PELAJAREN 04
Ise kin Dibata si Benar?
Mbarenda nari melala dibata ntah pe dewa-dewi si isembah manusia. Tapi nina Pustaka si Badia lit sada Dibata si “hebaten asangken kerina dibata si deban.” (2 Kronika 2:5) Ise kin Ia? Janah engkai maka hebaten Ia asangken kerina dibata si deban ntah pe dewa-dewi si isembah kalak? Bas pelajaren enda, sibahas kari engkai maka ate Dibata tandaindu min Ia.
1. Ise gelar Dibata janah janari siteh maka merhat Dibata gelah sitandai Ia?
Bas Pustaka si Badia, ipetandaken Dibata diriNa man banta. Nina Dibata, “Aku kap Jahwe. E me gelarKu.” (Baca Jesaya 42:5, 8.) “Jahwe” eme gelar si iterjemahken arah bahasa Heber, janah menurut para ahli ertina “Ia si Erbanca Jadi.” Ate Jahwe siteh min gelarNa. (Keluaren 3:15) Kai buktina? Bas Pustaka si Badia, gelar Jahwe itulis lebih 7.000 kali! a Jahwe e gelar “Dibata si benar si lit i langit ras i doni.”—Ulangen 4:39.
2. Kai si ikataken bas Pustaka si Badia kerna Jahwe?
Bas Pustaka si Badia ikataken maka arah kerina dibata si isembah manusia, Jahwe ngenca Dibata si benar. Engkai? Lit piga-piga alasenna. Jahwe eme Dibata “Si Meganjangna i belang-belang doni,” emaka Ia ngenca si meganjangna kekuasanNa. (Baca Masmur 83:18.) Ia pe ikataken ka “Si Madakuasa,” perban ngasup Ia ngelakoken kerina sura-suraNa. Janah Ia me “si nciptaken kerina si lit,” termasuk alam semesta ras kerina si nggeluh i doni. (Ketangkasen 4:8, 11) Selain si e, Jahwe ngenca si lalap lit mbarenda nari seh rasa lalap.—Masmur 90:2.
PELAJARI TERBAGESEN
Sibahas kari kai bedana gelar Dibata ras melala penggelaren Dibata. Janah sibahas ka, engkai maka petandaken Dibata gelarNa man bandu janah uga caraNa ngelakokenca.
3. Sada ngenca gelar Dibata amin gia melala penggelarenNa
Guna meteh kai bedana gelar ras penggelaren, putar VIDEO, kenca si e bahas penungkunen enda:
-
Kai bedana gelar ras penggelaren?
Nina Pustaka si Badia, melala dibata ras tuhan si isembah kalak. Bacalah Masmur 136:1-3, kenca si e bahas penungkunen enda:
-
Ise “Dibata si ganjangen asangken kerina dibata si deban” ras “Tuhan si ganjangen asangken kerina tuhan si deban”?
4. Ate Jahwe tandaindu ras gunakenndu gelarNa
Janari siteh maka ate Jahwe tehndu min gelarNa? Putar VIDEO, kenca si e bahas penungkunen enda.
-
Adi menurutndu, engkai maka ate Jahwe siteh min gelarNa?
Ate Jahwe sigunaken min gelarNa. Bacalah Roma 10:13, kenca si e bahas penungkunen-penungkunen enda:
-
Engkai maka seh kel pentingna nggunaken gelar Dibata eme Jahwe?
-
Sanga petandakenndu gelarndu man kalak, ingetna gelarndu e janah ilebuhna alu mehuli, uga nge perasanndu?
-
Adi menurutndu uga nge perasan Jahwe sanga silebuh gelarNa?
5. Ate Jahwe erteman min kam ras Ia
Sekalak diberu arah Kamboja nari si gelarna Soten ngataken maka meriah kel ukurna kenca tehna gelar Dibata. Putar VIDEO, kenca si e bahas penungkunen enda.
-
Kai nge pengaruhna man Soten kenca tehna gelar Dibata?
Biasana, tehndu lebe gelar kalak maka banci kam erteman ras ia. Bacalah Jakup 4:8a, kenca si e bahas penungkunen-penungkunen enda:
-
Undangen kai si bereken Jahwe man bandu?
-
Engkai maka banci kam reh deherna ras Dibata adi tehndu janah gunakenndu gelarNa?
LIT SI NGATAKEN: “Sada ngenca Dibata, emaka labo dalih uga pe ninta ngelebuh Ia.”
-
Adi kam, tek nge kam gelar Dibata eme Jahwe?
-
Uga nge nindu njelasken maka ate Dibata sigunaken min gelarNa?
KESIMPULEN PELAJAREN ENDA
Sada ngenca Dibata situhu-tuhu, gelarNa eme Jahwe. AteNa siteh min gelarNa e janah sigunaken gelarNa e gelah banci kita erteman ras Ia.
Kai si Enggo Sipelajari?
-
Engkai maka Jahwe la seri ras dibata-dibata si deban si isembah kalak?
-
Engkai maka perlu sigunaken gelar Dibata?
-
Janari siteh ate Jahwe erteman min kita ras Ia?
DARAMI TERBUEN
Nenlah lima alasen si mbuktiken maka lit Dibata.
Masuk akal nge tek maka Dibata lalap lit mbarenda nari?
Engkai maka perlu sigunaken gelar Dibata aminna pe lenga siteh uga pastina gelar e tangtangna ibelasken?
Banci nge silebuh Dibata alu penggelaren kai pe? Engkai maka banci kita tek sada ngenca gelar Dibata?
a Guna ndatken terbuen keterangen kerna erti gelar Dibata ras engkai maka gelar e ihapus bas piga-piga terjemahen Pustaka si Badia, nenlah Keterangen Tambahen A4 bas Pustaka si Badia Terjemahen Doni si Mbaru.
