PAKSA kam ngoge surat kabar, nonton TV, ntah pe megiken radio, banci idahndu ras ibegindu melala berita kerna kejahaten, perang, bage pe terorisme! Banci saja kam pe ngenanami kiniseran erkiteken penakit ntah pe erkiteken kematen kalak si ikelengindu.

Cuba sungkuni dirindu:

• Payo nge enda sura-sura Dibata man bangku bage pe man keluargangku?

• I ja nge banci kudatken penampat guna ngatasi perbebenku?

• Payo nge lit kedamen si tuhu-tuhu e?

Pustaka si Badia mereken jabapen si banci iteki kerna penungkunen-penungkunen ndai.

• Lanai pagi lit si nggejapken kinisuin, si metua, ntah pe si mate.​—Ketangkasen 21:4

• ”Kalak cempang lompat-lompat desken belkih.”​—Jesaya 35:6

• ”Kalak pentang erpengidah pagi.”​—Jesaya 35:5

•  Kalak mate nggeluh mulihi.​—Johanes 5:28, 29

• Lanai lit si sakit.​—Jesaya 33:24

• Mbue pagi si man pangan i doni.​—Masmur 72:16

Ula mis isimpulkenndu maka kai si iogendu i bas halamen pemena buku enda sekedar nipi saja. Dibata erjanji maka kentisik nari ibahanNa me perubahen-perubahen e i doni, janah Pustaka si Badia njelasken uga Ia ngelakokenca.

Tapi labo e saja. Pustaka si Badia mpebetehken uga carana gelah kita banci tuhu-tuhu ermeriah ukur janah ndatken kepuasen i bas kegeluhen si gundari. Cuba ukuri kentisik kerna kai si erbahan aru atendu. Banci saja masalah ekonomi, masalah keluarga, masalah kesehaten, ntah pe kematen kalak si ikelengindu. Pustaka si Badia banci nampati kam i bas ngatasi masalah-masalah e, janah ngapuli kam alu njabap penungkunen-penungkunen enda:

• Engkai maka kita ngenanami kiniseran?

• Uga carana maka banci siatasi perbebenta?

• Banci nge keluarganta ermeriah ukur?

• Kai si terjadi man banta paksa kita mate?

• Banci nge kita jumpa mulihi ras kalak si keleng ateta si nggo mate?

• Engkai maka banci kita tek Dibata pasti nepati janjiNa?

 Adi sangana ogendu buku enda, e mbuktiken maka ietehndu atendu kai nina Pustaka si Badia. Buku enda banci nampati kam. Lit penungkunen i bas tiap paragraf, si banci nampati kam ngangkai isi Pustaka si Badia terbagesen. Jutan kalak meriah akapna erlajar Pustaka si Badia ras Saksi Jahwe. Ngarap kami maka kam pe bage. Mbera Dibata masu-masu kam asum ipelajarindu kai si ikataken Pustaka si Badia man bandu!