1-3. Penungkunen kai si rusur isungkuni kalak kerna kematen, janah jabapen kai si ibereken melala agama?

PUSTAKA si Badia erjanji i bas sada paksa ”lanai pagi lit kematen”. (Ketangkasen 21:4) I bas Pasal 5, nggo sipelajari uga tebusen banci erban kita nggeluh si rasa lalap. Tapi gundari manusia mate denga. (Pengerana 9:5) Emaka, turah me sada penungkunen si penting, kai si terjadi man banta paksa kita mate?

² Jabapen kerna penungkunen e penting kal paksa sekalak jelma si keleng ateta mate. Banci saja kita tersungkun-sungkun, ’Ku ja ia lawesna? Idahna denga nge kita? Banci kin isampatina kita? Banci denga nge kita jumpa ras ia?’

³ Jabapen si ibereken melala agama la seri. Piga-piga ngajarken adi kam mehuli kam lawes ku surga, adi la mehuli itutung bas neraka. Janah piga-piga ka ngatakenca paksa kam mate kam jadi mahluk roh, janah tading ras anggota keluargandu si nggo mate. Nina si debanna ka, kenca kam mate ras iadili, kam banci tubuh ntah pe nggeluh mulihi alu kula si deban, banci saja jadi manusia si deban ntah pe jadi rubia-rubia.

4. Kai pendapat si seri, si niajarken melala agama kerna kematen?

⁴ Aminna gia la seri jabapen si ibereken melala agama, tapi kerina ngajarken pendapat si seri. Kalak e ngajarken maka paksa sekalak jelma mate, sada bagin i bas kulana tetap denga nggeluh. Tuhu kin e?

5, 6. Kai si terjadi man banta paksa kita mate?

⁵ Ieteh Jahwe kai si terjadi man banta paksa kita mate, ikatakenNa paksa sekalak jelma mate, lanai lit kegeluhenna. Kematen kebaliken arah kegeluhen. Emaka paksa sekalak jelma mate, perasan ras ingetenna lanai lit i japa pe. * Paksa kita mate kita la banci ngidah, megi bage pe rukur.

⁶ Nina Raja Salomo, ”Kalak si enggo mate kai pe lanai ietehna.” Kalak mate lanai lit kekelengenna ntah pe pernembeh atena, janah ”lanai bo lit dahin, ntah pe perukuren. I bas doni kematen lanai bo lit pemeteh ntah pe kepentaren janah ku jah me perlawesndu”. (Oge Pengerana 9:5, 6, 10.) Masmur 146:4 ngataken maka paksa sekalak jelma mate, ”kerina sura-surana peltep”.

7. Kai si niajarken Jesus kerna kematen?

⁷ Paksa Lasarus mate, nina Jesus man ajar-ajarna, ”Temanta Lasarus enggo tunduh.” Tapi labo maksudna Lasarus e paksana istirahat. Emaka nina Jesus, ”Lasarus enggo mate.” (Johanes 11:11-14) Kematen ipeseri Jesus bagi kalak tunduh. La ikatakenna adi Lasarus e i surga ntah pe ras anggota keluargana si nggo mate. Janah la ikatakenna Lasarus itutung bas neraka ntah pe tubuh mulihi jadi jelma si deban ntah pe jadi rubia-rubia. Lasarus bali bagi kalak si paksana tunduh.  I bas ayat-ayat si deban pe, kematen ipeseri bagi kalak tunduh. Contohna, paksa anak Jairus mate, nina Jesus, ”Anak enda labo mate tunduh saja nge ia”.​—Lukas 8:52.

8. Janari banci sieteh maka Dibata nepa manusia labo gelah mate?

⁸ Payo kin Dibata nepa Adam ras Hawa gelah mate? Lang! Jahwe nepa kalak enda gelah banci ngenanami kegeluhen si rasa lalap alu kesehaten si sempurna. Paksa Jahwe nepa manusia, ibanNa kalak enda ersura-sura nggeluh seh rasa lalap. (Pengerana 3:11) La pernah lit sura-sura orang tua ngidah anakna metua janah  dungna mate. Bage ka me perasan Jahwe man banta. Tapi adi Dibata nepa kita gelah nggeluh seh rasa lalap, ngkai maka kita mate?

9. Engkai perentah si ibereken Dibata man Adam ras Hawa la mesera matuhisa?

⁹ I bas peken Eden, nina Jahwe man Adam, ”Kerina buah batang kayu si lit i bas peken enda banci ipanndu, seakatan buah batang kayu si mereken pemeteh kerna si bujur ras si jahat. Buah batang kayu e la banci ipanndu, adi ipanndu la banci lang mate kam i bas wari e.” (Kejadin 2:9, 16, 17) Perentah e la mesera matuhisa, janah lit hak Jahwe guna nentuken kai si mehuli ras kai si la mehuli man Adam ras Hawa. Adi kalak e patuh, banci icidahkenna maka ia tuhu-tuhu nghamati wewenang Jahwe. Janah ncidahken uga belinna pengataken bujurna man Dibata nandangi kerina si nggo ialokenna i bas Dibata nari.

10, 11. (a) Uga carana Setan nipu Adam ras Hawa? (b) Engkai maka perbahanen Adam ras Hawa la termaafken?

¹⁰ Tapi, Adam ras Hawa milih la patuh man Jahwe. Nungkun Setan man Hawa, ”Tuhu kin ikataken Dibata man bandu maka la banci ipanndu sada pe buah batang kayu si i bas peken enda?” Jabap Hawa, ”Kerina buah batang kayu si lit i bas peken enda banci nge ipan kami, seakatan buah kayu si i tengah peken. Ikataken Dibata man kami, ’maka la banci pan buahna, jemak pe ola. Adi ipan ntah ijemak kami, mate kami.’”​—Kejadin 3:1-3.

¹¹ Kenca si e ngaloi ka Setan, ”Labo kam mate. Bage nina Dibata, perban ietehNa kenca ipanndu, bali kam  ras Dibata, meteh si bujur ras si jahat.” (Kejadin 3:4, 6) Ate Setan gelah Hawa erpengakap maka ia banci erban keputusen sendiri guna nentuken kai si mehuli ras kai si la mehuli. Ibualina Hawa. Nina Setan, Hawa labo mate, emaka ipan Hawa me buah e janah iberekenna man Adam. Ieteh kalak e maka nggo ikataken Jahwe gelah ula ipanna buah e. Emaka paksa ipanna, kalak enda la patuh man perentah Dibata si jelas janah menukah ndalankenca. Emaka, icidahkenna maka ia la nghamati Bapana si perkeleng. Kai si ilakokenna la termaafken!

12. Engkai maka mengecewaken kal paksa Adam ras Hawa la patuh man Jahwe?

¹² Perbahanen Adam ras Hawa tuhu-tuhu erban kecewa. La ihamatina si Nepa ia! Uga nge perasanndu adi anak si ipebelinndu mberontak janah nimbak kata-katandu? La kin ceda kal pusuhndu?

13. Kai ertina paksa ikataken Jahwe ”jadi taneh ka kam mulihken”?

¹³ Paksa Adam ras Hawa la patuh, bene me kesempatenna guna nggeluh si rasa lalap. Ikataken Jahwe man Adam, ”I bas taneh nari kam ijadiken, janah jadi taneh ka kam mulihken.” (Oge Kejadin 3:19.) Enda ertina Adam mulihken jadi taneh, bali bagi sope lenga ia itepa. (Kejadin 2:7) Kenca Adam erdosa, mate me ia janah lanai lit.

14. Engkai maka kita mate?

 ¹⁴ Adi Adam ras Hawa patuh man Dibata, pasti lit denga ia gundari. Tapi paksa ia la patuh, kalak e erdosa dungna mate. Dosa bali bagi penakit si mekelek si iwarisken Adam ras Hawa banta. Kerina kita tubuh nggo erdosa, eme alasenna kita mate. (Roma 5:12) Tapi enda labo tujun Dibata man manusia. La pernah ate Dibata manusia mate, janah Pustaka si Badia ngataken maka kematen e ”musuh”.​—1 Korinti 15:26.

15. Uga kebenaren kerna kematen mbebasken kita?

¹⁵ Kebenaren kerna keadan kalak mate mbebasken kita i bas melala ajaren palsu. Pustaka si Badia ngajarken maka kalak mate lanai igejapna mesui ntah pe ceda ate. La kita banci ngerana ras ia, ia pe la banci ngerana ras kita. La banci sisampati ia, ia pe la banci nampati kita. Kalak e la banci ncilakai kita emaka la kita perlu mbiar. Melala agama ngajarken maka kalak si nggo mate nggeluh denga bas sada ingan, janah banci sisampati ia adi sibereken sen man pendeta. Tapi, kita la tertipu.

16. Tipun kai si niajarken melala agama kerna kematen?

¹⁶ Setan nggunaken agama palsu guna nipu kita gelah kita erpengakap maka kalak si nggo mate nggeluh denga. Contohna, piga-piga agama ngajarken paksa kita mate, lit sada bagin i bas kulanta si nggeluh denga i ingan si deban. Bage kin si niajarken agamandu, ntah iajarkenna nge kai nina Pustaka si Badia kerna keadan kalak mate? Setan nggunaken erbage tipun gelah manusia erdauhna i bas Jahwe nari.

17. Engkai ajaren kerna manusia itutung bas api neraka sada penghinan man Jahwe?

 ¹⁷ Pasti mamang ateta nandangi kai si niajarken melala agama. Contohna, piga-piga ngajarken maka kalak jahat itutung si rasa lalap i neraka. Tipun enda sada penghinan man Jahwe. La pernah ipediatNa manusia itutung! (Oge 1 Johanes 4:8.) Uga perasanndu adi lit sekalak jelma si ngukum anakna alu nutung tanna? Pasti kejam akapndu ia. Janah la atendu ndeher ras ia. Bage me ate Setan perasanta nandangi Jahwe!

18. Engkai maka kita la perlu mbiar man kalak mate?

¹⁸ Piga-piga agama ngajarken maka paksa manusia mate, ia jadi mahluk roh. Agama si bage ngajarken maka kita arus mehamat dingen mbiar man roh kalak mate, erkiteken ia banci jadi teman si megegeh ntah pe jadi imbang si kejam. Enterem jelma tek nandangi tipun e. Mbiar ia man kalak mate, emaka isembahna me kalak mate labo Jahwe. Ingetlah kalak mate lanai banci nggejapken kai pe, emaka kita la perlu mbiar. Jahwe me si nepa kita. Ia Dibata si benar, janah Ia saja ngenca si arus sisembah.​—Ketangkasen 4:11.

19. Kai gunana man banta meteh kebenaren kerna kematen?

¹⁹ Paksa sieteh kebenaren kerna kematen, kita ibebasken i bas tipun melala agama. Ras nampati kita guna ngangkai janji Jahwe si luar biasa si nggo ibahanNa man banta bage pe masa depanta.

20. Kai si man pelajarenta i bas pasal selanjutna?

²⁰ Mbarenda, Jop, juak-juak Dibata nungkun, ”Kenca mate manusia, banci kin ia nggeluh ka?” (Jop 14:14) Banci kin kalak mate nggeluh mulihi? Jabapen Dibata bas Pustaka si Badia tuhu-tuhu erban meriah ukurta. Banci sinehen i bas pasal selanjutna.