1. Ise si mereken kegeluhen man banta?

JAHWE ”Dibata si nggeluh”. (Jeremia 10:10) Ia si Nepa kita, ras si mereken kegeluhen man banta. Nina Pustaka si Badia, ”Kam njadikenca kerina si nasa lit, janah erkiteken peratenNdu nge maka kerina e lit dingen nggeluh.” (Ketangkasen 4:11) Jelas me, ate Jahwe gelah kita nggeluh. Kegeluhen pemere si meherga i bas Dibata nari.​—Oge Masmur 36:10.

2. Kai si arus silakoken gelah kegeluhenta berhasil?

² Jahwe mereken pangan ras inemen gelah kita banci nggeluh. (Perbahanen Rasul-Rasul 17:28) Tapi lebih asa si e, ateNa gelah kita nggeluh ermeriah ukur. (Perbahanen Rasul-Rasul 14:15-17) Gelah kegeluhenta berhasil, kita arus patuh man hukum Dibata.​—Jesaya 48:17, 18.

3. Kai si ilakoken Jahwe kenca Kain munuh Abil?

³ Pustaka si Badia ngajarken maka kegeluhenta bage pe kegeluhen jelma si deban meherga iakap Jahwe. Contohna, paksa Kain, anak Adam ras Hawa, merawa kal man agina Abil, ipersingeti Jahwe ia gelah ngkuasai emosina. Tapi la ibegikenna. Erkiteken merawa kal Kain ’erkusur ukurna ngelawan Abil, jenari ibunuhna’. (Kejadin 4:3-8) Perban si e iukum Jahwe ia. (Kejadin 4:9-11) Emaka, rawa ras ate segat erbahaya, erkiteken banci erban kita jahat ntah pe kejam. Jelma si  bage la banci nggeluh si rasa lalap. (Oge 1 Johanes 3:15.) Gelah meriah ukur Jahwe, arus sipelajari ngkelengi kerina jelma.​—1 Johanes 3:11, 12.

4. Kai si niajarken salah sada perentah Dibata man kalak Israel kerna kegeluhen?

⁴ Ribun tahun kenca si e, Jahwe mereken Sepuluh Perentah man Musa si ncidahken maka meherga kal iakap Jahwe kegeluhen. Salah sada hukum e, ”Ola munuh.” (Ulangen 5:17) Adi sekalak jelma munuh alu sengaja, ia pe arus ibunuh.

5. Uga pandangen Dibata kerna nggugurken kandungen?

⁵ Uga perasan Dibata kerna nggugurken kandungen? Meherga iakap Jahwe kegeluhen amin gia i bas bertin denga. I bas Hukum si ibereken Jahwe man kalak Israel, ikatakenNa adi lit sekalak jelma ncilakai sekalak diberu janah anak i bas bertinna mate, kalak e arus ibunuh. (Oge Keluaren 21:22, 23; Masmur 127:3) Enda ngajarken maka nggugurken kandungen e salah.​—Nehen Penjelasen tambahen 28.

6, 7. Uga kita banci ncidahken man Jahwe maka meherga siakap kegeluhen?

⁶ Uga kita banci ncidahken man Jahwe maka meherga siakap kegeluhenta bage pe kegeluhen jelma si deban? Alu la ngelakoken kai pe si banci ncilakai kegeluhenta ntah pe jelma si deban. Emaka ula kita ngisap, man belo, ntah pe make narkoba, erkiteken enda banci ncilakai janah munuh kita.

⁷ Kegeluhen ras kulanta pemere Dibata, jadi arus sigunaken e bali bagi si niarapkenNa. Emaka perlu sijaga dirinta. Adi lang, banci kita la bersih iadep-adepen Dibata. (Roma 6:19; 12:1; 2 Korinti 7:1) La banci sisembah Jahwe si mereken kegeluhen man banta, adi  la siergai kegeluhen. Amin gia mesera mpengadi kebiasan si la mehuli e, pasti kita isampati Jahwe adi kita terus erusaha. Enda ertina meherga siakap kegeluhen.

8. Kai banci silakoken gelah la sicilakai dirinta bage pe kalak si deban?

⁸ Enggo sipelajari maka kegeluhen e sada pemere si meherga. Tek Jahwe man banta maka la pernah sicilakai dirinta ntah pe jelma si deban. Enda teridah bas caranta maba motor, kereta, ntah kendaran si debanna. Sipedauh dirinta i bas olahraga si kejam dingen berbahaya. (Masmur 11:5) Siusahaken ka gelah rumahta tetap aman. Nina Jahwe man kalak Israel, ”Adi ipajekkenndu rumah mbaru, arus maka ibanndu bide ngkeleweti tarum rumah e. Adi bage la kam salah adi lit gia kalak mate ndabuh i das nari.”​—Ulangen 22:8.

9. Uga arusna perbahanenta man rubia-rubia?

⁹ Perbahanenta man rubia-rubia pe penting iakap Jahwe. Banci sibunuh rubia-rubia man panganta ras uista, ntah pe adi ia ngancam kegeluhenta. (Kejadin 3:21; 9:3; Keluaren 21:28) Tapi kita la banci kejam man rubia-rubia ntah pe munuh ia guna kesenangenta saja.​—Kuan-kuanen 12:10.

10. Janari banci sieteh maka kegeluhen lit i bas dareh?

¹⁰ Dareh badia iakap Jahwe erkiteken ngelambang-ken kegeluhen. Kenca Kain munuh Abil, ikataken Jahwe, ”Dareh agindu serko man bangKu i bas taneh nari.” (Kejadin 4:10) Dareh Abil ngelambangken kegeluhenna, janah Jahwe ngukum Kain erkiteken munuh Abil. Kenca Banjir si Mbelin i bas jaman Nuah, icidah-ken  Jahwe mulihi maka dareh ngelambangken kegeluhen. Jahwe ngijinken Nuah ras keluargana man daging rubia-rubia. Nina, ’Genduari kerina rubia-rubia banci ipanndu, bage pe sinuan-sinuan si meratah. Kubereken e kerina man bandu jadi panganndu.’ Tapi, lit sada si iperentahken Jahwe gelah ula ipan, ”daging si lit denga darehna”.​—Kejadin 1:29; 9:3, 4.

11. Perentah kai si ibereken Dibata man bangsa Israel kerna dareh?

¹¹ Kira-kira 800 tahun kenca ibereken Jahwe perentah ndai man Nuah, iperentahkenNa ka mulihi umatNa, ”Subuk bangsa Israel, bage pe bangsa si deban si tading ras ia, si ndat rubia-rubia ntah perik si la pantangen i bas perburun arus iamburkenna darehna janah itamburina alu taneh.” Kenca si e nina, ”La banci ipan bangsa e daging kai pe si lit denga darehna.” (Imamat 17:13, 14) Ate Jahwe gelah umatNa tetap nganggap dareh e badia. Kalak e banci man daging tapi darehna ula. Paksa munuh sada rubia-rubia guna man pangan, kalak e arus ngamburken darehna ku taneh.

12. Uga anggapen kalak Kristen kerna dareh?

¹² Piga-piga tahun kenca Jesus mate, rasul-rasul ras pertua-pertua bas runggun Kristen i Jerusalem pulung ncakapken kai bagin i bas Hukum Musa si ipake kalak Kristen denga. (Oge Perbahanen Rasul-Rasul 15:28, 29; 21:25.) Jahwe nampati kalak e ngangkai maka meherga denga akapNa dareh janah kalak e arus nganggap dareh e badia. Kalak Kristen si mbarenda la banci man ntah pe minem dareh ntah man daging si lit denga darehna. Sabap enda seri jahatna ras nembah berhala ntah pe erlua-lua. Emaka, kalak Kristen si tuhu-tuhu lanai nggit man ntah pe minem dareh.  Uga gundari? Ate Jahwe gelah tetap sianggap dareh e badia.

13. Engkai kalak Kristen la nggit transfusi dareh?

¹³ Adi bage, arus kin kalak Kristen nulak transfusi dareh? Ue, arus. Jahwe merentahken gelah ula man ntah minem dareh. Adi ikataken dokter bandu gelah ula minem alkohol, suntikkenndu nge ku dagingndu? Tentu lang! Bage ka pe, perentah gelah ula man ntah minem dareh ertina situlak transfusi dareh.​—Nehen Penjelasen tambahen 29.

14, 15. Uga pentingna iakap kalak Kristen ngergai kegeluhen ras patuh man Jahwe?

¹⁴ Uga adi ikataken dokter kam banci mate adi la transfusi dareh? Tiap kalak arus mutusken nggit ntah lang ia patuh man hukum Dibata. Kalak Kristen tuhu-tuhu ngergai kegeluhen si ibereken Dibata, emaka sidarami perawaten si deban gelah banci tetap nggeluh; tapi kita la nggit transfusi dareh.

¹⁵ Siusahaken asa ngasupta gelah tetap sehat, tapi erkiteken meherga iakap Dibata kegeluhen, la kita nggit ngaloken transfusi dareh. Pentingen siakap patuh man Jahwe asangken mpertahanken kegeluhenta tapi la patuh man baNa. Nina Jesus, ”Ise mpertahanken kegeluhenna, bene kap kegeluhenna e, tapi ise kebenen kegeluhenna erkiteken aku, ialokenna me kegeluhenna e.” (Matius 16:25) Kita patuh man Jahwe erkiteken keleng ateta Ia. IetehNa kai si mehulina man banta janah bali bagi Jahwe meherga dingen badia siakap kegeluhen.​—Heber 11:6.

16. Kai alasen juak-juak Dibata patuh man baNa?

¹⁶ Juak-juak Dibata si setia ertekad gelah patuh man  hukumNa kerna dareh. Jadi la ia nggit man ras minem dareh, bage pe transfusi dareh. * Tapi, kalak e ngaloken perawaten si deban guna nelamatken kegeluhenna. Kalak enda tek maka si Nepa kegeluhen ras dareh meteh kai si mehulina man kalak e. Tek nge kam?

17. I bas kalak Israel, Jahwe ngijinken pengunan dareh man kai?

¹⁷ I bas Hukum si ibereken Dibata man Musa, ikataken Jahwe man kalak Israel, ”Kegeluhenna lit i bas darehna, janah eme sabapna maka iperentahken [JAHWE] maka kerina dareh iamburken ku das batar-batar guna ngalemi dosa-dosa bangsa e. Dareh erkiteken eme kegeluhen, nangtangi dosa kap.” (Imamat 17:11) Paksa kalak Israel erdosa, kalak e banci mindo pengalemen dosa alu mpersembahken sada rubia-rubia janah mindo gelah imam ngamburken sitik darehna ku das batar-batar i rumah pertoton. Enda me ngenca penggunan dareh si niijinken Jahwe.

18. Kesempaten kai si banci sidatken i bas korban tebusen Jesus nari?

¹⁸ Paksa Jesus i doni, ipersembahkenna kegeluhen ntah pe darehna gelah dosanta banci ialemi. Enda nggantiken hukum persembahen rubia-rubia. (Matius 20:28; Heber 10:1) Seh kal mehergana kegeluhen Jesus, emaka kenca Jahwe mpekeke Jesus ku surga, Jahwe banci mereken man kerina jelma kesempaten nggeluh si rasa lalap.​—Johanes 3:16; Heber 9:11, 12; 1 Petrus 1:18, 19.

19. Kai si arus silakoken gelah la kita salah nandangi kegeluhen kalak si deban?

 ¹⁹ Bujur ninta man Jahwe kerna pemereNa si meherga eme kegeluhen! Ras sikataken ateta man kerina jelma maka adi tek ia man Jesus, banci ia nggeluh si rasa lalap. Sikelengi kerina jelma, janah silakoken kai pe guna ngajari ia gelah banci selamat. (Esekiel 3:17-21) Emaka, bagi rasul Paulus, banci sikataken, ”Adi lit pagi kam bene i bas Dibata nari, la aku si salah. Sabap man bandu enggo kupeseh kerina sura-sura Dibata.” (Perbahanen Rasul-Rasul 20:26, 27) Jelas me, alu mpebetehken man kalak kerna Jahwe ras perasanNa nandangi kegeluhen, sicidahken maka tuhu-tuhu siergai kegeluhen ras dareh.