1, 2. Engkai maka pertoton sada pemere si meherga, janah ngkai maka perlu sieteh kai nina Pustaka si Badia?

ADI ibandingken ras alam semesta, doni enda seh kal kitikna. Sanga Jahwe ngidah doni enda, kerina manusia bali bagi sentaktak lau i bas timba. (Masmur 115:15; Jesaya 40:15) Amin gia kita seh kal kitikna adi ibandingken ras alam semesta, Masmur 145:18, 19 ngatakenca, ”Man si erlebuh man baNa ndeher kap Ia, si erlebuh man baNa alu tutus ate. IberekenNa keperlun kalak si erkemalangen man baNa, idengkehkenNa penderkuhna, jenari ikeliniNa ia.” Sada kinihamaten si mbelin man banta! Jahwe si Mada Kuasa, si Nepa kita, nggit rembak ras kita, ras nggit megiken pertotonta. Jelas me, pertoton sada kinihamaten si mbelin, janah pemere si meherga si ibereken Jahwe man banta.

² Jahwe nggit megiken kita adi caranta ertoto ngena ateNa. Uga cara ngelakokenca? Mari sinehen kai nina Pustaka si Badia kerna pertoton.

3. Engkai maka kam arus ertoto man Jahwe?

³ Ate Jahwe kam ertoto ntah pe ngerana man baNa. Janari banci sieteh? Ogelah Pilipi 4:6, 7. Cuba ukuri kiniulin Dibata e. Penguasa alam semesta enda ermediate kal man bandu ras ateNa gelah kam ngerana man baNa janah nuriken perbebenndu.

4. Uga pertoton si ratur banci erban kam rembak ras Jahwe?

 ⁴ Pertoton banci nampati kita reh rembakna ras Jahwe. Paksa sekalak jelma alu ratur ngerana ras temanna guna nuriken perukurenna, kearun atena, bage pe isi pusuhna, hubungenna pe banci reh rembakna. Enda seri ras ertoto man Jahwe. I bas Pustaka si Badia, Dibata Jahwe nuriken uga perukurenNa ras isi pusuhNa man bandu, janah ipebetehkenNa man bandu kai si ilakokenNa i bas wari si pepagi. Adi kam ertoto alu ratur banci iturikenndu isi pusuhndu man Dibata Jahwe. Adi terus ilakokenndu enda, hubungenndu ras Dibata banci reh rembakna.​—Jakup 4:8.

5. Janari banci sieteh la ibegiken Jahwe kerina pertoton?

⁵ Ibegiken Jahwe nge kerina pertoton? Lang. I bas jaman nabi Jesaya, ipebetehken Jahwe man kalak Israel, ”Aminna uga gia buena pertotonndu la Aku  nggit megikenca, sabap alu tanndu enggo nterem kam ngamburken dareh kalak.” (Jesaya 1:15) Emaka, adi la kita metenget, perbahanenta banci mpedauh kita i bas Jahwe nari. Erkiteken si e, Jahwe lanai nggit megiken pertotonta.

6. Engkai maka penting kal erkiniteken? Uga carana kam ncidah-kenca?

⁶ Adi ibegiken Jahwe ateta pertotonta, kita arus erkiniteken man baNa. (Markus 11:24) Nina rasul Paulus, ”Ise pe la ngasup ndalanken si sentudu ras peraten Dibata adi la kin erkiniteken. Sabap kerina si reh ndahi Dibata arus tek maka Dibata lit dingen iberekenNa upah man kalak si ndarami Ia.” (Heber 11:6) Tapi ngaku erkiniteken saja la bias. Perlu sicidahken kinitekenta alu patuh man Jahwe tep-tep wari.​—Oge Jakup 2:26.

7. (a) Engkai maka kita arus meteruk rukur dingen mehamat paksa ertoto man Jahwe? (b) Uga kita banci ncidahken maka kita ertoto bas pusuhta nari?

⁷ Sanga ertoto man Jahwe kita arus meteruk rukur dingen mehamat. Engkai? Adi kita ngerana man sekalak raja ntah pe presiden, pasti kita mehamat man baNa. Jahwe Dibata si Mada Kuasa, emaka la kin arusna kita lebih mehamat janah meteruk rukur paksa ngerana man baNa? (Kejadin 17:1; Masmur 138:6) Kita pe arus ertoto bas pusuhta nari, ula mbelasken pertoton si nggo ihapal.​—Matius 6:7, 8.

8. Paksa lit pemindonta i bas pertoton, kai si perlu silakoken?

⁸ Selain si e, paksa lit pemindonta i bas pertoton, perbahanenta arus sentudu ras isi totonta. Contohna, adi kita ertoto man Jahwe kerna keperlunta tep-tep wari, Jahwe la banci mereken keperlunta e adi kita la  erdahin. Kita arus mejingkat janah la milih-milih dahin. (Matius 6:11; 2 Tesalonika 3:10) Ntah pe adi kita ertoto man Jahwe guna nampati kita mpengadi perbahanen si salah, arus sipedauh dirinta arah kai pe si banci erbanca kita tergoda. (Kolose 3:5) Gundari mari sibahas penungkunen si rusur isungkuni kalak kerna pertoton.

9. Man ise kita arus ertoto? Kai si niajarken Johanes 14:6 kerna pertoton?

⁹ Man ise kita arus ertoto? Iajari Jesus ajar-ajarna ertoto man ’Bapa si ni Surga.’ (Matius 6:9) Janah nina, ”Aku kap dalan nandai Dibata, dingen ndatken kegeluhen. Ise pe la banci ndahi Bapa adi la arah aku.” (Johanes 14:6) Erkiteken si e, kita arus ertoto man Jahwe saja erkelangken Jesus. Kai ertina ertoto erkelangken Jesus? Gelah ibegiken Jahwe ateta pertotonta, arus siergai keduduken si istimewa si nggo ibereken Jahwe man Jesus. Bagi si nggo sipelajari, Jesus reh ku doni guna nelamatken kita i bas dosa ras kematen nari. (Johanes 3:16; Roma 5:12) Jahwe pe nggo nangkuhken Jesus jadi Imam si Mbelin ras Hakim.​—Johanes 5:22; Heber 6:20.

10. Perlu kin sada posisi tertentu paksa kita ertoto? Jelasken.

¹⁰ Perlu kin sada posisi tertentu paksa kita ertoto? Lang, Jahwe la nuruh kita erjimpuh, kundul, ntah pe tedis paksa ertoto. Pustaka si Badia ngajarken maka kita banci ertoto man Jahwe la soal ugapa pe posisinta ertoto, tapi arus alu cara si mehamat. (1 Kronika 17:16; Nehemia 8:6; Daniel 6:10; Markus 11:25)  Sanga kita ertoto, si pentingna man Jahwe eme labo posisinta ertoto tapi ukurta si bersih. Katawari pe kita banci ertoto, i japa pe, janah ersora ntah pe la ersora. Paksa kita ertoto, banci kita tek maka ibegiken Jahwe kita amin gia la lit kalak si metehsa.​—Nehemia 2:1-6.

11. Kai saja si banci sitotoken?

¹¹ Kai saja si banci sitotoken? Kai pe banci sitotoken adi sentudu ras peraten Jahwe. Nina Pustaka si Badia, ”IbegikenNa kita adi sipindo man baNa kai si sentudu ras peratenNa.” (1 Johanes 5:14) Banci kin sitotoken keperlunta? Banci. Ertoto man Jahwe seri ras ngerana man teman si rembak kal ras kita. Banci situriken man Jahwe kai pe si lit i bas pusuh ras perukurenta. (Masmur 62:8) Banci sipindo man baNa kesah si badia gelah nampati kita ngelakoken si benar. (Lukas 11:13) Banci ka sipindo kepentaren gelah beluh erban keputusen si benar, bage pe gegeh guna nampati kita ngadapi perbeben. (Jakup 1:5) Sipindo pengalemen dosa. (Epesus 1:3, 7) Kita pe banci notoken kalak si deban, keluarganta, bage pe turang seninanta i bas runggun.​—Perbahanen Rasul-Rasul 12:5; Kolose 4:12.

12. Kai si pentingna kal i bas pertotonta?

¹² Kai si pentingna kal i bas pertotonta? Jahwe ras peratenNa. Alu bulat ukur arus sikataken bujur man baNa nandangi kerina si nggo iberekenNa man banta. (1 Kronika 29:10-13) Enda banci sieteh perban paksa Jesus i doni, iajarkenna man ajar-ajarna uga cara ertoto. (Oge Matius 6:9-13.) Jesus ngajarken maka si pemena si arus itotoken eme gelah gelar Dibata ipebadiaken. Kenca si e, Jesus ngajarken gelah sitotoken Kinirajan Dibata reh ras peratenNa seh ku doni enda.  Kenca sitotoken hal-hal si seh kal pentingna enda, banci sitotoken keperlunta. Paksa sitamaken Jahwe ras peratenNa i bas ingan si pemena i bas pertotonta, sicidahken maka enda penting kal man banta.

13. Uga dekahna ertoto?

¹³ Uga dekahna ertoto? La lit ituriken i bas Pustaka si Badia. Pertotonta banci gedang ntah pe gendek, sue ras keperlunta. Contohna, toto muat man banci  gendek, tapi paksa mpeseh pengataken bujur ntah pe nuriken kearun ateta, pertotonta banci gedang. (1 Samuel 1:12, 15) La ateta erban pertotonta gedang gelah ndatken pujin jelma si deban, bagi si ilakoken piga-piga kalak i bas jaman Jesus. (Lukas 20:46, 47) La ngena ate Jahwe pertoton kalak si bage. Si pentingna kita ertoto bas pusuh nari.

14. Piga kali kita arus ertoto, janah enda ngajarken kai kerna Jahwe?

¹⁴ Piga kali kita arus ertoto? Jahwe ngundang kita ertoto alu ratur. Nina Pustaka si Badia kita arus ’terus ertoto’, ’megenggeng i bas toto’, ras ”ertotolah katawari pe”. (Matius 26:41; Roma 12:12; 1 Tesalonika 5:17) Katawari pe Jahwe siap megiken pertotonta. Tiap wari banci sikataken bujur man baNa erkiteken kekelengenNa  ras pasu-pasuNa. Banci ka sipindo penampat, gegeh, bage pe pengapul. Adi siergai hak istimewa guna ertoto man Jahwe, reh rusurna kita ertoto man baNa.

15. Engkai arus sikataken ”amin” i bas pendungi pertotonta?

¹⁵ Engkai arus sikataken ”amin” i bas pendungi pertotonta? ”Amin” ertina ”pasti” ntah pe ”jadilah bage”. Enda ncidahken maka tutus ateta ertoto janah i bas pusuhta nari. (Masmur 41:14) Adi lit sekalak maba pertoton i lebe-lebe jelma si nterem, nina Pustaka si Badia mehuli adi sikataken ”amin” i bas pendungi pertotonna. Banci i bas pusuh saja ntah pe ersora. Enda ertina kita setuju nandangi pertotonna.​—1 Kronika 16:36; 1 Korinti 14:16.

16. Ijabap Jahwe nge pertotonta? Jelasken.

¹⁶ Ijabap Jahwe nge pertotonta? IjabapNa. Pustaka si Badia ngatakenca Ia kap ”Si Megiken pertoton”. (Masmur 65:3) Ibegiken Jahwe pertoton jutan kalak si meteruk rukur janah ijabapna alu erbage-bage cara.

17. Uga Jahwe nggunaken malekat ras juak-juakNa i doni guna njabap pertotonta?

¹⁷ Jahwe nggunaken malekat-malekat ras juak-juakNa i doni guna njabap pertotonta. (Heber 1:13, 14) Lit mbue contoh si ncidahken maka kalak si ertoto mindo penampat gelah ngangkai Pustaka si Badia, dungna idahi sekalak Saksi Jahwe. Pustaka si Badia ncidahken maka malekat-malekat pe ikut mberitaken ”berita si meriah” ku sebelang doni. (Oge Ketangkasen 14:6.) Selain si e, nterem kita ertoto paksa ngadapi perbeben ntah pe sanga lit keperlunta, kenca e ndatken penampat arah turang seninanta i bas perpulungen.​—Kuan-kuanen 12:25; Jakup 2:16.

18. Uga Jahwe nggunaken kesah si badia ras Pustaka si Badia guna njabap pertotonta?

 ¹⁸ Jahwe nggunaken kesah si badia guna njabap pertotonta. Paksa kita ertoto mindo penampat i bas ngadapi perbeben, banci igunakenNa kesah si badia guna mereken penampat ras pergegeh. (2 Korinti 4:7) Jahwe pe nggunaken Pustaka si Badia guna njabap totonta janah nampati kita gelah erban keputusen si benar. Sanga kita ngoge Pustaka si Badia banci sidatken ayat-ayat si cocok. Jahwe pe banci ngiahken turang seninanta i perpulungen guna mereken kata pergegeh sue ras keperlunta, ntah pe sekalak pertua banci mereken pedah-pedah si mehuli i bas Pustaka si Badia nari si banci nampati kita.​—Galati 6:1.

19. Engkai maka maun-maun bagi lenga ijabap Jahwe pertotonta?

¹⁹ Maun-maun, kita banci tersungkun-sungkun, ’Engkai maka lenga ijabap Jahwe pertotonku?’ Ingetlah, ietehNa ndigan ras uga cara njabap totonta. IetehNa kai keperlunta. Banci saja kita perlu terus ertoto guna nuduhken maka penting kal pemindonta e janah nuduhken maka kita tuhu-tuhu erkiniteken man baNa. (Lukas 11:5-10) Maun-maun Jahwe njabap pertotonta alu cara si la isangka. Contohna, sitotoken perbebenta, banci saja perbeben e lenga masap. Tapi iberekenNa gegeh man banta gelah megenggeng.​—Oge Pilipi 4:13.

20. Engkai maka kita arus rusur ertoto man Jahwe?

²⁰ Ertoto man Jahwe sada kinihamaten si mbelin! Banci kita tek maka ibegikenNa kita. (Masmur 145:18) Reh rusurna kita ertoto bas pusuhta nari, reh rembakna kita ras Jahwe.