-ajarna gelah notoken, ”Reh min KinirajanNdu.” Jelas me, pemerentahen Dibata e reh i bas wari si pepagi. Si pemena ilakoken Jahwe eme erban sada pemerentahen ras nangkuhken Jesus  jadi Raja. Mis nge Jesus jadi Raja kenca ia mulihken ku surga? Lang, ia nimai denga. Kenca Jesus ipekeke, Petrus bage pe Paulus ngataken maka nubuat i bas Masmur 110:1 igenepi i bas diri Jesus. I bas nubuat enda, ikataken Jahwe, ”Kundulken arah kemuhenKu seh maka Kutamaken imbang-imbangndu iteruh tapak-tapak nahendu.” (Perbahanen Rasul-Rasul 2:32-35; Heber 10:12, 13) Asa kai dekahna Jesus nimai?

23. (a) Ndigan Jesus mulai jadi Raja i bas Kinirajan Dibata? (b) Kai si man pelajarenta i bas pasal selanjutna?

²³ Sope tahun 1914, sada terpuk kalak Kristen si tutus ngangkai maka tahun e seh kal pentingna i bas nubuat Pustaka si Badia. Mulai tahun 1914, peristiwa-peristiwa si terjadi i doni mbuktiken maka kalak enda benar. Jesus mulai merentah jadi Raja i bas tahun e. (Masmur 110:2) Mis kenca si e, Setan isampetken ku doni, janah gundari ”kentisik nari ngenca kesempaten lit i bas ia”. (Ketangkasen 12:12) I bas pasal selanjutna banci siidah terbuen bukti maka kita nggeluh i bas masa si e. Janah banci ka sipelajari maka kentisik nari Kinirajan Dibata erban sura-sura Dibata terjadi i doni enda.​—Nehen Penjelasen tambahen 22.