1, 2. Engkai Pustaka si Badia ikataken hadiah si luar biasa i bas Dibata nari?

UGA nge penggejapenndu adi lit sekalak teman mereken hadiah man bandu? Pasti la kam sabar meteh kai isina janah meriah ukurndu erkiteken lit si mperdiateken kam. Janah, katakenndu bujur man bana.

² Pustaka si Badia hadiah i bas Dibata nari. Keterangen si lit i je la lit i bas buku-buku si deban. Contohna, ipebetehkenna man banta maka Dibata me si nepa surga, doni, ras manusia si pemena. Janah mereken prinsip-prinsip si banci nampati kita ngadapi perbeben. I je banci sipelajari uga cara Dibata njadiken sura-suraNa guna mpesikap doni enda. Enda me sabapna maka Pustaka si Badia hadiah si luar biasa!

3. Kai si banci ietehndu asum kam erlajar Pustaka si Badia?

³ Asum kam erlajar Pustaka si Badia, banci ietehndu maka merhat kepeken Dibata kam jadi temanNa. Reh lalana kam erlajar kerna Dibata, reh rembakna kam ras Ia.

4. Adi menurutndu kai si erbahanca maka Pustaka si Badia la seri ras buku si deban?

⁴ Pustaka si Badia nggo lit i bas kira-kira 2.600 ca-kap. Janah nggo miliaren icetak. Menam kerina manusia i belang-belang doni banci ngoge Pustaka si Badia i bas cakap si ipakena. Tiap minggu lebih sada juta kalak ndatken Pustaka si Badia. Jelas me, la lit buku si seri bagi Pustaka si Badia.

5. Engkai maka banci sikataken Pustaka si Badia ”rehna i bas Dibata nari”?

 ⁵ Pustaka si Badia ”rehna i bas Dibata nari”. (Oge 2 Timotius 3:16.) Tapi piga-piga kalak rukur, ’Engkai maka ikataken Pustaka si Badia rehna i bas Dibata nari adi manusia nge si nulissa?’ Nina Pustaka si Badia, ”Si njemba kalak ngerana nehken berita si rehna i bas Dibata nari e me kesah si badia.” (2 Petrus 1:21) Enda seri bagi sekalak pengusaha si nuruh sekretarisna nulisken sada surat. Surat ise nge e? Pasti surat pengusaha labo surat sekretarisna. Bage ka pe, Pustaka si Badia eme kap surat Dibata, Ia me Pengarangna labo surat jelma si nulissa. Dibata mbimbing jelma si nulisken isi pikirenNa. Emaka, Pustaka si Badia tuhu-tuhu  ”Kata Dibata”.​—1 Tesalonika 2:13; nehen Penjelasen tambahen 2.

6, 7. Engkai maka banci sikataken isi Pustaka si Badia e sentudu?

⁶ Guna nulisken Pustaka si Badia iperluken waktu lebih 1.600 tahun. Penulisna nggeluh i bas masa si erbeda-beda. Piga-piga meganjang sekolahna, tapi lit ka si la sekolah. Contohna, lit raja, hakim, dokter, nabi, si debanna perjuma-juma, nelayan, ras permakan. Amin gia la seri penulisna, kerina bagin i bas Pustaka si Badia sentudu sada ras si debanna. Ertina, la lit sada pe si ertentangen. *

⁷ Bagin si pemena i bas Pustaka si Badia nuriken uga tangtangna lit perbeben i doni. Janah bagin si pendungi mpebetehken uga pagi Dibata ndungi keri-na perbeben alu erban doni enda jadi pardis. I bas Pustaka si Badia ituriken ribun tahun sejarah manusia bage pe sura-sura Dibata si pasti terjadi.

8. Bereken contoh si mbuktiken maka kai si ikataken Pustaka si Badia kerna ilmu pengetahuan tepat dingen jelas.

⁸ Situhuna Pustaka si Badia labo buku ilmu pengetahuan ntah pe buku sekolah. Tapi, kai si ikatakenna kerna ilmu pengetahuan pasti tepat dingen jelas. Enda mbuktiken maka Pustaka si Badia tuhu-tuhu i bas Dibata nari. Contohna, i bas buku Imamat, Dibata mpebetehken man kalak Israel uga carana gelah penakit la ngelangketi jelma si deban. Enda isuratken ndekah ope denga jelma meteh maka kuman ras virus banci  erban penakit. Pustaka si Badia ngajarken maka doni isangkutken i bas si la lit. (Jop 26:7) Nai nterem jelma la ngangkai i ja nari rehna udan, tapi Pustaka si Badia nggo mpebetehken sada proses peredaren lau si erbanca udan reh.​—Pengerana 1:7.

9. Pelajaren kai si banci sidatken i bas kejujuren penulis Pustaka si Badia?

⁹ Paksa Pustaka si Badia nuriken sejarah, kerina isina tepat dingen jelas. La bagi buku sejarah si deban si la terteki erkiteken penulisna la jujur. Contohna, tiap talu kenca bangsana i bas perang la kerina iturikenna. Sebalikna, penulis Pustaka si Badia jujur, talu pe bangsa Israel kerina isuratkenna. Kalak e pe nulisken kesalahenna ka. Contohna, i bas buku Bilangen, Musa nuratken kesalahenna si mekelek bage pe ukumen si ialokenna i bas Dibata nari. (Bilangen 20:2-12) Kejujuren penulis Pustaka si Badia mbuktiken maka buku e i bas Dibata nari. Enda ertina Pustaka si Badia banci siteki.

10. Engkai maka pedah Pustaka si Badia erguna man banta gundari?

¹⁰ ”Pustaka si Badia rehna i bas Dibata nari janah erguna i bas ngajari kalak kerna si ngena ate Dibata, mandang si lepak, pekena si salah dingen erguna i bas mereken pedah-pedah gelah nggeluh alu mehuli.” (2 Timotius 3:16) Jelas me, pedah-pedah Pustaka si Badia erguna man banta gundari. Jahwe meteh uga kita itepa. Emaka, iangkaiNa perasan ras perukurenta. ItandaiNa kita lebihen asangken dirinta sendiri. Merhat Ia adi kita nggeluh ermeriah ukur. IetehNa kai si mehuli ras si la mehuli man banta.

11, 12. (a) Pedah si mehuli kai si ibereken Jesus i bas Matius bindu 5 seh ku 7? (b) Kai nari si banci sipelajari i bas Pustaka si Badia?

 ¹¹ I bas buku Matius pasal 5 seh ku 7, Jesus mereken pedah si mehuli kal kerna uga carana nggeluh ermeriah ukur, cara erteman, ertoto, ras uga perukuren si benar kerna sen. Amin gia pedah-pedah enda ibereken 2.000 tahun si nggo lewat, tapi erguna denga gundari.

¹² I bas Pustaka si Badia, Jahwe mereken prinsip-prinsip gelah keluarganta banci ermeriah ukur, uga carana jadi sierdahin si bujur, bage pe cara erdame ras kalak si deban. Prinsip-prinsip enda banci lalap nampati kita la soal ise kita, i ja kita tading ntah pe kai persoalenta.​—Oge Jesaya 48:17; nehen Penjelasen tambahen 3.

13. Kai si inubuatken Jesaya kerna kota Babilon?

¹³ Melala nubuat i bas Pustaka si Badia nggo terjadi. Contohna, inubuatken Jesaya maka Babilon iruntuhken me. (Jesaya 13:19) Iturikenna uga carana kota e italuken. Kota Babilon ikeleweti tembok si seh kal paguhna. Janah ipaleri lau si mbelin. Tapi, Jesaya ngataken maka lau si mbelin e ipekerah kari janah gerbangna ipediat talang. Musuh-musuh ngkuasai kota e pagi alu la lit perlawanen. Inubuatken Jesaya ka gelar kalak si naluken kota e, eme Kores.​—Oge Jesaya 44:27–45:2; nehen Penjelasen tambahen 4.

14, 15. Uga nubuat Jesaya e terjadi?

¹⁴ Dua ratus tahun kenca nubuat e itulis, reh me sada pasuken si nggo ersikap guna nerang kota Babilon. Ise komendanna? Bagi si nggo inubuatken  gelarna Kores, raja Persia. Emaka, nubuat enda nandangi terjadi.

¹⁵ I bas berngi paksa musuh nerang kota Babilon, kalak Babilon sangana erpesta-pesta. Kalak e erpengakap aman-aman saja erkiteken kota e ikeleweti gerbang ras lau si mbelin. Tapi, bas darat kota Kores ras pasukenna erban sada paliren gelah lau si mbelin ndai  surut. Emaka, pasuken Persia banci mentas. Uga carana pasuken banci mentasi gerbang si seh kal mbelinna? Bagi si nggo inubuatken, gerbang kota ipediat talang emaka pasuken banci ngkuasai kota Babilon alu la lit perlawanen.

16. (a) Kai si inubuatken Jesaya kerna masa depan Babilon? (b) Janari banci sieteh maka nubuat Jesaya e tuhu-tuhu terjadi?

¹⁶ Inubuatken Jesaya, ise pe lanai pagi pernah tading i Babilon. Nina, ”Ndigan pe lanai lit kalak nggeluh i je.” (Jesaya 13:20) Tuhu kin enda terjadi? Banci siidah reruntuhen Babilon i Irak, kira-kira 80 km arah selatan Bagdad. Gundari pe, lanai lit kalak si tading i je. Nina Jahwe, ”Kuradasken Babil seh kai pe la lit si tading.”​—Jesaya 14:22, 23. *

17. Engkai maka banci kita tek nandangi kerina janji Dibata?

¹⁷ Ngidah bage lalana nubuat Pustaka si Badia nggo terjadi, enda erban kita tek nandangi kai si ikataken Pustaka si Badia kerna wari si pepagi. Banci kita  tek maka Jahwe pasti nepati janjiNa erban doni enda jadi pardis. (Oge Bilangen 23:19.) Jelas me, lit arapenta guna ndatken ’kegeluhen si tuhu-tuhu si la erkeri-kerin si enggo ipadanken Dibata man banta ope denga lit paksa-paksa; Dibata labo erbual.’​—Titus 1:2. *

18. Kai si ikataken Paulus kerna ”Kata Dibata”?

¹⁸ Enggo sieteh Pustaka si Badia la seri bagi buku-buku si deban. Kerina isina sentudu, janah paksa nuriken kerna ilmu pengetahuan ras sejarah, kerina tepat dingen jelas. Bage ka pe, iberekenna pedah-pedah si erguna man banta janah risiken melala nubuat si nggo terjadi. Tapi labo enda saja, lit ka si erban Pustaka si Badia lebih meherga. Isuratken rasul Paulus, ”Kata Dibata e nggeluh dingen erdahin.” Kai ertina?​—Oge Heber 4:12.

19, 20. (a) Uga Pustaka si Badia banci nampati kam meteh uga kin kam situhuna? (b) Uga carandu ngergai Pustaka si Badia, hadiah i bas Dibata nari?

¹⁹ Pustaka si Badia banci ngubah kegeluhenndu, nampati kam meteh uga kin kam situhuna, bage pe meteh uga perukuren ras isi pusuhndu. Contohna, banci siakap kita ngkelengi Dibata. Tapi guna mbuktikenca, perlu sidalanken kai si ikataken Pustaka si Badia.

²⁰ Pustaka si Badia tuhu-tuhu buku i bas Dibata nari. Ate Dibata gelah iogendu, ipelajarindu, ras ikelengindu. Kataken bujur nandangi hadiah enda, janah teruslah pelajari. Kenca si e, banci iangkaindu kai sura-sura Dibata man manusia. I bas Pasal 3, banci ipelajarindu terbuen kerna sura-suraNa enda.