PELAJAREN 05
Pustaka si Badia Eme Kata-Kata Dibata man Banta
Enggo bereken Jahwe hadiah si luar biasa man banta eme Pustaka si Badia. Pustaka si Badia eme gabungen arah 66 buku. Banci jadi tersungkun-sungkun kam, ‘Janari rehna Pustaka si Badia? Ise pengarangna?’ Guna njawap penungkunen-penungkunen e, mari sibahas uga maka banci Kata Dibata seh ku kita.
1. Engkai maka sikataken Dibata me Pengarang Pustaka si Badia adi manusia nge si nulissa?
Lit kira-kira 40 dilaki si nulis Pustaka si Badia. Jangka waktu penulisenna lit kira-kira 1.600 tahun, mulai tahun 1513 SM ngasa kira-kira tahun 98 M. Penulis Pustaka si Badia la seri latar belakangna. Contohna, lit permakan, nelayan, ras raja. Tapi kai si itulis kalak e, la lit si bertentangen. Engkai maka banci bage? Perban Pengarang Pustaka si Badia eme Dibata. (Baca 1 Tesalonika 2:13.) Kai si itulis kalak e labo arah pikirenna sendiri. Tapi si itulis kalak e “rehna arah Dibata nari perban kalak e itegu-tegu kesah si badia.” a (2 Petrus 1:21) Alu kesah si badia, iban Dibata tersuruh ukur kalak e guna nulisken kai si ateNa pesehNa.—2 Timotius 3:16.
2. Man ise saja nge Pustaka si Badia erguna?
Berita si meriah si lit bas Pustaka si Badia banci erguna man kerina kalak arah “tiap bangsa, suku, bahasa, ras umat.” (Baca Ketangkasen 14:6.) Ipastiken Dibata gelah Pustaka si Badia lit bas melala bahasa, ndauh lalan asangken buku si debanna. Hampir kerina kalak i belang-belang doni, la soal ja ia tading ntah bahasa kai si ipakena, banci mbaca Pustaka si Badia.
3. Kai si ilakoken Jahwe guna mastiken Pustaka si Badia terus lit seh ngasa gundari?
Mbarenda Pustaka si Badia itulis arah bahan-bahan si la ndekah tahan, contohna arah kulit ras sinuan-sinuan si gelarna papirus. Amin gia bage, enterem kalak si isalinna isi Pustaka si Badia alu tepat perban meherga kel akapna Pustaka si Badia. Janah amin gia lit peminpin ntah penguasa si erusaha erban Pustaka si Badia lanai lit, tapi lit ka nge kalak si nggit mate guna ngelindungi Pustaka si Badia. La pediat Jahwe ise pe ngambati Ia ngerana man banta arah Pustaka si Badia. Nina Pustaka si Badia, “Kata Dibatata tahan rasa lalap.”—Jesaya 40:8.
PELAJARI TERBAGESEN
Sibahas kari terdauhen kerna uga Dibata erban tersuruh ukur dilaki-dilaki guna nulis Pustaka si Badia, uga Dibata mastiken Pustaka si Badia tetap lit, janah uga Dibata mastiken kerina kalak banci mbacasa.
4. Pustaka si Badia sendiri si ngataken Pengarangna eme Dibata
Putar VIDEO. Dung e bacalah 2 Timotius 3:16, kenca si e bahas penungkunen-penungkunen enda:
-
Engkai maka Pustaka si Badia ikataken Kata Dibata adi manusia nge si nulissa?
-
Adi menurutndu, banci nge peseh Dibata pikirenNa man manusia si nulis Pustaka si Badia?
Adi isuruh sekalak pengusaha sekertarisna nulisken surat, isi surat e tetap arah pengusaha e labo arah sekertarisna. Bage ka pe, amin pe manusia si nulis Pustaka si Badia, isina rehna arah Dibata.
5. Pustaka si Badia tetap lit amin pe lit si erusaha gelah e lanai lit
Perban Pustaka si Badia rehna arah Dibata nari, ipastikenNa gelah Pustaka si Badia terus lit seh ngasa gundari. Mbarenda nari, melala penguasa si erusaha gelah Pustaka si Badia lanai lit, janah melala peminpin agama si la senang adi baca kalak Pustaka si Badia. Tapi melala ka kalak si nggit ngelindungi Pustaka si Badia amin pe itentang ntah pe geluhna terancam. Guna meteh ise contohna, putar VIDEO, kenca si e bahas penungkunen enda:
-
Reh merhatna nge kam mbaca Pustaka si Badia kenca tehndu uga belinna pengorbanen kalak guna ngelindungi Pustaka si Badia?
Bacalah Masmur 119:97, kenca si e bahas penungkunen enda:
-
Engkai maka enterem kalak si nggit nerjemahken ras nyebarken Pustaka si Badia amin pe banci ia ihukum mate?
6. Buku man kerina kalak
Mbarenda nari, buku si mbuena kel iterjemahken ras isebarken eme Pustaka si Badia. Bacalah Perbahanen Rasul-Rasul 10:34, 35, kenca si e bahas penungkunen-penungkunen enda:
-
Engkai maka ate Dibata gelah Pustaka si Badia isebarken ku sebelang doni ras iterjemahken ku erbage-bage bahasa?
-
Kai nge kapndu si menarik kerna Pustaka si Badia?
Hampir
100%
penduduk doni
banci mbaca Pustaka si Badia bas bahasa si angkaina
Lit i bas lebih
3.000
bahasa
lengkap ntah pe sebagin
5.000.000.000
Perkiran jumlah Pustaka si Badia si pernah icetak,
ndauh buen asangken kerina buku si debanna
LIT SI NGATAKEN: “Aku la teksa man Pustaka si Badia perban enda manusia si nulissa janah enggo ndekah kel itulis.”
-
Uga menurutndu?
-
Kai buktina maka Pustaka si Badia eme Kata Dibata?
KESIMPULEN PELAJAREN ENDA
Pustaka si Badia eme Kata Dibata janah pastikenNa gelah kerina kalak banci mbacasa.
Kai si Enggo Sipelajari?
-
Kai si lakoken Dibata gelah tersuruh ukur piga-piga dilaki guna nulis Pustaka si Badia?
-
Kenca sibahas pelajaren enda, kai nge si erban kam terkesan kerna Pustaka si Badia?
-
Kenca tehndu uga Dibata mastiken Pustaka si Badia seh man bandu, uga nge perasanndu?
DARAMI TERBUEN
Bacalah uga sejarahna Pustaka si Badia si mbarenda lit bas tulisen kuno dungna banci sibaca bas bahasata gundari.
“Bagaimana Alkitab Sampai kepada Kita” (Sedarlah! November 2007)
Pelajarilah uga Pustaka si Badia tetap lit amin pe lit telu tentangen si hebat.
“Alkitab—Sejarahnya yang Penuh Tantangan” (Menara Pengawal No. 4 2016)
Nenlah uga piga-piga kalak nggit nerjemahken Pustaka si Badia amin pe geluhna terancam.
Engkai maka banci kam tek isi Pustaka si Badia la iubah amin pe enggo rusur kel isalin janah iterjemahken ku melala bahasa?
“Lit nge Isi Pustaka si Badia si Enggo Iubah?” (Artikel web)
a Bas Pelajaren 07, ijelasken maka kesah si badia eme gegeh ntah pe kuasa Dibata.
